草缸週記

吐血穀精

2012-02-11T01:29:00.004+08:00

一年前開始玩吐血穀精，單靠 ECA，長得慢又唔紅，仲惹黑毛藻，幾個月黎越種越縮最後枯埋。宜家呢棵由台灣帶黎，上年八月俾 Seachem Excel 醃到霉左，拆開三棵繼續種，五個月後居然長得又紅又密，要多謝 Iron Bottom。今次唔郁前排，將後排果棵一拆三，照計可以再拆一棵但都冇位擺

week 26

2012-02-11T01:08:00.001+08:00

紅針葉皇冠長得好慢，唔知係咪 CO2 唔夠，但其他草狀態好，好難得冇乜黑毛藻、絲藻同白線虫，唔敢立亂郁支 CO2。係得右邊既迷你矮珍珠長得麻麻，可能因為離光管遠。果條絕食左個幾禮拜既女王燈仲未死

week 24

2012-01-31T00:39:00.001+08:00

有條女王燈成日匿晌暖管下面，唔食紅虫，間中食乾糧。死埋就唔買住，橫掂宜家少左油膜，可能因為雨淋管移向右邊水流快左

三棵吐血穀精好似迫得滯，要諗下將後排果棵拆散。紅針葉皇冠終於有走莖

week 23

2012-01-22T07:48:00.002+08:00

本來撈左十一條藍珍珠斑馬，有一條係畸形所以冇計錢，佢唔食野幾日後死左。初時全部好瘦，但唔偏食好快肥返。有條白雲山匿埋唔食野，撈走晒。剩返十二條魚

吐血穀精全部有分株，冇位擺唔打算拆開，亦怕佢地分散左會好易俾迷你矮珍珠淹沒。紅線椒每隔三四日就長一塊新葉，葉片越長就越係綠色，葉尖斷左會繼續長高。迷你矮珍珠開始趴地，冬天唔使理水溫易種好多。紫紅針葉柳竟然有新芽，由剪剩既地下莖生出黎，要連根拔起

洗完濾桶後閘掣漏水，以為扭得唔夠緊，拆開用電筒照先發覺裡面有裂痕，唔知幾時扭爆左，唯有用百二蚊買個新既。CO2 氣石太舊出氣唔順，而氣泵既氣石太阻定，兩粒都換晒

week 20

2011-12-31T01:17:00.000+08:00

重鋪迷你矮珍珠。掘起匙羹萍先發現新芽係藏晌泥下面向橫生，走莖好長但葉片冇長高，所以種咁耐都唔成草皮。比起五年前，宜家照明強左肥料好左，但當時唔使兩個月就鋪滿泥面

鋸短雨淋管移去右邊，由向前出水改為向左出水，想紅線椒順住水流打橫飄。紫紅針葉柳既根好長，魚缸左邊同中間石罅都有幼根突出黎，夾硬扯佢等如反缸，成條莖剪斷拎走好過

紅線椒唔剪得，用泵吸走根邊既泥，移埋舊大石先掘得起。種左四個月，雖然葉尖唔紅，但竟然有一棵分株，拆開種晌後排。幾日後開始長新葉，形狀唔靚既老葉就逐條剪走。紅針葉皇冠起晒出黎鋪過，插返 iron bottom

初次晌魚街搵到紅色型既鑽石紅蓮燈，買左十條。幾年前養過藍色型，急凍紅虫同乾糧都唔點食，冇幾耐死左。呢批養左個幾禮拜得幾條食野，顏色暗啞又好瘦。改養十條藍珍珠斑馬，雖然都瘦但好在食魚糧。買左三條女王燈，死一條，原有果條臨死撈走，剩返兩條，共十四條魚

week 18

2011-12-18T07:05:00.002+08:00

兩個幾月黎除左間中剪草就冇理個缸。白雲山同女王燈各死兩條，剩返呢條女王燈絕食左兩個幾禮拜，紅虫同乾糧都吐返出黎，又唔吸油膜。極火蝦生左三四十隻，已經吸走廿幾隻，否則早就成缸都係

吐血穀精長得密又夠紅，前所未有咁好，可能因為插左 iron bottom

連迷你椒草都密左，但匙羹萍種左兩個月都唔成草皮，想換返迷你矮珍珠

紫紅針葉柳同紅線椒一直係啡色，佢地既葉比想象中長，紫紅針葉柳唔襯個缸，要換走。當初想紅線椒向左邊擺，但經雨淋管既水流一推就飄向前面，想試下將條管擺晌右邊向左吹

week 8

2011-10-10T00:29:00.000+08:00

經過四個禮拜，匙羹萍得幾束有長新葉，其餘幾乎冇郁過。可能種果陣拆得太散，應該將四五塊葉連莖就咁捲埋。紅線椒同紫紅針葉柳既顏色只係變深而冇轉紅。兩隻蝦仔跳缸死左，好在岩岩又孵出一批蝦毛

week 6

2011-09-26T23:06:00.000+08:00

將兩支 iron bottom 折半，三支插晌右後排，一支插晌吐血穀精前面，另一枝 multi bottom 折半分別插晌前排左右。聽講基肥太多會令紅針葉皇冠標高，晌佢附近唔插根肥。插根肥後紫紅針葉柳同紅線椒變深色，匙羹萍同吐血穀精長得慢到好似停左。兩條女王燈同一隻蝦有抱卵

week 5

2011-09-18T23:06:00.000+08:00

山谷石既綠藻用牙刷掃走左，吐血殼精、迷你椒草同紫紅針葉柳既葉面刷唔到，就用針筒打左幾次 5ml 既 excel。買多一包角螺，個缸總共有十隻，好快刷乾淨葉面同膠喉。紫紅針葉柳同紅線椒變返啡色，匙羹萍未完全轉水，仲有心形既新葉，起碼要兩個月後先見到草皮

白雲山 white cloud mountain minnow

2011-09-12T00:54:00.000+08:00

反缸後預左養十至十二條魚，本來想買畢加索燈 jelly bean tetra，冇鋪頭返貨。就算有，每條咁貴都唔會買太多，先買住四條白雲山 / 長翅金絲燈。有一條魚身肥而魚鰭短，似係雌魚。放落缸即晚就食紅蟲，唔追其他魚蝦

week 4

2011-09-12T00:46:00.000+08:00

個缸冇水冷周時廿七八度，令迷你矮珍珠長得慢又易生啡藻，換匙羹萍好過。晌零七年種過，對水溫同照明既要求都低，算最易種既草皮。加左幾棵迷你椒草，有成半個缸既草都生得非常慢，要經常用 excel 控制藍綠藻。紅針葉皇冠既新葉陸續變紅，剪左生得太前既走莖

茶籽餅

2011-09-11T03:21:00.002+08:00

又有白線蟲，係冇反缸前咁多。新買水草用銅藥浸過，但未必殺到蟲卵，再唔係就由角螺帶入黎。搵方法殺蟲，先知道之前用既草藥叫茶籽餅

原來隻藥既毒素對魚同螺殺傷力比對蝦大好多倍，難怪缸魚死晒。當時落完第一劑見蝦毛都冇死，以為藥力唔強，落第二劑就冇撈魚，實在太無知

似乎好難徹底殺晒白線蟲，先洗濾桶再頻密換水，令缸水冇咁多養份，唔至於成缸邊都係蟲就由得佢

week 2

2011-08-29T23:59:00.007+08:00

移左紅線椒出黎，免得佢迫埋一角。有幾片老葉溶左，好在有長紅色新葉。迷你椒草都有溶葉，吐血穀精既有枯葉同絲藻，迷你矮珍珠幾乎冇發芽，仲開始俾啡藻淹沒。紅針葉皇冠長得比預期慢，新葉亦唔紅。紫紅針葉柳越睇越覺得唔襯，遲早換走

前後落左三支 biodigest，缸水開始清返。泥面好多啡藻，加左 3ml excel 同放返五隻大蝦，四隻細蝦。迷矮全部掘起，買包新既種過。以前求祈一箸插落去，唔浮起就算。今次集四五支為一束，剪走多餘既根先插

買左三條女王燈清油膜。撈魚果陣有條跌晌檯面整傷左，落缸後被另一條追住啄，第二日死左。仲有六隻角螺，死左一隻

week 1

2011-08-22T03:34:00.008+08:00

缸水仲係矇同有腥味，水面有油膜。今日落左一支 biodigest，幾日後再用。山谷石背面有藍綠藻，用針筒打過一次 2ml excel，生物過濾未穩定唔敢多用。銅藥用晒，買返一支，仲有盒 iron bottom，兩個月後用

剩返十七隻蝦，有九隻係蝦仔，搬左去膠兜駁埋氣泵。之前冇氣泵，只換一次水都捱到成個禮拜。晌迷你矮珍珠向橫生之前都唔會放蝦，即係起碼兩個禮拜後。呢兜草冇用藥浸過，仲有盤卷同白線虫，將來撈蝦要諗點先唔會污染返個缸

紅線椒 Cryptocoryne tonkinensis

2011-08-22T02:13:00.012+08:00

想晌後景種葉片幼長會搖曳既草，揀左紅線椒。取代吐血穀精，成為全缸最貴既草，同樣生得慢又難種。易溶葉，似迷你椒草。舊葉係綠色而新葉係深紅色，有葉尖變黃剪走左。移開紫紅針葉柳，騰空左個角落俾佢

買果時鋪頭有兩棵，都偏啡色。聽講相同學名既線椒有紅綠兩款，外表一樣，唔夠光兩款都呈綠色，照明充足有一款會轉紅，好似紅針葉皇冠咁

吐血穀精

2011-08-22T01:57:00.000+08:00

估唔到兩棵冇根既吐血穀精分株，隔幾日居然有長新葉同根。好似擺得太迫，將霉左果棵掘起重新種過。原來個芯冇事仲有長新根，但圍住果芯既就爛晒，由葉底開始枯萎。抽個芯出黎再種過，而霉左果堆有一截似地下莖既野，照插返入泥。舊缸果棵細既送左俾人

day 3

2011-08-19T00:45:00.001+08:00

將舊大石稍為移落，同降低右邊斜坡。吐血穀精冇根好易浮起，唯有盡量唔郁到佢地。以前個缸得 25L，開冷氣會凍到 23 度，怕熄冷氣之後溫差太大所以裝暖管，宜家個缸有 30L 都冇幾何低過 25 度，乾脆拆走支暖管

day 1

2011-08-16T22:46:00.002+08:00

買唔返 16x10x12 既缸，睇過兩個都有明顯花痕，其他鋪又冇貨，焗住洗乾淨宜家個缸用返。濾桶同石洗完再用銅藥同 Excel 浸幾個鍾，換晒全新既生物環同白綿，用新黑泥 new amazonia，還原舊缸既佈置

以為棵吐血穀精大到可以分株，掘出黎先發現個芯已經霉左，從外表睇唔出咁大鑊，雖然近排晌外圍已經有爛葉。有好多爛葉，分左兩個頭出黎，葉片仲好挺但冇根。成日有白線虫晌棵草鑽出鑽入，用 Excel 直接噴過幾次，應該整爛左棵草既底部。好在另一棵細既就冇事，雖然得好少根。將四棵種返晌原位，冇根果兩棵預左冇得救，希望霉左果棵未死晒，當 Excel 係除藻殺虫既萬能藥係太天真

矮珍珠用銅藥浸左起碼九個鍾，洗走數以百計既虫屍，每條都幾 cm 長。早排矮珍珍會爛成咁，大概係因為有幾日冇開風扇，暖管又壞左，個缸長時間廿八度幾，晌中間受兩支燈直射既草就最先熱死

紅頭趴趴熊生得太快，除左頂芽成棵綠色，剪完草要隔好耐先紅返，今次用紅針葉皇冠、紫紅針葉柳，加多包迷你椒草。順利既話，係皇冠草要剪得密，其他草都生得慢。將四支 multi bottom 折半插入泥，剩返三枝

用個兜裝起一堆紅頭趴趴熊，放左十幾隻大細不一既極火蝦。以前洗缸後隔一兩日就放蝦，但個缸冇青苔佢地就會咬草，今次至少隔個禮拜先

week 24

2011-08-13T23:22:00.000+08:00

落完三劑藥，間中仲搵到一兩隻盤卷。由七月中開始迷你矮珍珠陸續枯萎，仲由中間向左右兩邊蔓延，唔知受咩影響。後排既玻璃面有好多水蚤，而白線虫殺極都有，用 Excel 直接噴過既草皮好快會枯。個缸累積太多問題，乾脆換缸，成套架生連埋草用銅藥消毒一了百了

第三劑

2011-08-08T16:50:00.003+08:00

28/7 落完藥，1/8 搵到細隻既盤卷，於是落第二劑藥，份量減半。事後死左四隻蝦，剩返八隻，仲有幾隻蝦毛。5/8 又有，落第三劑，冇死蝦。每次落藥後再出現既盤卷都少左

落第二劑藥前，竟然搵到條女王燈既魚毛。女王燈周不時生蛋，係未見過孵到，用藥之後魚卵都變白死晒，居然有一條孵出黎。冇準備養魚毛，落藥之後就見唔到佢。晌水面游既魚毛好快俾大魚食晒，所以之前以為孵唔出

晌泥面越黎越多白線虫，多到爬上吐血穀精。草藥只係殺到幼虫，對泥入面既無咩效。近兩日用針筒打左 5ml 未稀釋既 Excel 落去，白線虫走避不及就即死

未斷尾

2011-08-01T16:44:00.001+08:00

27/5 落左藥，31/7 果然又有幾隻盤卷出現返。好似粒塵咁大，係呢兩日孵出黎既。既然銅藥同草藥都殺唔到螺蛋，等多兩三日，更多蛋孵化後先落第二劑

魚墳場

2011-07-29T15:52:00.003+08:00

尋晚拎走包藥，洗濾桶同換左六成水，用既係隔夜水。搵唔返尋日撈剩既蝦，得幾隻死左既蝦毛。晌膠桶既魚蝦螺全部未死，到搬返佢地入缸就出事

首先有條新燈打側游，半個鍾內所有新燈同紅衣夢幻旗都死晒，然後到女王燈。角螺差唔多係即場死，極火蝦就全部冇事，仲搵到未死既蝦毛

本來話十二個鍾後應該拎走包藥，但到尋日收工果時已經有十八個鍾，藥粉亦可能落左唔止六份一包

為左收拾盤卷都犧牲好多，既然魚同螺都死晒，黎緊每隔個禮拜就落藥，毒死晒為止。連續兩個禮拜都搵唔到盤卷先會養返魚

盤卷

2011-07-28T16:20:00.006+08:00

透明既扁螺由三月至今都搞唔掂，每次落完銅藥，隔個零禮拜又出現返，即係殺唔到螺蛋。銅藥既藥效強又持久，殺蝦同螺之外，連魚都會變得好緊張同唔食野。上網見到有殺渦虫既草藥，會順便殺埋螺同白線虫。去大角咀買左包，十蚊

宜家先知呢隻螺叫盤卷，好難斷尾。包藥殺渦虫可以用十二次，殺盤卷用量加倍。先將魚蝦螺搬去裝隔夜水既膠筒，駁埋暖管、氣泵同風扇，必要時要住幾日。用網袋將剪落黎既草包好沉晌底，令蝦有地方匿

匿晌草叢既魚同蝦好難撈，有隻蝦一直撈唔到。用網袋裝住一份藥夾晌出水口。幾分鍾後，無數白線虫就由唔知邊度湧出黎。幾乎全部都好細條，平時見到既通常成 1cm 長。玻璃面既盤卷都陸續甩落黎

尋晚半夜落藥，今朝九點睇返缸水稍為變白，缸邊有少少泡。搵到唔少盤卷既死屍，但再睇唔到白線虫。尋晚撈剩果隻蝦冇死，仲見到有隻超細既蝦毛。今晚拎走包藥會洗濾桶同換水，先放返魚蝦螺入缸。下次落藥唔會撈蝦，魚同螺要諗下

week 19

2011-07-19T02:32:00.000+08:00

自從用左殺蝸牛藥，新燈唔願食野，成日聚晌魚缸底撞玻璃。換好多次水都仲係咁，乾脆撈走晒，換六條細既。極火蝦死左幾隻，剩低就匿晌草叢，落藥果時摷唔返佢地。撈起角螺同彩蛋螺先落藥，換水後放返落缸，結果死剩一隻，但透明螺仔仲未死晒

落藥後全缸魚都冇晒胃口，係女王燈冇受影響。新燈未至於又撞玻璃，否則會改養其他魚。聽聞大角咀有間魚鋪賣一種好似茶包咁既藥，殺白線虫，對蝦冇害，但要先撈起魚同螺，似乎值得試下。吐血穀精稍為紅左，晌右排既石罅攝左三棵迷你椒草

week 17

2011-07-05T06:55:00.002+08:00

翡翠燈死晒。雖然養左兩年幾都差唔多夠期，同一時間死三條梗係同銅藥有關。其他魚變得好唔自在，食量細左，少左游上水面，連女王燈都唔多吸油膜，新燈同女王燈各一條跳左缸。隔左個禮拜先買返魚、蝦同螺

嫌角螺周圍生蛋本來唔想養，但彩蛋螺易死又行得慢，結果各買一包。加上新買兩條女王燈，目前有十四條魚，約十隻螺同六隻蝦。有棵吐血穀精越種越縮水，將佢移向左邊，較易被燈照到。呢幾日透明螺仔又出現返，呢批似係落藥之後先孵出黎，準備再用藥

week 15

2011-06-20T00:24:00.001+08:00

透明殼既螺仔蔓延到濾桶同草叢周圍都係，搞左兩個幾月，別無選擇唯有毒死佢地。初時用支港產既藥，按份量落完全冇反應。換一支台灣既，幾乎即時見效，玻璃面既螺仔扭左幾下就紛紛甩落黎

後來陸續發現三幾隻死剩種，到宜家總共落左三次藥，每次隔一兩日。呢支係銅藥，雖然事先撈走蝦再落，都預左會有犧牲

角螺死晒，大和藻蝦一死一失蹤，兩隻極火蝦好呆滯。最意外既係翡翠燈都被波及，一死一失蹤。剩低果條亂咁游，隔一陣又正常返。其他魚表面上冇乜事，係唔開口食野

week 13

2011-06-05T01:42:00.000+08:00

將迷你牛毛毯拎走晒，免得日後同迷你矮珍珠撈埋一齊好難修剪。把橫流扇向來裝晌兩支光管中間，會稍為遮住光。怕吐血穀精同迷你矮珍珠唔夠光，宜家移左去後面，兩支光管照住中前排。後排可能暗左，但中間既照明應該足夠，紅頭趴趴熊唔知點解褪晒色

week 11

2011-05-23T00:38:00.002+08:00

呢個幾禮拜每日落幾 ml Seachem Excel，黑毛藻同絲藻幾乎絕跡，連青苔都少左，但為此付出左沉重代價。種迷你矮珍珠之前，本來養左七隻大和藻蝦打掃美國鳳尾苔。後來每日撈起好多食剩條莖既迷你矮珍珠，反映 Excel 令個缸太乾淨唔夠藻俾蝦食，到發現佢地連吐血穀精都食已經太遲

四棵吐血穀精當中，最弱果兩棵既葉冇晒，包括最初買果棵。上星期仲以為救得返，宜家完全枯晒。撈走左五隻大蝦，Excel 改為隔日落 2ml，至少想保住剩低兩棵。用 Excel 對付透明殼既螺冇乜效果，仲係每日執走十幾隻

week 10

2011-05-14T01:12:00.004+08:00

美國鳳尾苔太深色，唔襯紅頭趴趴熊，於是加厚前排既泥，改做迷你矮珍珠。五年前試過種唔掂，應該係唔夠光同太熱。今次插得太散，種左成個禮拜仲係成日俾蝦掘起，應該一束束咁種

最初買果棵吐血穀精用 Excel 浸過之後黑毛藻甩晒，仲有長新葉。搬草果陣將台灣果棵既分株拆開左，宜家共有四棵

每日晌玻璃執走十幾隻透明既螺仔。晌缸邊有幾堆好似係螺蛋，尋日用針筒打左 5ml 未稀釋既 Excel 落去，今日果然少左好多螺

week 9

2011-05-03T23:55:00.002+08:00

紅頭趴趴熊始終差啲，迷你牛毛毯比預期長得慢

吐血穀精

2011-05-03T23:52:00.007+08:00

由台灣帶返兩棵吐血穀精，其中一棵有分株可以拆開種。每棵新台幣百五蚊，平香港一半。得一間鋪有貨，用砂底種緊，賣相麻麻，仲有絲藻。一個禮拜後都冇乜起色，已經將其中一棵送俾人，免得晌度全軍覆沒。最初買果棵既根枯晒，好易浮起，仲生埋黑毛藻，預左救唔返

Flourish Excel

2011-05-03T23:47:00.002+08:00

買多左四隻大和藻蝦同一支 Seachem Excel，對付黑毛藻同絲藻。第一日熄濾桶落 7ml，半個鍾後開返。幾隻極火蝦初時好呆滯，隔一陣就郁動返。往後打算每日落 2ml。女王燈抱蛋，轉頭就唔知黏左去邊

week 7

2011-04-17T04:24:00.002+08:00

用左兩支細菌水，經過一個禮拜缸水開始清返。兩支 multi bottom 啪斷左塞入泥底，加埋新光管同 ADA step 2，紅頭趴趴熊既頂芽終於轉紅色。吐血穀精既根太短抓唔實泥底，試過成棵浮起，好在有發芽，未算死晒

現有新燈七條，翡翠燈同女王燈各三條，紅衣夢幻旗四條，共十七條魚。以前每日起碼捉走五六隻蝸牛，重鋪草皮後就唔見晒，似係洗草時篩走左。剩低一群透明殼既螺，成日附晌紅頭趴趴熊上面，要剪左塊葉先撈得走

重鋪草皮

2011-04-16T04:00:00.001+08:00

執過石之後，草皮變得唔啱位，要剪鋼網重新砌過。石堆同鋼網之間預留左空位，種迷你牛毛毯

week 6

2011-04-09T03:20:00.004+08:00

堆石睇唔順眼，中間果舊既生鏽漬又越黎越明顯，決定執過。本來想唔郁缸魚，點知一郁舊石就有泥粉浮起遮住晒。將魚連埋缸水，移過裝隔夜水既膠筒暫住。唔要迷你小水榕，再剪紅頭趴趴熊既頂芽種過

裝滿水就開濾桶，仲過左幾次水想溝稀水中既泥粉。到諗起唔可以直接泵水喉水入桶，個缸已經一片灰矇。換綿都冇用，似係濾桶內既細菌被水喉水既氯氣毒死，再流入魚缸令水變矇

針對紅色草，買左支 ADA step 2 當鐵肥用，但起碼要等缸水清返先。換埋用左幾年既生物環，買唔返舊裝 fluval biomax，轉用 mr aqua。臨熄燈前落左支 prodibio 既 biodigest，第一次用細菌水，應該好過從無到有咁搞返生物過濾

week 5

2011-04-01T00:25:00.003+08:00

矮柳生得慢，紅針葉皇冠有轉紅色，係唔夠地方伸展，同美國鳳尾苔之間條分界又太明顯，乾脆換晒做紅頭趴趴熊。紅頭趴趴熊生得算快，有趴地但個頂唔紅。吐血穀精越縮越細粒，就快俾鳳尾苔遮晒

一直種唔好紅色草，最可能係唔夠光。諗過加多支光管，係怕夏天唔夠位裝風扇。最後將兩支 11w 換做 18w，舊果兩支留返影相果陣當打燈

換缸後多左批小動物，因為新呢批草夾雜左好多蛋。淨係蝸牛都吸走左幾十隻，仲見到有幾隻透明殼似係鮑魚螺既野、岩岩孵化既蝦仔、同懷疑係女王燈既蛋

week 2

2011-03-06T22:17:00.001+08:00

剪左紅頭趴趴熊既頂芽，想刺激側芽生長。紅色草始終唔夠紅，由今個禮拜開始加 ECA，再冇進展，就諗下裝多支 11w PL 管。宜家 31L 水配兩支 11w ，似乎唔夠光

week 1

2011-02-28T23:56:00.003+08:00

各種草開始發芽，連半死既紅針葉皇冠都長淺紅色既新葉。加左棵吐血穀精，初時仲有些少紅色，宜家似迷你牛毛毯。棵草差唔多要成百蚊，預左係非常難種，同埋長得非常慢。仲剪短鋼網，騰出空間種佢，以免俾迷你小水榕遮住

day 1

2011-02-22T00:53:00.004+08:00

仍然係四條翡翠燈、四條紅衣夢幻旗同三條女王燈。紅水晶死剩一隻，連埋兩隻極火蝦、三隻大和藻蝦同六隻角螺搬過新缸。諗過暫時唔要蝦，以保護紅針葉皇冠，但萬一有黑毛藻就好難收拾。迷你小水榕唔多襯其他草，諗緊試迷你椒草抑或吐血穀精

搬缸

2011-02-21T17:47:00.006+08:00

買多左塊山谷石，舊缸果三塊就堆晌右邊。ADA 幼黑泥斷貨，被迫用普通裝。種草前插三枝 multi bottom，打算泵更多 CO2 同加 ECA，希望種到紅色草

前排鋪美國鳳尾苔。應該留多少少虛位，準備日後成塊撬起剪草。唔撬起塊鋼網好難剪。右邊鋪矮柳，左邊鋪紅針葉皇冠。舊缸既皇冠草奄奄一息，買多兩束新既，冇鳳尾苔遮住應該種到。石罅種返迷你小水榕，旁邊插迷你牛毛毯，後排係紅頭趴趴熊

準備搬缸

2011-02-16T00:55:00.006+08:00

晌鳳尾苔草坪中間掘個窿種紅針葉皇冠，證明行唔通。皇冠草好快枯，新芽俾鳳尾苔淹沒就長唔高，未必關 CO2 同肥料既事。與其撬起草皮大執，不如換缸再鋪過。自此就冇理個缸，支 CO2 冇晒氣亦冇拎去叉，幾個月淨係換水，好快生晒青苔，連鳳尾苔都枯，得迷你小水榕生得好

個氣樽用左四年，漏氣後要塞住錶頭先勉強用到，乾脆換一支。1 kg 氣樽雙錶頭連電磁閥，要九百幾

week 14

2010-10-03T01:38:00.000+08:00

將貼住玻璃既紅針葉皇冠剪走晒，後排冇咁凌亂。鳳尾苔長高後開始淹沒皇冠草。自從將兩支光管向後移，皇冠草既嫩葉變得鮮紅，但葉片好短，枯萎後亦好少新葉。皇冠草生得矮應該反映照明充足，自絲藻消失後已經加返液肥，CO2 睇落都夠，唔知又出咩問題

有隻大和藻蝦晌竟然抱卵。第一次養到呢種蝦生蛋，可惜蝦苗要用海水養，晌呢個淡水缸註定會死。早排買果兩隻極火蝦以為踢左蛋，居然見到兩隻蝦仔匿晌草叢。有草叢掩護好難見到佢地，不過咁先避過燈魚既追殺

week 10

2010-09-05T22:42:00.001+08:00

上個禮拜清理晒絲藻之後，黑毛藻就由不鏽鋼入水花籃蔓延到草皮。已經刮乾淨個花籃，生左藻既鳳尾苔同紅針葉皇冠都剪埋，剩低就靠大和藻蝦去食。後排既紅針葉皇冠生得密左，但葉片好短，俾紅鼻蝦啃過既草仲未恢復返。生得太前既走莖會剪走。剩低果條小精靈死埋

week 9

2010-08-29T02:30:00.000+08:00

俾絲藻困擾左個幾月，乾脆人手去執。用鉗扯走既藻卷埋有一蚊銀咁大，剩低既碎屑俾大和藻蝦食埋，草皮冇晒絲藻，得返好少黑毛藻。撈走左兩隻太大既大和藻蝦，剩返五隻細既。暫時唔覺佢地食紅針葉皇冠，留返四五隻蝦守住，應該控制到絲藻

舊缸孵出黎果三隻極火蝦一直冇生蛋，蝦頭有膏，懷疑都係母蝦。本來想買公蝦返黎配種，但買左三隻抱卵既雌蝦。有一隻晌放入魚缸既時候捏傷左，死埋。另外兩隻好似踢卵，即係要再買過

死左條小精靈，買返條蜜蜂小精靈 parotocinclus sp。一放落缸就有兩隻大和藻蝦撲埋去，趕走佢地之後仲陸續有蝦想偷襲佢，連紅水晶蝦都有份，最後都係撈走。條魚同紅水晶蝦差唔多大，試過養更細條既魚，都冇比蝦食。可能因為呢條魚太細又趴晌地，對蝦黎講太易捉

week 8

2010-08-22T03:36:00.004+08:00

介紹紅鼻蝦既網頁都話佢地冇藻食先會食草。養左成個禮拜，絲藻唔覺得少左，反而見佢地趴晌棵草係咁啃。撈走一隻，轉頭見另一隻去食，幾乎每一棵都有葉被咬斷。自從開十二個鍾頭燈，紅針葉皇冠既顏色就鮮艷返。唯有撈走剩低既紅鼻蝦，免得半途而廢

見紅鼻蝦冇乜貢獻，早已經買包大和藻蝦搏一搏。養幾日唔見佢地食草，再買一包。兩包八隻，死左一隻。當初為左紅針葉皇冠，延長開燈時間同加液肥，又撈走晒大和藻蝦。會爆藻都預左，停液肥同每日換水都救唔返。紅肚鉛筆食過魚糧就唔食藻，而紅鼻蝦又唔掂，到頭來要搵返大和藻蝦。希望咁多絲藻會令佢地放過皇冠草

石紋匙指蝦跳缸，買返一隻，呢隻冇咁鍾意匿埋

week 7

2010-08-15T03:24:00.002+08:00

個缸目前有黑毛藻，絲藻同綠點藻。黑毛藻唔算多，綠點藻生晌玻璃可以人手刮，係絲藻要靠魚蝦去食。紅肚鉛筆食過魚糧就唔肯食藻，要顧及其他魚唔夠能一餐都唔餵。條雌魚間中會搣絲藻黎食，食一陣就俾兩條雄魚啄。用鉛筆清絲藻行唔通，如果要撈走，首先係兩條雄魚

有隻紅鼻蝦失蹤，買返五隻，轉頭又唔見左一隻，剩返五隻。佢地唔會匿埋，日以繼夜咁搵食，但未知係咪食緊絲藻。絲藻已經覆蓋晒成個缸底，再等多幾日，紅鼻蝦都唔掂就要買返大和藻蝦，搏佢地食晒藻先食皇冠草

將生得太迫既紅針葉皇冠拔起種過，再剪走唔夠紅既舊葉。早兩個禮拜唔覺意將舊石移左位，推高左半吋左右

紅鼻蝦

2010-08-11T14:22:00.003+08:00

尋晚買左三隻紅鼻蝦，聽講會食藻，唔會食草。07 同 08 年都養過，好短命。今朝已經見到有隻蝦乾晌檯面，剩低兩隻能夠捱多幾日既話就再添幾隻，想用佢取代大和藻蝦。終於見返隻石紋匙指蝦，失蹤幾日以為佢死左

week 6

2010-08-09T01:09:00.005+08:00

紅針葉皇冠既走莖生得好快，有幾條捐落鋼網下面屈埋左，要鉗返上黎。仲有條既根唔掂地，剪左重新插晌魚缸中間。換水時郁到迷你小水榕，成棵浮起左，原來佢既根一直冇抓實舊石，要壓住先固定到晌石罅

餵少一餐先迫到紅肚鉛筆做野。除左絲藻，宜家仲多埋黑毛藻，得三條鉛筆食唔晒，又怕大和藻蝦食紅針葉皇冠。洗濾桶同買左兩條小精靈頂住先

買左隻石紋匙指蝦 atyoida pilipes。兩三年前養過，成日匿晌膠喉後面，都養得唔耐。今次呢隻直情失左蹤，匿晌石罅，熄燈先浦頭，怕佢死晌個窿入面冇人知

褪色

2010-08-06T11:52:00.011+08:00

種左一個禮拜，紅針葉皇冠頹左好多。棗紅色既葉片變得暗啞，仲有絲藻滋生。好在走莖仲有發芽，新葉呈淺紅色。希望只係未生根，而唔係唔夠光。靠右邊果棵離光源最遠，亦係最霉，晌暖管陰影下面既新芽已經變左綠色

冇位擺多支光管，要善用手上資源。以前將橫流扇擺兩盞燈中間，拉開左兩盞燈，亦遮左少少光。試下將風扇放晌最外，兩盞燈靠後，橫掂前排既鳳尾苔都唔需要咁強光。呢款燈既專用 PL 管終於返貨，買左兩支，免得將來燒左配唔返

想靠紅肚鉛筆食絲藻，點知佢地食過魚糧就懶散晒。本來早晚各餵一餐，近兩日只餵一餐，見佢地食返絲藻，但咁會連累其他魚。果六隻蝦成日匿埋晒，諗緊應該買蝦、小精靈抑或紅肚鉛筆去打掃草坪

week 5

2010-08-01T02:16:00.006+08:00

有隻極火蝦跳缸，死剩三隻。揭鋼網換草，順便加泥鋪返個斜坡。自從買左紅衣夢幻旗，幾隻蝦為左求生就晌草皮下面掘隧道，扒左好多泥出黎

紅針葉皇冠係揀有走莖既先買，種幾日已經長新芽。有兩條走莖本來向前生，為左晌後排種草叢，要揭起鋼網將棵草扭向後。再生多幾條走莖，就將原本呢四棵過高既葉剪走

皇冠草生得快，要成日剪。當初揀鳳尾苔砌草皮係貪佢唔使點打理，本來唔應該揀生得咁快既草，但紅色前景草冇幾多款，首先剔走迷你紅菊。吐血穀精得個底會紅，價錢貴，又難種

下次會試紅頭趴趴熊。晌 10/2006 挑戰過，當時唔夠強光，既唔紅又唔趴地。換缸果陣有諗過，但晌魚街既紅頭趴趴熊都霉霉地，只晌台灣網頁見過種得靚既

紅肚鉛筆

2010-07-31T04:35:00.001+08:00

兩年前見識過大和藻蝦點食紅針葉皇冠，今次將四隻大和藻蝦撈走先，絲藻就交俾三條紅肚鉛筆去對付。揀左兩條公一條母。公魚比母魚靚，但買三條公太單調。晌零七年養過兩條母魚，顏色唔靚，齋食紅虫又唔食藻，冇幾耐就撈去另一個缸，呢三條就勤力得多。草坪既絲藻俾果三隻大蝦掃左唔少，不過剩低既夠佢地有排食

紅針葉皇冠

2010-07-31T04:02:00.006+08:00

每支三十蚊，買左四支。皇冠草唔可以好似迷你紅菊咁打橫綁，有個網阻住又唔能夠直接插入泥。先晌草皮上開個窿，然後用鉗夾住草根穿過網眼，再鋪返好。鋪草坪之前塞左三條 ADA multi-bottom。雖然聽講太多肥料會令紅針葉皇冠長得太高，但草坪生密左唔會再揭起，到時要單靠液肥

早晌 04/2007 就挑戰過紅針葉皇冠。種左兩個幾月冇枯，仲一直有走莖繁殖，只係紅色甩晒，變左普通既針葉皇冠。宜家既設備比當時好，唔擔心會呢四棵會枯，係怕又種到甩色。睇過幾篇台灣網友對於紅色水草褪色既解釋，今次會從照明著手，用強光提高「花青素」同「類胡蘿蔔素」相對於「葉綠素」既比例，令針葉皇冠變紅

個缸約 30L 水，扣除泥底深度少過 30cm。兩支 11W PL 管共 22W，以 0.6W 配 1L 既比例，照明係夠，可能係時間唔夠。一向用時間掣晌 13:00 - 23:00 開關燈，得十個鍾頭。宜家會晌 12:00 - 24:00 開十二個鍾頭燈

迷你紅菊

2010-07-30T04:27:00.005+08:00

由上圖既紫紅色，慢慢變成啡黃色。頭兩個禮拜有發芽，周末落完 ECA 後反而有新芽變白。後來有幾束中段枯萎斷開，右邊果兩束仲慢慢被長高既鳳尾苔淹沒

上網摷所謂「迷你紅菊」，搵到既只係普通紅菊 red cabomba，不過佢較細棵同會趴地，唔似同一種草。連名都唔知，當係一般紅色草咁種。睇左唔少網頁，對於紅色草變綠既原因眾說紛紜

照計肥料係有多冇少，但就算因為過多氮肥令水草唔紅，都唔應該死。自從裝左橫流扇就冇熱過廿七度，唔似係水溫問題，亦唔似係 CO2，最有可能係唔夠光

其實魚街個缸又唔算強光，用兩支 11W PL 管應該夠，但支光管唔夠長，光源本來就偏向左邊而唔係正上方。把風扇裝左晌兩支管中間，加上右邊舊大石，再遮左部份光，結果右排既迷你紅菊枯得最快

越種越唔似樣，唯有放棄。應該影返張遺照，可惜已經丟晒，換做四棵紅針葉皇冠

week 4

2010-07-24T04:27:00.007+08:00

迷你紅菊冇起色，仲少左發芽。呢兩支 11W PL 管照計夠光，CO2 亦應該夠。最初以為係紅菊既根穿唔過鳳尾苔，種唔到入泥，不過揭起中間塊細鋼網睇過又發覺唔係，可能係肥料問題

聽講紅色草晌缺氮肥既環境會更紅。換缸果陣插左三支 ADA multi bottom 晌後排，每星期又有加 ECA，唔知係咪肥料太多。就算係，都冇乜可能掘返果三支棍仔出黎。幾年黎試過六、七款紅色草，得紅海帶同紅蛋叫做種到，可惜太大棵

有條紅衣夢幻旗失左蹤，得返九條魚。極火蝦大隻左，唔再怕夢幻旗。幾日冇理個缸，草皮生左好多絲藻。死剩一隻大和藻蝦又成日匿晌暖管後面，就算佢肯出黎都食唔晒。買多左三隻蝦，其實唔應該買咁大隻

week 2

2010-07-12T01:52:00.003+08:00

鳳尾苔同迷你水榕長高左，迷你紅菊變黃晒，只有新芽仲係紅色。可能因為未生到根，得幾束既根穿過到鳳尾苔入左泥。角落頭果束被暖管遮住，冇發芽，已經將佢移離陰影。仍然有落 ECA，暫時有幾支新芽變白

連紅水晶同大和藻蝦都匿埋晒，晌石罅掘左條坑，熄燈後就出返黎，原來仲死剩果四隻極火蝦

week 1

2010-07-05T23:12:00.004+08:00

有條翡翠燈跳左缸，買左五條紅衣夢幻旗 red phantom tetra。晌魚鋪見過全身通紅背鰭好長既，亦有淺粉紅色背鰭短既，唔知係咪品種唔同。暫時呢五條顏色唔算深，背鰭尖而長既得一條，應該係雄魚。而其餘三條背鰭短而圓，尖端有白色既係雌魚。仲有一條背鰭唔尖，但冇白色，未知性別。佢地經常豎起魚旗互相追逐，同翡翠燈冇咩互動

加魚既代價成缸蝦仔幾乎死晒。買果時冇諗到，當晚見果五條魚追捕蝦仔先發覺唔妥。翡翠燈唔食蝦仔，所以會生到四、五十隻。紅衣夢幻旗仲細條，吞唔落但會啄死隻蝦。頭兩日仲見到蝦仔伏屍晌草堆，三幾隻未死既就匿晌石罅。以往成個草坪都係蝦仔，宜家得返紅水晶同大和藻蝦

未夠一個禮拜，棵噴泉太陽既葉就穿晒窿同斷開，比想象中難種，唯有換一棵迷你水榕再試過。水榕可以唔種落泥就咁攝晌石罅，係怕有半棵受強光唔知會點。洗濾桶同加左 12 滴 ADA ECA，落完鐵肥之後，迷你紅菊既新芽反而變白同枯萎

day 1

2010-06-28T00:51:00.012+08:00

唔要火焰莫絲，鳳尾苔拆散鋪過。攝左一支噴泉太陽晌石罅。晌果個陰影位未必種到，唔得就換。舊缸既珊瑚莫絲本來想留返，可惜一拆落黎就散晒

晌中後排綁多八支迷你紅菊，每支十八蚊長短不一。夠光就會打橫生，呈紫紅色。晌鋪頭係插晌泥種既，不過冇把握種到，貿然晌鋼網剪咁多個窿太冒險。佢會莖節度生根，照計唔使插入泥都長到。晌綁左鳳尾苔既鋼網上面試下再綁一束迷你紅菊，冇繞實，盡量唔妨礙佢發芽。用佢中文名晌網上摷到既都唔係咁既草，冇學名好難搵資料，要靠估

晌後排插左三支 ADA 既 multi bottom。呢樽野買左近三年用得一兩次。今次種紅色草要用鐵肥，有 iron bottom 會更好。液肥想用 ADA 既 ECA，嫌貴。Tetra 既 FloraPride Red 係次選，但買唔到。最後都係買 ECA，八十五蚊，每 5L 水一星期落兩滴

搬左六條翡翠燈、三隻紅水晶蝦、十零隻極火蝦、一隻大和藻蝦同五隻角螺去新缸。最初果四隻大既極火蝦失晒蹤，似死左好耐。經過第一代既篩選，佢地既後裔冇咩雜色。留返十零隻足夠維持，其餘四十幾隻送俾人

換燈

2010-06-28T00:50:00.003+08:00

換缸當日其中一支光管燒左，換上另一支仍然開唔著。似係燒埋火牛，用半年就成支報銷好唔襟用。想買返支同款既，冇貨。後來竟然搵到五年前用果款夾燈，同樣係 11w PL 管，乾脆兩支換晒。支光管多左一層防水膠邊，所以唔能夠配返一般既 PL 管。想買多一支專用光管做士啤，但未返貨

比舊果款夾燈光好多，首先支光管係新，而且支光管冇俾個燈罩笠住。雖然盞燈唔夠長擺唔到正中間，好在夠光。一直覺得呢個款式最簡單同好用，失蹤左幾年終於搵返

換缸

2010-06-28T00:46:00.003+08:00

鋼網唔夠用，去左新填地街買多一呎。照住紙樣剪鋼網，邊位盡量唔留空隙，係石罅冇辦法。今次後排鋪成中間凹陷，用比以往細塊既鋼網，貼住個斜坡去鋪

新買果兩舊山谷石係淺色少少，浸完水慢慢會深色返

week 32

2010-06-21T11:39:00.007+08:00

三個月冇更新，除左按時餵魚同換水就冇理個缸，上個禮拜先洗濾桶，超污漕，palm net 溶左好多。換返山谷石就唔使用，乾脆拎走晒

一月初捉到條虫，最近發現原來仲有，但草坪太厚好難捉。橫掂都換缸，由得佢。翡翠燈剩返六條，紅水晶蝦三隻，極火蝦一堆。缸草太密，數唔到

買左 ISTA 既橫流扇。上年新出果陣仲用緊 12 吋方缸，用唔著。換缸之後把舊風扇太細，換左呢把加長型既，要二百四十。都幾嘈同阻定，勉強塞左晌兩盞燈中間。固定把扇既膠夾有問題，水會經過夾滲出魚缸，剪開左個膠吸盤攝入去，要隔開個夾同塊玻璃。有得擰出風口較角度，但咁樣擺只可以由上往下吹。把扇冇開關掣，插左電線就開。駁埋時間掣就唔夠位插，要加個拖板

三月初買左舊山谷石，再扑碎左之前果舊，上星期買多三舊細石，用左其中一舊砌成宜家咁。不鏽鋼網用得七七八八，買多一呎，夠用幾年

week 18

2010-03-14T21:41:00.002+08:00

買左一包四隻細既大和藻蝦，兩隻跳走左。自從養返大和藻蝦，絲藻就唔見晒。紅水晶蝦一直冇生蛋，火焰蝦就生左第二批。後排既火焰莫絲長高晒，但呢期冇加液肥，CO2 都用少左

差唔多兩個月冇更新，終於買左舊山谷石，準備換缸。新缸會用返美國鳳尾苔，想試多次種趴地紅 Rotala sp. Goias。到時要諗下點安置宜家呢幾舊大石，丟左好浪費，拎上網賣又煩

week 11

2010-01-25T00:00:00.004+08:00

又搵到古怪野，今次係絲藻。開頭仲以為係濾綿纖維，比頭髮仲幼，唔係長得太高隨水飄揚都睇佢唔到。可能因為每日加液肥又冇大和藻蝦，營養過剩益晒佢地。見到既都拔走晒，暫停左液肥先

呢兩包火焰莫絲好似撈左好多雜物，意外收獲係搵到一少撮珊瑚莫絲。兩年前種過失敗左已經唔敢試，估唔到今次呢一束好似生得仲快過美國鳳尾苔。經過兩星期，攝晌石罅既鳳尾苔個別發展，唔受光照既似係枯左，有幾塊碎屑晌石面上落腳，居然冇跌落黎仲有發芽

買左三隻紅水晶蝦。幾年前見到已經想養，太貴，直到最近先平少少，值得買黎試。最好梗係生蛋，不過遺傳唔到父母紅白分明既顏色都冇意思。留返十零隻極火蝦繼續養

不知不覺缸翡翠燈得返九條。晌地下只係搵過一條魚乾，其餘三條就咁蒸發左。睇中一種類似紅衣夢幻旗既不知名燈魚，可惜冇貨

week 9

2010-01-11T00:02:00.002+08:00

拆走夾晌石上面既鋼網，將鳳尾苔就咁攝入石罅。比預期簡單，用牙籤篤入去已經掂，無需魚絲固定。冇買到寬葉鹿角苔，因為唔多滿意宜家個缸，唔想再揼錢。個缸太細，用呢種石砌唔到心目中既造型。可能會換返山谷石，要等長期假先搞

水面成日有層油膜，唔似係液肥既問題，洗完濾桶應該有改善，順便加多塊 palm net。又撈走左十零隻唔夠紅既蝦仔，仲剩返十隻左右，好在果四隻大蝦冇再生蛋。太易繁殖都好煩，諗緊換紅水晶蝦試下

餵完紅虫駭然發現有條不知名既虫晌草坪上蠕動，有成隻蝦咁長，驟眼睇以為係渦虫。條虫會四圍捐用網撈唔到，仲識游水，最後用膠管捉出黎。希望只係得佢一條

week 8

2010-01-03T03:06:00.003+08:00

用左幾年既溫度計冇電，乾脆買個同款新既。火焰莫絲明顯長高左，生得幾均勻，唔似以前咁一束束分開晒，將鋼網拆出黎綁過算係值得

幾塊石上既美國鳳尾苔生密左，但唔似會做到預期效果。魚街個陳列缸晌石罅擺左幾種草，除左鳳尾苔，起碼仲有珊瑚莫絲同寬葉鹿角苔。睇唔出用咩固定，似係就咁攝晌石罅入面。咁照計好易被蝦扯出黎，換水亦會沖散，唔知有咩竅門，可能因為果度既石大好多，條罅夠深可以攝得好穩

諗緊拆走幾塊夾晌石邊既美國鳳尾苔，再買寬葉鹿角苔，試下攝入石罅，必要時用魚絲套住舊石。珊瑚莫絲就算喇

week 6

2009-12-22T00:52:00.004+08:00

前排既鳳尾苔草坪有雜草，似係珍珠三角莫絲同火焰莫絲。除草之後有個細窿，要等鳳尾苔慢慢遮返

week 5

2009-12-15T00:11:00.005+08:00

石罅果片柳樹莫絲生得慢就預左，但晌其他位置冇遮擋既都好稀疏。懷疑兩隻大和藻蝦偷食，將佢地撈出廳，仲以為保得住新買既草。轉頭就發現極火蝦都有份，幾隻蝦係咁刨，冇幾耐已經食剩條莖

咁始終都係種唔到，除非完全唔養蝦。唯有換走所有柳樹莫絲，鳳尾苔同火焰莫絲各買一包，將後排既草重新綁過。今次綁得比上次密，希望火焰莫絲唔會生得咁散

開始淘汰太淺色既蝦仔。撈走十零隻，仲剩返廿幾隻，夭折率好低，比紅虫仲細既蝦毛晌水中游過都冇魚食

week 4

2009-12-07T22:28:00.005+08:00

換左個不鏽鋼入水花籃，免得太多草屑被吸入濾桶。入水膠喉太長，要鋸短半吋左右

買左兩包共六隻極火蝦，死左兩隻，其中一隻被抹玻璃既百潔布撞死。有一隻買返黎已經抱卵，養左幾日開始見到蝦仔，起碼廿隻。以前養藍蝦都試過孵到，但唔係被魚食就吸左入濾桶。新花籃既孔夠細可以隔開蝦仔，而翡翠燈又奇怪冇食佢地。冇左魚同濾桶兩個天敵，應該有部份養得大，到時就揀蝦身夠紅既繼續養

中間同右邊石罅兩片柳樹莫絲，本來已經俾塊石擋左唔少光，仲成日被蝦扒起既泥遮住，長得好慢，有好多枯左，乾脆買多包草綁過。順便將撐住左邊大石既膠格仔起出黎剪短，更容易收埋。最後加少少泥補返沖散左既斜坡

再度過 pH 都係約 7.0。palm net 有時會令缸水稍為變黃，暫時唔敢拎走。好在除左受唔到光果兩片柳樹莫絲，其他草既進度都仲可以

week 2

2009-11-25T01:05:00.005+08:00

鋪完草皮先發覺魚絲綁得唔夠密，懶得起出黎再整。除左石罅之間果片柳樹莫絲，其他草都開始長高，連後排既火焰莫絲都明顯高左。中間果片鋼網受既光少，都預左會長得慢，好在有發芽，證明未枯

斜坡既泥慢慢移位，隔一兩日要吸走。等草生密左先加泥，遮返不鏽鋼網既邊

隻藍網球蝦失蹤幾日仲以為死左，原來藏晌右邊既石罅。佢仲掘左個窿打通兩舊石之間，搞到塊柳樹莫絲成日俾泥蓋住

廿一度

2009-11-17T23:59:00.002+08:00

凍左幾日，室外十二、三度，支 50w 暖管長開，個缸都係等廿一度。最好係維持晌廿四、五度，證明支暖管唔夠力，不過都冇幾可咁凍

pH test

2009-11-16T00:41:00.003+08:00

兩年前用青龍石，有定期檢查 pH。自從換左 ADA 山谷石就冇再理過，一直維持晌 6.5 左右。怕呢款石會令缸水變鹼，已經晌濾桶攝左三片 palm net。頭幾日缸水有稍為變黃，之後已經清返

摷返套年幾冇用 hagen tester 出黎，驗到 pH 7.0，GH 60mg/L，KH 30mg/L。GH 同 KH 唔算高，pH 差少少。理想係 6.5 左右既弱酸性，維持到 7.0 咁養燈魚應該仲可以既

換燈

2009-11-16T00:40:00.005+08:00

睇過好多款燈，夾燈多數用金屬條包膠或者包鋁做支架，魚鋪既陳列品唔係鬆就係生緊鏽。16 吋缸既燈座都係可掀式，仲有款係用機械臂，入面咪又係得支 PL 管，只係貴、重同阻地方

揀左呢款夾燈，同舊缸用既燈座既一樣，11W PL 管。離水面較高，換水唔使拆走，代價係較易漏光。裝好左先發覺支光管稍為偏右，都冇更好選擇。五年前用既夾燈本來更好，個膠架設計更簡單，可惜已經買唔返

week 1

2009-11-15T18:43:00.006+08:00

似乎魚、蝦同螺都適應到新缸。宜家有十一條翡翠燈，可以諗下養幾條其他魚

草就要慢慢黎喇，尤其係後排既火焰莫絲，同夾晌石上果幾片美國鳳尾苔。等個零月，火焰莫絲都係冇動靜既就會起晒後排既鋼網再鋪過

準備搬魚

2009-11-10T12:40:00.004+08:00

割傷手指拖慢左換缸進度，到尋晚先終於鋪草皮。晌火焰莫絲同鳳尾苔之間放左柳樹莫絲，用鋼網將幾片鳳尾苔夾晌石上面。魚鋪既做法應該係用將莫絲攝晌石罅，但呢幾舊石太細

揀到款 11w PL 夾燈，最快要呢個星期先返貨，暫時用兩支舊燈頂住先。拎左支 CO2 去叉氣，今次冇叉得咁滿，對上一次叉氣好似唔止一年前

駁氣擺一日，然後搬魚同蝦，駁埋濾桶同暖管。跟住買燈，再用紙皮做返個遮光罩。下一步係洗濾桶同加返 palm net

換魚缸

2009-10-27T00:48:00.006+08:00

晌零七年四月由 16x10x11 既彎角缸換成 12x12x12 既方缸，用左兩年幾，晌佈置上一直遇到好多限制。始終方缸唔係主流，晌網上同雜誌既魚缸相全部都係長方形缸。今年四月換美國鳳尾苔同火焰莫絲，本來幾大期望，可惜火焰莫絲至今都種唔到應有既形狀，好在美國鳳尾苔做到預期效果。方缸玩到意興闌珊，決定換返個 16x10x12 既方角缸，容量約 31L

擺得落細缸既山谷石，通常都係果幾個形狀，今次想換款。有魚鋪晌個三尺缸用左一種比較新款既景觀石，用好多舊加上墊底，砌成一個凹形既山。要七十蚊磅比山谷石貴得多，買左五舊試下，最後用左四舊。老闆話仲會令缸水變鹼，咁幾年前用青龍石果陣剩低既 palm net 係時候拎返出黎。唔想用石頭做墊底，買左塊膠格仔板，當係椿咁插入泥，晌上面放舊石就比較穩

eheim 2211 同支 hydro 暖管應付 31L 水綽綽有餘，兩支 11w PL 管因為尺寸就唔岩，要換，但行勻魚街仲未搵到岩心水既款式。前排會用返美國鳳尾苔，後排想試多次火焰莫絲，或者換另一種莫絲

本來早已經買左魚缸、泥、石同紙皮，不過兩個禮拜前界紙皮果陣意外界到手指，要入醫院包紮。包住膠布唔方便做野，唯有暫時用舊魚缸駁埋氣泵養住缸魚同草先

week 24

2009-09-27T23:50:00.002+08:00

兩個幾月冇更新，缸草生得太慢，冇咩好紀錄。經過半年，火焰莫絲一直冇長高，珍珠三角莫絲亦唔夠厚，做唔到高中低既效果。得美國鳳尾苔算係成功，綁晌鋼網都生到，長得慢而且矮，唔使剪

藍網球蝦死剩一隻，而大和藻蝦死剩兩隻，本來想再買三隻，但最後買左袋裝既蘇拉威西白襪蝦。一袋兩隻，唔覺大和藻蝦同翡翠燈有襲擊佢地，佢地冇刻意匿埋，但太細隻成日被莫絲遮住，影唔到

部新相機一直唔識用，影到好矇，或者會換

wk 13

2009-07-14T11:47:00.004+08:00

某日晌檯面有條魚乾，數下缸魚先發覺少左四條。晌地下再搵到一條，仲有兩條下落不明。買返三條，新舊魚既顏色有明顯分別。新買既魚身呈螢光綠色，而舊魚係翠綠色既，似乎係養定左會轉色。魚鋪個缸入面有好幾條魚生左啡色既瘡，買返黎呢三條希望冇傳染到

仲買左兩隻藍網球蝦，價錢比上次買平成百蚊。揀左兩隻細既，夜晚落水，第二朝已經晌出水位開始搵食。新濾桶水流稍為快，將閘掣收細左少少

week 11

2009-06-28T23:13:00.004+08:00

卒之買左新濾桶。晌 eheim 2211 同 eden 511 之間猶疑左好耐，價錢差二百幾，最後都係買多個 2211，用慣左。新 2211 比舊既貴二百蚊，設計一樣，係多左兩個閘制同一年保養。本來話可以拎個舊既去檢查，但換零件郁下都百幾蚊，又唔肯定係邊度壞

拆開舊濾桶果陣跌爛左個摩打既邊，晌防水膠圈既下面，唔知再用返會唔會漏水，暫時洗乾淨收埋。新濾桶好靜，哄埋去都聽唔到摩打聲

火焰莫絲種極都係咁，只係密左但冇向上生。新相機仲未識用，連缸草都影得唔清楚

week 9

2009-06-16T23:34:00.002+08:00

青苔生得太快，火焰莫絲冇乜郁動，乾脆停左液肥。部新機用左個零禮拜，魚缸前面始終對焦唔到

大概半年前開始濾桶間中有水聲，拆開大洗。買左條毛刷，將成個桶同條喉逐樣拆出黎捽。洗完之後水流快左，但仲係間中有雜聲，將來變得更嘈就要換。兩年前得 eheim 2211 岩用，宜家多左 eden 511 可以揀

week 8

2009-06-10T23:57:00.004+08:00

搞成兩個月，火焰莫絲生得密左但冇高到。呢排落既液肥益晒玻璃上既青苔，生得好快，要隔日刮。因為水流慢左，隻 atyodia 冇以前既網球蝦咁快搵到位落腳，係間中見佢企雨淋管上面，好在佢會晌草地執野食唔易餓死

換左部相機，未識用。翡翠燈游得太快，要影得清楚缸魚咁背景就會曚，唔可以兼顧

week 7

2009-05-31T23:04:00.004+08:00

火焰莫絲幾乎冇長高過，雖然話生得慢都唔應該係咁。有條翡翠燈既尾鰭崩左，唔多食乾糧但會食紅虫，肯食野就慢慢會復原

自從將雨淋管扭向前，餵魚糧好快沖左落底，唔會慢慢沉，令食剩既多左。早兩日熄濾桶餵魚，唔記得開返，第二日訓醒先發覺。個濾桶熄左成晚，入面既微生物缺氧太耐，應該死左唔少。就咁開濾桶會灌返入個缸，即刻拆開濾桶洗，換晒綿再開返，好在魚蝦都冇事

買左樽水蚤乾，後來先醒起好似幾年前買過，成樽都係粉末。翡翠燈會搶食，係太碎濕濕好難食乾淨，好易整污漕缸水。後來買到豐年蝦乾，以為會受歡迎但翡翠燈就唔多食。重買左一隻 atyodia 網球蝦

上年最熱果陣個缸有成廿九度幾，今年想維持晌廿八度以下。幾年前見過有人將橫流扇改裝用晌魚缸，上星期終於見到養魚用既橫流扇。有三款，賣二百四十到二百五十。比宜家果把蝸牛扇既風力勁好多，但都幾大舊，勉強夠位裝。加長型同強力型都應該岩用，係嫌太貴

week 6

2009-05-24T00:29:00.004+08:00

將雨淋管後面既窿仔撐大左，令前面既水流冇咁急。經過一個禮拜，螞蟻燈既顏色仲係淡，比睇相差好遠，幾條仲有白點。怕好似琥珀燈咁，養幾個月先發現係買錯左，乾脆撈晒出廳

換左十三條翡翠燈 microrasbora kubotai，同螞蟻燈一樣係最長 2~3cm 既細魚。顏色好翠綠，唔覺有因為受驚而褪色。試下餵少少紅虫同乾糧，有幾條食

week 5

2009-05-18T00:38:00.004+08:00

上星期將幾塊草皮揭起，鋪返一層泥晌底，補返被水沖走左既窿。再將雨淋管扭向前面出水，令新鋪既泥冇咁易被沖起。將八條新燈移出廳既大缸，準備換魚。過左幾日，後排既泥都冇乜移位，但前面既水流好似太急。最後晌雨淋管出既背面鑽左幾個窿仔，令前後既水流更平均

移出廳既新燈過左幾日就開始生白點，到今日卒之死晒。冇諗過死得咁快，廳既缸呢幾日冇乜大動作，新燈晌清缸都應該養到，唔知係咪年紀太大適應唔到

買左十條螞蟻燈 boraras brigittae。晌魚鋪既顏色好淡，又游得好快，買返黎先發覺有幾條身上有白點。養左幾日，唔多食乾糧，暫時餵住剪碎既急凍紅虫。紅虫剪碎左好多時得返個殼，冇乜肉食，次次要剪都麻煩。魚身既紅色到宜家仲係淡，冇網上見到既相咁鮮色。今日見白點嚴重左，聽日應該會加粗鹽

火焰莫絲生得比預期慢好多，聽講要加液肥先種得好。每日落 1ml ADA special shade 試下

week 3

2009-05-04T15:07:00.004+08:00

每日都有少少泥沖左上鋼網上面，唔係有塊網遮住，個斜坡一早散左。以宜家既進度，怕且要等成個月，火焰莫絲先夠高同夠密去擋住水流

山谷石開始有青苔，先停左 special shade，再買一包角螺去食，宜家個缸有八隻螺，一兩日就刮乾淨舊石。未諗到買咩魚，想買返隻藍網球蝦先，但唔覺魚街有返貨。廳既大缸冇晒惡魚，諗緊將新燈搬出去

week 2

2009-04-27T12:57:00.002+08:00

後排斜坡既水流太急，將鋼網下面既泥沖左上黎，隔日就要吸走。好在塊鋼網冇移位，等火焰莫絲生得夠高先揭起鋼網再加泥。火焰莫絲高左少少，比預期生得慢。美國鳳尾苔都有生高，但顏色暗啞。呢個禮拜開始隔日落 1ml ADA special shade，希望唔會生黑毛藻

week 1

2009-04-19T23:04:00.006+08:00

美國鳳尾苔長高左少少，火焰莫絲同珍珠三角冇乜動靜。後排斜坡既泥被沖散左少少，尤其晌不鏽鋼網既接駁位。將雨淋管向上扭，改水流方向再加泥都係固定唔到，應該要等火焰莫絲長高後先可以擋住水流

宜家呢批新燈起碼養左四年，由廿幾條剩返八條。除左有幾條既眼珠變濁，大致上好健康。個缸既容量約 25L，石頭同泥佔左約四份一。有大約 19L 水，仲可以養多十條魚仔。肯定唔會買返新燈，佢地成日晌水底徘徊睇到好悶

幾年前養過既藍眼燈好活潑，係魚缸冇加蓋佢地會成日跳出黎呢下煩。幾年前見過一種個身好長既淺黃色不知名魚仔，可惜一直搵唔返

開缸

2009-04-13T04:14:00.008+08:00

成四個幾月冇更新。自從上年魚街某位老闆提議換另一款草做草皮，就一直想換缸再整。新年假懶得搞，拖到復活節假先郁手，其間幾乎冇打理個缸。珍珠三角算係按比例咁標高，後排既正三角莫絲生到堆亂草咁

本來舊大石點擺都唔岩位，換左舊五磅半既山谷石，要六十蚊磅。兩舊細石用返，只係轉左角度。初時顏色唔多協調，起碼半個月後先會變深色。不鏽鋼網重新剪過，用紙樣砌好晒先開始剪，嵌埋之後冇以往咁多空隙。今次預先用泥遮住鋼網同玻璃之間既罅，否則加左水就好難再執

今次用美國鳳尾苔做草皮，火焰莫絲做後景，兩者之間鋪少少珍珠三角。揀走晒雜草先開始綁，免得好似上次咁撈埋正三角落去。美國鳳尾苔好難綁，要由本來既鋼網拆散晒再鋪過。因為比較貴又唔敢買得多，好在都夠薄薄地鋪一層，碎濕濕咁魚絲要繞得幾密。大概要等半個月先知呢個組合種唔種到

兩隻迷你螯蝦最後都係搬出廳。雖然近來開始有求偶動作，但又唔能夠任由佢地鉗魚。咁細既缸容納唔到佢地

年結

2008-12-29T01:53:00.006+08:00

上年年底試用山谷石、不鏽鋼網加莫絲呢個組合，證明好成功。兩支 11w PL 管好夠用，CO2 其實唔開都應該得，ADA special shade 亦用唔著。前面既草皮平均三個禮拜要修一修，中後排唔使點打理，最麻煩係三角莫絲比珍珠三角生得快，有時搞到個草皮唔齊整。一月會翻缸重新砌過，換過舊石，唔要珍珠三角，用火焰莫絲同鳳尾苔

自從放棄青龍石就少左好多水質問題，可以專心種草同養魚。今年卒之買到葦蘭提飛船，仲親眼睇到生蛋同口孵既過程，可惜咁岩要去旅行冇時間照顧，到返黎已經死剩一條，最後都係養唔到。後來將琥珀燈誤以為火焰燈又買左一堆，一直都養唔好。結果剩返九條養左唔知幾多年既新燈。除左搬去廳被剛果燈咬死果一條之後，好似就冇死過

藍網球蝦養大半年死左，年尾換黎兩隻橙迷你螯蝦，同新橙相處得麻麻

年初換左部 nikon P5100，唔覺有手動對焦，自動對焦又慢，影魚超唔方便。好快會換機，可能係 panasonic lx3

換殼

2008-12-29T01:46:00.003+08:00

隻公蝦換殼之後，左手果然開然重生。細心睇先發覺好多條新燈既魚尾崩左，肯定係被隻公蝦鉗到。從來唔見佢主動捉魚，係缸魚有時游得太近佢先會出手。其實遊開少少就冇事，一直唔明點解呢缸魚咁鍾意貼住個草地游

迷你螯蝦

2008-12-08T22:08:00.006+08:00

成兩個幾月冇更新，太懶。葦蘭提死左，唔打算買返。琥珀燈移走晒，因為似買錯魚。最初買果三條叫火焰燈既，係貴好多，但顏色鮮艷。後來買果十幾條叫琥珀燈既，個樣似一樣，以為係未養定所以顏色淡，點知養左個幾月都冇起色。可能根本係兩種魚，每條貴幾倍真係冇賣錯野

唔記得買左幾鮑魚螺同角螺黎清青苔，大致上都掌握到個用法。鮑魚螺刨晒石上既頑固青苔漬之後死晒，冇再買，換角螺頂上。宜家大概有七隻左右，每舊石上面擺一兩隻就維持到

買左對雙帶橙迷螯，食乾糧同紅虫既，搶野食比大和藻蝦遲鈍得多，勝在有鉗，夠惡，魚蝦都唔敢埋身。本來隻母蝦比公蝦淺色少少，養左幾日匿埋換殼，顏色靚晒。初時佢匿晌草叢，搵極搵唔到仲以為死左。再過兩日輪到隻公蝦匿埋，可能又換殼，但冇為意照換水，第二朝死左。去魚街再搵，得返幾隻，仲要全部甩頭甩骨。照魚鋪老闆教既方法去揀隻公既，不過斷左隻鉗，等換殼後生返。顏色暗啞少少，都係等換殼。下次再見佢匿埋就唔換水

到聖誕長假會大執個缸。之前同某位魚鋪老闆傾過可能點搞，應該會換火焰莫絲同鳳尾苔試下

week 5

2008-09-28T01:44:00.007+08:00

atyoida 卒之死晒，大和藻蝦死剩兩隻。前日見到一截蝦肉，要憑膚色先認到係 atyoida 既殘骸。前幾日買左四隻袋裝既鮑魚螺，返黎已經奄奄一息，好快死左兩隻，下次買應該晌魚缸揀，貴少少都值。晌週末蝦同螺都好呆滯，成日停晌度唔郁，但換左水就突然翻生，仲周圍搵野食，等隻鮑魚螺刨左少少青苔先睇到舊石本來咩色

仲未知係乜野搞到個缸咁，但犧牲左咁多總算有少少頭緒。以往每星期換一次水，通常晌星期六日。換水之後買既蝦同螺都好生猛，越近週末就越易死。睇黎無論係出左咩問題，換水至少係個治標既辦法。今後隔兩日換一次水，睇多一排先

好後悔死左一隻 atyoida 之後冇即刻換水，唔知仲買唔買得返

week 4

2008-09-23T11:45:00.004+08:00

左邊舊細石既顏色太淺，石紋同另外兩舊亦唔協調，換左另一舊尺寸相近既，要剪塊新既不鏽鋼網就返位。上一批大和藻蝦好快死晒，角螺初頭都有刨青苔，舊大石既頂乾淨左好多，但幾日後就冇晒動靜，尋日終於丟晒。再買左四蝦大和藻蝦，死左一隻，未死既狀態睇落幾好，已經有食野。好在最貴果兩隻 atyoida 似乎養到

之前舊石個樣幾可疑，仲以為係佢影響水質令到蝦同螺會死，點知換左都係養唔到。晌幾舊石同膠喉上面既污漬始終要清，仲有黑毛藻添，冇螺始終唔掂

week 2

2008-09-07T02:47:00.003+08:00

兩隻斑馬螺死晒，大和藻蝦死剩一隻，連隻藍網球蝦都死埋。隻蝦由上年十二月尾養到宜家，應該係換缸搞左幾日拖得太耐，適應唔到，佢既死係今次未翻缸既最大教訓。好彩條葦蘭提胃口好返少少，條尾已經復原一半

冇蝦同螺個缸開始污漕，石同膠喉有漬，暖管仲痴左少少黑毛藻。從魚既表現睇唔出缸水有咩問題，唯有洗濾桶。隔左幾日再買四隻大和藻蝦同五隻角螺，今次既角螺唔係打袋而係由魚缸揀，狀態應該幾好，但放左落水成晚仲係冇動靜

有鋪頭返左一批 atyoida，呢種網球蝦只從上年五月後就冇再見過，即刻買兩隻。個缸加唔到蓋，以佢地爬得咁快，似會跳缸自殺

week 1

2008-08-31T11:47:00.004+08:00

葦蘭提飛船成日匿晌暖管後面，仲絕食左幾日，宜家要敲一敲玻璃先間中游出黎食兩三條紅虫，食完又縮返入去，好在佢條尾鰭開始生返埋

除左條葦蘭提，新燈同琥珀燈睇落冇事，但藍網球蝦就唔食野，唔知缸水有咩問題。上星期買左兩包紅鼻蝦，死晒，尋日買既大和藻蝦已經死左隻。早幾日買既虎紋螺同角螺都唔掂，宜家試緊斑馬螺，希望搵到一種養晌泥底都唔會溶殼既

再翻缸

2008-08-23T00:39:00.009+08:00

上星期執完個缸睇落唔多順眼，尤其係中間既大石太闊，前面舊細石太淺色，形狀又唔好睇。本來換舊深色少少，再稍為郁下中間果舊，點知搞到成缸泥水還原唔到，乾脆翻缸再執

近幾次都係執好晒先搬魚，但今次事前冇準備，要移去膠桶暫住。雖然駁晒濾桶氣泵同風扇，用膠桶養始終唔得。養兩日死左一隻大和藻蝦，同三隻螺，包括兩隻新買既太空螺。葦蘭提飛船既尾鰭裂左，應該係撈魚果陣整傷

買左舊大少少既石，執好晒加左水先發覺比原先果舊仲淺色。已經冇精神再搞，希望佢浸得耐會慢慢變色

琥珀燈

2008-08-23T00:20:00.007+08:00

葦蘭提飛船下一批貨起碼要等一兩月，想將條雌魚同剩低果十條新燈搬出廳既大缸，房既細缸養返 2cm 以下既魚仔。買左三條琥珀燈試養幾日，魚身呈半透明鮮橙色，不過每條要廿幾三十蚊好貴。放落缸好快就開口，紅虫乾糧都食。隔兩日死左一條，買返十三條。今次晌另一間鋪買，八蚊條平兩倍有多，但顏色唔靚，多數係半透明灰色，幾條有少少橙色。照計同一個種個樣唔應該爭咁遠，希望係新返既貨，養耐左會靚返。平咁多值得搏

新燈同葦蘭提飛船撈左出廳，新燈即刻俾蝙蝠倉追住啄。新燈養左幾年都有返咁上下大，本來都唔擔心會被人食到，估唔到隔左一陣就有一條被咬死左，兇手仲係晌細缸同新燈同居四個幾月，後來搬左出廳養既剛果燈

剛果燈自從搬左就大得好快，已經比晌細缸果時大左兩倍有多。平時唔見佢地追其他魚，一遇到新燈就咬住唔放。唯有將成批魚撈返入細缸

day 1

2008-08-11T16:11:00.003+08:00

今次翻缸既步驟同以往一樣，係冇再等一個禮拜先洗濾桶，一次過搞埋，暫時冇死傷。會用黑色卡紙搭一個新既遮光罩，舊果個晌冬天整既，冇預到夏天裝完風扇唔岩位

翻缸

2008-08-11T11:14:00.004+08:00

出門前換左次水，之後條雄魚既食量正常返，似乎係嚇到吞左蛋。預左繁殖唔到都唔太失望，當返到香港先知條雄魚跳缸死左。又一次得返條雌魚，唔知幾時先配到一對。新燈剩十條，死左一條。得返三隻角螺，全部既殼都爛爛地，晌缸底仲搵到幾塊碎片，應該係黑泥太酸適應唔到

個缸晌上年十二月尾砌，第一次用山谷石同不鏽鋼網鋪莫絲草皮，宜家睇返幾成功，個零月就做到預期效果。用山谷石亦冇乜手尾跟，唔似青龍石咁會發霉同變色。不過當時買唔到大舊既山谷石，結果前面既石好易被莫絲遮住。今次成組石都按比例大左，本來將舊缸既大石扑碎一分為二，唔成功，得一塊碎片用得返，另外既一大一細兩舊石係新買

用返舊缸既珍珠三角莫絲鋪草皮，最麻煩係度位剪不鏽鋼網，今次晌石罅預先剪個紙樣，咁比較容易就位。將後排既泥堆高左，未加水果時比例幾好，加水之後先覺得中間舊石大左少少

week 25

2008-06-21T18:46:00.006+08:00

葦蘭提飛船生蛋後第四日，雄魚仲含緊蛋，間中匿晌暖管後面。晌第三日開始食返野，每餐食兩三條急凍紅虫，食得好慢同好勉強。照常換水同餵魚，橫掂就黎出門，暫時唔擦玻璃，盡量少騷擾缸魚，免得條魚受驚而吞蛋。佢捱唔到肚餓吞左就算，唔想嚇到佢吞，希望將來仲有機會生

生蛋

2008-06-18T16:58:00.007+08:00

尋日兩條葦蘭提飛船都唔多食野，晌夜晚十點左右，佢地並排游左陣就生蛋。唔係逐粒生，而係一堆咁擠出黎，黎得太突然所以冇拎定相機。生完蛋條雄魚就逐粒執返含住，本來仲有兩粒蛋黏晌咀角，俾條雌魚啄走食左

都好耐冇睇酸鹼度，應該仲係 pH 6.0，KH 20mg/L，開埋風扇約廿七度個缸仲有新燈十一條，大和藻蝦四隻，藍蝦同網球蝦各一隻。比起其他網友玩繁殖既缸，呢個缸唔夠暗，水唔夠凍，pH 亦唔夠低。得珍珠三角莫絲，含住蛋既雄魚又冇地方匿。一直冇預佢地生蛋，環境同水質都唔妥，唔知點解會生，亦唔知點晌唔騷擾條雄魚既同時搬走雌魚、新燈同大和藻蝦

揀呢個時候生，就算佢唔吞返，都要孵十幾廿日。但廿八號就出門，下個月廿三號先返香港。孵到魚仔出黎屋企人都唔識照顧。或者都係照常餵魚，等條雄魚自己吞返，寄望下次再生蛋。真係好可惜

week 24

2008-06-14T17:13:00.005+08:00

葦蘭提雌魚大得好快，已經同雄魚差唔多大。早兩個禮拜條雌魚既行為反常，少左食野，啄條雄魚同游到附近既蝦，個腮仲脹起左少少，有諗過係咪口孵緊魚卵。當時太忙冇時間理，到近幾日佢既身型同行為已經正常返，就算係含緊蛋都已經吞晒。莫絲生得快左，要買把前端屈曲既鉸剪方便剪草。近排又多返蝸牛，但都好耐冇買魚同草，唔知邊度走出黎