七月尾返香港之後就去魚街買左個新缸換走 12x7x7.5 既舊缸，新缸既細節如下：
- 18x9x8 吋，容量 20L，比舊缸大一倍
- 濾水照用返 AZOO，只係換大一個碼，240L/H 既型號
- 濾材就大改動喇，以前係用濾綿加活性碳，今次改用濾綿加生物環。以往試過用生物環，但效果唔好，用左幾日就開始死蝦，好有可能係濾水器太細裝唔夠生物環，唔可以有效進行生物過濾
- 燈照舊同 Takano 既 7W 做裝飾 ( 根本唔係用黎種草既 ... )，呢款燈對舊缸黎講係勁左少少，對新燈既壓力太大 ( 新燈係好弱光既，只係我買唔到岩用既藍色管 )。新缸用佢岩岩好，係怕唔夠光俾草生姐
- 底材照用 ADA 黑泥
- 背景照用黑色咭紙剪出黎，比白色既牆身美觀，而且攝住魚缸同牆身既罅隙，令魚唔會跌入去 ( 養藍眼燈學到既教訓 ... )，而且重可以索水添
- 風扇 ... 拆爛左。臨出門前裝果把玩具風扇都唔知算唔算有效，風力太弱，我都唔信憑佢可以降到溫。新缸重大左咁多添，乾脆乜都唔裝 ... 實驗證明唔裝都維持到晌廿八度左右，呢排我少出街，長開冷氣，個缸就廿五至廿七度，冇乜死魚即係可以接受
- 溫度計換做電子既，舊果支酒精溫度計個膠吸盤用左幾年硬化左，成日跌落黎。忍無可忍換左做電子溫度計，換左先發覺舊果支貼晌缸邊其實係幾篤眼篤鼻。新溫度計既平均度數比以前低一度，唔知係以前果支唔準定係佢唔準喇
- 肥料本來仍然用液肥，但嫌麻煩換左做 tetra 既片裝肥料，唔知效果如何，不過我對 tetra 有信心
- 草仍然係小水蘭，只有佢先可以晌咁既環境都生到個草叢出黎。岩岩加左少少三角莫絲，三十蚊得一小執，好彩唔岩蝦食，否則俾蝦當做宵夜半晚可以食晒
- 魚仍然係新燈，不過多左十條左右，宜家總數應該約廿條 ( 郁得太快，數唔到 )
- 蝦仍然係大和沼蝦，用黎食黑毛藻，係佢先夠大力將黑毛藻扯出黎，而且耐熱，換做蜜蜂同虎紋早排廿七八度已經死晒
- 螺仍然係鮑魚螺，清玻璃不二之選，唯一缺點係要隔三四個月就換，ADA 黑泥既酸性令佢溶殼
圖一：出門前舊缸雜草叢生既樣，同期黑毛藻肆虐，只係勉強靠幾隻蝦壓住，不過晌相度睇唔到
圖二：岩岩起完缸，一片荒蕪。要回復舊觀起碼半年，鬼叫冇位擺燈同 CO2
圖三：最新照片。水比較濛，因為尋日落完 AZOO 內外細菌藥錠做預防。早排有條新燈魚身褪色，動作有少少遲鈍，懷疑係敗血病，經過幾日觀察之後決定要撈起。但呢類群游魚一見到個網就成群四圍竄，而且成群都開始褪色，搞左粒幾鍾先搵到目標並且用兩個網迫佢埋角撈起。好彩個缸細，同埋小水蘭未生得高，否則更加難搞。本來重有條新燈近背鰭有可疑既白色粒狀物，可能係霓虹燈病 ( Neon Disease )，不過病徵唔明顯，晌一群逃竄中既魚當中冇可能分到出黎，唯有暫時唔理佢繼續觀察
