week 16

隔兩日換三分一水，落 5ml nutrafin cycle、1.2ml tropica 液肥、4 滴 ECA

week 15

用黑色咭紙做背景十年有多，第一次換白色珍珠板，個缸感覺光左。死左一條女王燈。細畢加索燈有同大魚群游，有食豐年蝦，未跳缸。迷你椒草溶左大半，買返一包

brownie blue 縮頭，側芽好茂盛。唔知點令營養去返主芽，每星期換兩次三分一水，換水後落新買既 nutrafin cycle 穩定水質

液肥由 ADA step 2 換做 tropica，每星期平均落 3ml，配合 ECA。將 LED 燈調暗做 5/8，較大 CO2

week 14

畢加索燈死剩四條，剛好荃灣有鋪頭返貨，買返六條。比魚街平，但超細條，要餵豐年蝦幼體。冇同大魚群游，六條自己成群

用針筒噴 5ml excel 落山谷石既青苔，每次集中噴一個位，第二日就見效

week 12

兩條畢加索燈跳缸，剩五條，魚街已經冇貨。中上層既群游魚，唔易受驚匿埋，本來好適合細缸，但會跳缸，貴得黎又難買

唔止 brownie blue，連迷你椒草都長得極慢。將 LED dimmer 調光到 6/8，幾乎每日落 ADA step 2

twinstar 對玻璃綠藻既效果好似弱左。今年一月買，反應器出泡係少左，未變黑晒，兩三個月後要換。裝 twinstar 後冇再依賴 excel，但缸邊既藻好難刷甩，直接用針筒落 5ml

week 10

又一條畢加索燈跳缸，剩七條，等再少一條就會買返三條。tetra granules 大粒又硬，沉得勁快，畢加索燈食唔切，餵返 tetra min 薄片好過

兩粒頂芽持續溶葉。自從裝左 TEGARU 水溫唔過 27 度，落 ADA step 2 同 ECA 都冇幫助

week 8

兩條小精靈同一條畢加索燈失蹤，晌檯面搵返一條小精靈魚乾。小精靈有兩條就算，都清唔到山谷石既青苔。畢加索燈開始肯食 tetra min 片裝糧，買到 tetra min granules 就更好

用左 1000ml 水兌 20ml 漂白水浸洗 twinstar 既反應器。新既氣石出泡幼細，應該晌東京買多幾粒。TEGARU 暫時好穩定維持到 26~27 度

仍然冇出新葉，葉邊仲有黑毛藻，呢個星期冇溶葉

ZENSUI TEGARU 水冷

十幾年前開始興用致冷片 DIY 做水冷，後來有現成既機，但唔係冇牌子既山寨機就係太大部。唔識 ZENSUI 呢個牌子，係睇包裝就決定買。仲買左兩粒氣石，冇得免稅加埋兩萬 yen

拆走發泡膠，機身其實好細。配件就係一卷 8/11 軟喉、四個喉箍同兩支 8 轉 12 既轉換頭。eheim 2211 既出水位係 9/12，唔使駁轉換頭。火牛同電線分開，換條電線就唔使配插頭

本來想用 eheim 9/12 既硬喉，套左喉箍晌駁口都會滲水，換返 8/11 既軟喉就冇漏。得兩粒掣，按 UP 掣 3 秒就設定溫度，5 秒後顯示返魚缸水溫

試機果陣冇較溫度，晌冷氣房好快降到 25.5 度，後來設定 27 度，免得同室溫差太多要成日著機。個溫控算準，同缸內溫度計相差約 1 度。降溫果陣風扇出暖風，水溫太低會自動轉為加熱，出冷風

試用一日，前後兩把風扇唔算嘈，維持到目標溫度。已經拆走橫流扇，冬天唔打算裝暖管

新宿 Paupau Aqua Garden

銀座  Paupau Aqua Garden 唔順路，行左細好多既新宿店。咸淡水缸既魚同草款式唔多冇特別，係睇器材，尤其多陌生既日本牌子，ADA 同 eheim 都多

1 同 2 既蝸牛扇，曾經用過覺得風力弱，呢兩款都唔似夠 26L 同 60L 水用。3 4 5 既單頭電腦扇點會降到 3.5 度。最吸引係部水冷，價錢貴但好少牌子出用致冷片既細機。拆開盒睇，火牛係 110~240v，配個方腳插頭就用得

高身魚缸裝咁細把風扇。唔認得啲銀色魚，有些少似女王燈。啲螺都頗貴

畢加索燈 jelly bean tetra

換左支雨淋管，鑽多左個向下既出水口，魚缸右邊既水流應該均勻啲。椒草長得未夠密，右後排既斜坡會逐漸變平，要定期加高。將兩支 ADA multi bottom 拗斷三截塞入泥底

紅衣夢幻旗近排匿晒晌石後面，餵完魚又縮返埋，換左做九條畢加索燈 jelly bean tetra。從未養過畢加索燈因為貴，最近終於平左，至少同花地灣賣既紫艷鉛筆差唔多

係中上層魚，好在開關燈唔會衝向水面跳缸。落缸好快適應肯開口，但唔食急凍紅蟲，唔多食 tetra min 乾糧。從口型睇黎要食細粒既飼料，買左水蚤同豐年蝦幼體各一包。兩包都搶食，但豐年蝦太細粒，好快沖散要熄左濾桶餵。呢批魚有三條瘦弱啲，暫時每日餵兩餐要養返肥

繼續每星期溶一片老葉，主莖既小芽好似長高左。熄左 twinstar 兩日唔記得開返，多左啲綠藻。每星期落 12 滴 ADA ECA 同間中落 step 2

twinstar m3

裝左 twinstar m3 大半年，對抑制玻璃青苔既效果一直好穩定。換缸後個半月冇落 excel 都冇乜黑毛藻同鹿角藻， 唯一唔好係對鮑魚螺有害，令山谷石積左一層青苔，養四條小精靈都清唔到

用青龍石既缸，每隔一排就有層鈣塞住金屬網。呢個缸用山谷石就唔使除鈣，係五月初見出泡變少，先拆個反應器出黎用 1000ml 水兌 20ml 漂白水浸洗過一次

晌 twinstar 個專利申請睇到個反應器既構造，底面兩層金屬網既鍍膜用耐左會溶，由灰白色變黑就要換，晌魚街見過成塊變黑晒既。買左塊後備既反應器，預左用一年要換

week 3

eheim 原裝藍色綿用左幾年有啲爛，買左包新既綿。早兩日缸水忽然變清，等月底洗濾桶先換綿

幾年前將雨淋管鋸短移去側邊，晌出水口既背面鑽窿以減弱水流，但換水要熄濾桶否則會噴出缸。會換支新既原裝管，將額外既窿鑽晌出水口下面

小精靈對山谷石既青苔冇咩效果，三種椒草生得同預期一樣咁慢

又一片老葉溶左。三個禮拜幾乎冇郁過，得主莖既小芽出左兩片葉

week 2

缸水時清時濁。有日兩條夢幻旗既背鰭各有一兩粒白點，或者係夜晚開冷氣令到溫差大

用茶袋裝起大約 2~3g 連翹放出水位，四五個鍾後啲魚浮上水面抖氣，即刻拎走再換三分一水。第二日缸水變濁，魚冇事但死四隻蝦，剩低既都瀕死，及時換水就翻生

夢幻旗既白點消失左，要睇多幾日怕復發。水清返後買返三隻大和藻蝦同一條小精靈。裝左  twinstar 唔使成日抹玻璃，但山谷石仍然多青苔，靠本來兩條小精靈證明唔得

棵草乾淨返，新啲既葉較深色，有另一片老葉溶左，唔覺有新芽

week 1

紅衣夢幻旗死左一條。呢一款從外表未睇到雌雄既分別，係有三條背鰭稍大既，周時張開魚鰭比較似雄魚。露茜椒草有啲溶葉。缸水清左些少，用左支 biodigest

葉面既綠藻薄左，有一片老葉開始溶，冇生長跡象

day 2

六月初出門十一日，返香港當晚濾桶出水好慢，第二日洗濾桶發覺係塞住左，再下一日就反缸，八條新燈死晒，四條小精靈之後果日死埋

不斷有匙羹萍變水上葉，剪唔切，乾脆換缸。用舊缸既迷你椒草鋪前景，後景有泰國青椒同新買既露茜椒草

三條女王燈捱過換缸，隔日買兩條小精靈同八條紅衣夢幻旗。四年前養既同名魚，背鰭短而圓滑，有黑斑同尖端呈白色，今次呢八條既背鰭都尖長同全紅色。兩個款宜家魚街都賣緊

brownie blue 俾層綠藻遮住，睇得出棗紅色褪晒。搬去新缸稍為移高左

brownie blue, week 26

新既 aqua one 扭實左電池蓋就冇再壞。搵唔返 tetra 菜片，買左細樽 tetra min，以後擺雪櫃

停用 ADA step 2 同 ECA，想頂芽出返新葉

brownie blue, week 25

2012 年買既 tetra 菜片生蟲，白色好細粒似係粉塵蟎，食剩大半，成樽丟左。逢係夏天潮濕乾糧就易生蟲，日後要長擺雪櫃

aqua one 用左個零禮拜就壞，電池蓋扭唔緊所以入水生鏽。換左款 juwel ，但太大舊，吸盤位打斜，好唔順眼

近兩個月晌主莖生左六七粒側芽，頂芽冇點再出新葉。可能最近少青苔，落多左液肥刺激到側芽

brownie blue, week 22

匙羹萍剪薄左，攪起好多泥粉要洗埋濾桶。溫度計又跌落水，換左做 aqua one 沉水溫度計。比起用左十年既舊款，aqua one 既讀數平均高一兩度

玻璃既綠斑藻多左，twinstar 出泡少左。按照說明書用 1000ml 水兌 20ml 漂白水，拆反應器出黎浸三個鍾。塊金屬網乾淨左啲泡似乎多返

之前扯甩既根逐漸固定返，但幾個頭幾乎冇出新葉，反而晌莖上面出芽