大掃除

遲到既大掃除。唔止濾桶，連兩條膠喉都拆出黎洗。出入水膠喉實際上係魚缸既坑渠，由十月中到宜家積滿一片片啡色污垢，隨水飄揚，其實老早就要洗

洗完濾材酌量換水，順便片走水面層厚厚既油膜，缸水好快清返。早兩日行花市，見到有個賣隔油器既攤販，用雞油做示範。水面層油唔知係乜成份，比雞油稀好多，覺得唔岩使所以冇買

小水蘭冇再長高，仍然冇分株，可能要用埋根肥。上次用 tetra 片裝肥料之後，缸水變到普洱咁既色，搞左兩個幾月。雖然唔肯定起因係佢，但自此對呢類肥料好有戒心，要慢慢諗下

停電

凌晨一點突然停電，停左成個鍾先恢復返。頭先對住個冇氣泵、冇濾桶同冇暖管既缸發呆。好在停得唔耐，拖到聽朝既話，可能已經全缸覆沒

嫌氣泡聲嘈，平時個泵都開得好細。缸魚數量唔多，照計冇左個泵對魚既影響唔太大。今晚唔算凍，成晚冇暖管，到聽朝應該約廿度，缸魚或者捱得住。最大問題在於濾桶同氣泵熄左，濾桶入面既細菌缺氧得耐會死同釋出有毒物質，當電力恢復濾桶再行返，污染物就流返入缸

上網係見過有人將養魚器材駁落電腦用既 uninterruptible power supply 作為後備電源，可惜 UPS 太貴同太大部。以防萬一，遲下要買個乾電池氣泵，萬一晌屋企遇上停電超過個半鍾就駁入濾桶打氣

星點珍珠蝦

上個禮拜結算，數到個缸有五隻蝦，後來發覺數漏左一隻

早幾日死左隻，尋日返屋企，見到魚群晌度爭奪一舊白色既蝦仁，證明又死一隻。件蝦仁最後被一隻蝦搶走，匿晌水管後面獨食

死蝦可以反映水質惡化，又或者只係壽終正寢。個缸冇種莫絲，但經常都餵剩唔少魚糧，照計唔會餓死

今日買左廿蚊四隻大和沼蝦補充返。新舊蝦拍埋一齊，開始覺得上次買返黎果袋蝦有問題，似乎撈埋左同大和沼蝦外型極相似既星點珍珠蝦。魚街既動植物既命名冇統一標準，買既時候冇睇清楚就會中招

洋蔥螺

鋪頭個缸寫住「洋蔥螺西瓜螺每隻十蚊」，買返黎呢隻都唔知係邊款，當住係洋蔥螺先。尋日買返黎，到今日已經過左第一關，就係冇逃走

曾經有一隻不知名既螺，養左兩年幾。每隔一排就會爬出缸外，然後跌落檯面甚至地下，有幾次起身重踩到添，好在個殼夠硬。養極都唔大，但生命力極強，夏天開左冷氣，晌缸外風乾一晚，再執返起掟落水都冇事。後來移左出廳既大缸就冇再爬出黎，應該係細缸既水裝得太滿，佢一唔為意就翻過左塊玻璃，返唔到轉頭

第二關係 ADA 黑泥造成既酸性水質。鮑魚螺同角螺都適應唔到，睇下呢隻點喇

結算日

開缸兩個零月，剩返約十五條魚，五隻蝦，一缸草。遲下落魚街要補充一隻螺，魚蝦草就算喇

幾個月前買完一包蝦，由總數十隻死剩宜家五隻，可能暗示呢個缸只能夠維持五隻

魚既數目一直都懶得數，搵日要晌缸頂開閃燈影一張相，將缸魚定左格先可以慢慢數。雖然早排反缸死左幾條，暫時唔打算再加。一買就要五條，無謂搞到咁迫

晌盞燈正下方既草已經生到個缸既八成高度，但重未見新芽，呢個品種或者唔會分株繁殖。好在以宜家既格局，生得唔夠密都唔礙眼，唔需要再買草

早兩日晌堆雜物摷到一個塑膠量筒，以後加 5ml 液肥唔駛再估估下

鑽石紅蓮燈

兩幅相應該係同一種魚，學名一樣，只係顏色同譯名唔同。換缸之前曾經養過兩條，係藍色果種。都唔平，每條要二十幾。當時同新燈混養，可能因為同伴太少，環境亦唔夠好，顏色一直都好淡，又唔多食野。見細缸養得唔好，搬左出廳既大缸，幾個月後就死左

至今仍然好想養呢種魚，尤其係綠色果種。但呢類群居既魚，一買就起碼十條，貴之餘來貨亦好少。早幾個月見過有成缸藍色，晌魚街叫亞歷山大，好似十八蚊一條，綠色就未見過有，再者亦冇地方安置宜家呢缸新燈。廳果缸用沙底，水質偏鹼性，而且環境太差，養唔到燈魚

有病

早兩日發現有條魚身上有粒奶白色斑點，病徵類似傳染病「neon tetra disease」，病因係微孢子蟲感染。據講係絕症，要即時撈走病魚人道毀滅，以保存剩餘既魚

以往有類似徵狀既魚都係好快撈走，每次都搞到缸草亂晒。當成群十幾廿條外形完全一樣既魚仔晌草堆入面亂竄，好難將病徵唔明顯既目標撈出黎

本來有少少唔妥既魚我都唔理，冇毅力開多個缸隔離病魚去醫。只有白點病之類傳染性高既病，我至會晌主缸用藥。至今條魚起居飲食一切如常，泳姿亦冇唔妥，可能係病發初期，亦可能唔係有呢種病。但呢種係會傳染既絕症，唔值得冒險，再麻煩都要撈

platinum cardinal

好耐之前，晌魚街見過有缸新燈掛左個寫住日文「プラチナ・カージナル」既牌，上網查返，先知原來係新燈既特別品種，市價每條三千五百日圓。但晌中英文書藉或者網頁又摷唔到，包括好多魚街好常見果本燈魚特輯，直至我買左呢本由日文翻譯既大陸書

日文網頁話呢種魚間中會撈埋晌野生既新燈度進口，好難買到。魚街果缸新燈頂多係野生既普通品種，賣三十蚊之嘛，不過唔係佢掛錯牌我都唔知有呢種魚。早排聽聞魚街返左貨，六十五蚊一條，但我行勻又唔覺有，可惜

三種小水蘭

上兩個月買左本魚書，一直都想寫讀後感，係早排個缸太亂先冇寫

對返本書，我覺得魚街賣緊既「小水蘭」至少有三種：換缸前種果款係「矮水蘭」；十月底買返黎，種左個零禮拜就開始凋謝既係「水韭」；最後就係宜家呢缸不知名既草

不知名既草既外形比較似矮水蘭，但生得太高。呢本係大陸翻譯既日文書，譯名跟返大陸，所以同魚街既叫法有出入。呢種草要求低，生得快又高，如果會分株就一流喇