清晒

換濾材第二日缸水就清晒。三條朱古力魚仍然縮埋一邊冇乜動靜，奇怪既係咁都冇摺尾或者出白點，又肯食野，算幾健康。驗過缸水，大致上同用 peat fiber 果期一樣，係 KH 有 70mg/L 比上次高左少少。暫時未察覺到對魚同草有咩負面影響，睇多個零禮拜先，買唔到 palm net 就定期換炭算喇

加炭

用左一個禮拜 peat fiber，又係時候驗下缸水。GH 同 KH 分別係 100mg/L 同 70mg/L，pH 竟然有 7，比用草泥丸既時候高，唔再係弱酸性。近掛四條朱古力魚行為反常，終日縮晌暖管後面，餵魚先衝出黎搶食，食飽就退返入死角位，早兩日有一條仲跳缸死埋

本來以為因為成缸鋪晒前景草，冇左茂密既草叢掩護所以唔適應。但月初反完缸四條朱古力魚都唔係咁，應該係受水質影響

peat fiber 效果未如理想，暫時換入兩包活性炭，試下將魚缸既黃色吸走，然後再驗一次水，睇下冇酸性濾材缸水會變成點。要再行魚街睇下有冇 palm net，否則可能要用返草泥丸

tester

嫌麻煩，養左幾年魚一直冇檢查 pH 同 KH 值，魚同草睇落冇乜野，缸水夠清就算。青龍石會令水變鹼同硬度上升，不利水草生長。用草泥丸做濾材可以減低青龍石對水質既影響，但會染到缸水好黃，後來換左包 peat fiber 缸水先淺色少少

買左兩套分別驗 pH 同硬度既 tester，以比較草泥丸同 peat fiber 既效果。14/1 仲用緊草泥丸，當時驗出 pH 6.5，KH 80mg/L，GH 100mg/L。用左青龍石水仲係微酸性，而硬度稍高，表示草泥丸應該有效。18/1 換左 peat fiber 再驗，pH 同 GH 不變，KH 50mg/L 低左少少，證明 peat fiber 效果差唔多，優點係缸水冇咁黃

考慮過 ADA 既 palm net，大概要百幾蚊，幾貴，但據講唔會令缸水染色。上次行魚街又唔覺有，用住 peat fiber 先

換濾材

等左兩個禮拜缸水都冇褪色，唯有抽返袋草泥丸出黎，改用呢包類似樹皮既野。擺左幾日，缸水好似淺色少少，但仲係黃。用呢類物料係為左抵銷青龍石對酸鹼度既影響，代價係缸水會冇咁清。仲係唔想靠定期落化學品去控制水質

進展

擺石景種草皮既好處係唔使點打理，慳返好多剪草既時間。反缸就黎兩個禮拜，匙羹萍同迷你牛毛氈既生長速度幾理想，兩三個月後大有機會鋪滿成個缸

缸水仍然好黃，肯定係草泥丸作怪。雖然草同魚都冇事，缸水咁樣始終唔掂，要搵代替品

第五期

四件青龍石扑碎做六件。比笙石堅硬好多，扑到鎚仔都崩。匙羹萍用返舊既，仲買左包迷你牛毛氈。唔敢買多，得幾條草居然要三十八蚊，又未知種唔種到

缸水唔濁，但好黃，可能係包草泥丸甩色。灰黑色既青龍石浸完水唔知點解變左淺灰，照計唔應該咁既色，希望會還原。反完缸冇晒青苔，本來都擔心四條小精靈會餓死，好在佢地都有食紅虫

暫住

以往反缸造成死傷主要因為用太多時間撈魚，今次趁天未光就撈，搬去預先駁好氣泵同暖管既水桶。駁埋濾桶令缸魚較易適應，順便養住濾桶內既硝化細菌。舊缸既匙羹萍掘起留用，兩隻螺搬出廳既魚缸。缸魚晌膠桶住左兩日，一月二號搬返晒入缸，暫時冇傷亡

拎走左濾桶既海綿同部份生物環，騰出空間塞入一包 eheim 既草泥丸，降低水既酸鹼度同硬度，以減少青龍石對水質既影響。未知效果如何，遲下缸魚同草唔對路先買套 tester 返黎驗