到期

fluval 生物環有效期約半年，為免一次過換晒影響水質，最好每三個月換一半。前日照說明書既指示換左，暫時睇唔到有咩壞影響。新換入去既擺晌上面，即係比較淺色果堆

早排有魚鋪話代理商唔再入貨以後冇 501 賣，睇黎又係搵笨。應該係隻台灣老翻 301 唔好賣，宜家成條魚街都拎返 501 出黎喇

近幾日開始餵少一餐，反正一日餵兩餐佢地都唔多踴躍。每餐比以往豐富，先餵急凍紅虫再餵乾糧，因為有好幾條魚似乎從來唔食死紅虫

近照

難得影到幾張比較清既魚相。部機應該可以影得更好，係我唔識用姐

見有位網友種迷你矮珍珠，砌到一幅好靚既草坪，好羨慕。今日去魚街問價，280g 既小型氣樽連埋全套配件至少七百蚊，重要每個月叉一次氣。現時個缸所有器材加埋魚蝦螺草都未駛七百，最可行始終係 DIY。膠樽、氣喉、細化器、蔗糖，加埋超市有售既乾依士一包，成本我諗五十蚊有找。只係懶得搞，專心養魚算喇

假芽

幾日前見到缸邊有一截綠色，驟眼睇以為種左兩個幾月終於有分株，但個形狀又似係根，而且位置太低。以前見過有棵小水蘭既新芽貼住玻璃底黎生，最後長唔到出黎，成為一截埋晌泥入面既嫩葉。留意左幾日全無變化，睇黎只係草根姐

再見白線虫

下晝晌近水面既玻璃上發現一條白線虫。條虫太細，用手機影唔到，懶得拎部相機出黎，最後冇影到相就挑走左。早兩日水中有條類似虫既死物漂浮，轉頭就被條魚食左，可能係死左既白線虫

近兩次見到白線虫都係晌對住濾桶出水口既玻璃面。白線虫住晌泥入面既話，爬到咁高搏被魚食咩，所以應該係由濾桶噴出黎。洗完濾桶冇幾耐，近排缸水又唔算好清，都係唔好再拆個濾桶住，睇多幾日先

藍眼燈

幅相晌零四年影，本名藍眼鱂，俗稱藍眼燈，同由「魔土」孵出黎果類鱂魚係近親。唔怕人，唔偏食，養耐左會生蛋添。當年設備唔好，魚卵好易發霉，大多數孵唔出。後來有經驗，總共孵到廿零條，但只有一條養得大。剛孵出既魚毛比掛缸魚網既網眼更細，連生仔缸既罅隙都穿得過。魚仔唔識搵掩護，只會浮晌水面，最後被成年魚食晒

照計好易養，弊在呢種魚鍾意跳缸。開關燈既時候受驚會跳、魚群搶食會跳、夜晚訓得唔好又跳。藍眼燈平時聚晌中上層，受驚就向上逃竄，所以特別易出事。一直都解決唔到跳缸問題，又唔想晌魚缸加蓋，每個月平均死兩三條。 最後將生還者移出廳既大缸，改養新燈

樽頸

最近行魚街冇咩好買。位置所限，添置器材既先決條件係靜、細、價錢合理、外形順眼同唔會點發熱，換言之 CO2 同火數大既燈管已經唔駛諗。現時既 7w PL 管只提供基本照明，換火數更大既，夏天就要裝風扇降溫。以前試過買現成魚缸風扇同 DIY，日頭都勉強，夜晚嘈得滯

擺得晌檯面既小型 CO2 氣樽連電磁閥等等成套配件起碼四五百，比呢個價平既亦買唔過，怕係大陸貨。上年國內有間魚鋪既氣樽爆左，一人死亡，我唔打算擺個炸彈晌檯面。化學式 CO2 既細化器太大件，DIY CO2 本來值得試，不過裝唔到燈，得 CO2 都係種唔到要求高既陽性水草

幅相係遮光罩，整完一直冇貼上黎。有左呢個，配合時間掣，訓到下晝四五點都唔會被光管整醒

斷市

最近有網友話晌魚街買唔到 501，據聞係代理商唔再入貨喎。尋日行勻魚街，得一間重有得賣，要二百二十

十月底我買既時候重係二百蚊有找，唔係親自睇過都唔信 501 會斷市。適合 20L 左右既細缸用既濾桶，以往就得 501 一款，所以好多鋪頭有入貨。如果消委會發現 501 用得耐會著火，要市面回收就話姐，就算鋪頭冇再晌代理商返貨，剩低既貨尾應該有排賣

最近台灣出左隻由外形到命名都照抄既仿製品，個牌子聽都未聽過，叫「銀箭 301」。好多鋪頭宜家都賣緊，要一百七十蚊。對呢類冒牌電器既 QC 冇咩信心，隔一排有人發現燒左摩打或者漏水既話都唔出奇

唔係 501 斷市既話，301 肯定冇咩人買。有得揀，梗係加十零廿蚊買已經成名既意大利貨啦。希望唔係為左促銷 301 而收埋 501 唔賣

白線虫

剛才見到玻璃面有粒抹唔走既塵，睇清楚先知，原來係一條久違了既白線虫。太細粒冇影到相，用牙籤挑走左就算

以前養藍眼燈同孔雀，每隔一排就有白線虫入侵。換水果陣沖起沙泥，十幾廿條虫湧出黎扭下扭下，都幾嘔心。有網友話餵少兩餐，虫就會消失，但最後次次都要用滾水洗太平地先搞掂，同佢一鑊熟

都有年幾冇見過呢種虫喇。上次洗濾桶都唔覺有，應該未大量繁殖。自來水就冇得計啦，換缸之後又冇再餵生紅虫。早兩日買左兩包新鮮豐年蝦餵魚賀年，照計都好乾淨。最大嫌疑係新買既蝦同螺。草缸或多或少都會有虫，只要唔好生到成缸都係，就眼不見為淨喇

草叢

將 5/11、29/12 同 30/1 既相拍埋一齊，盞燈正下方既草好明顯生得較快，角落果幾棵一直冇乜變動

以前種小水蘭好快發芽，但生得唔高。呢缸草生得高，但唔夠密。印象中十一月買返黎果袋草都有幼芽，可能係種得唔好先至冇分株

晌光照同肥料不足又冇 CO2 既環境都唔可以要求咁多，種到個草叢就算喇。想買多包小水蘭試下，小水蘭分株既話應該可以填滿宜家既罅隙