悼白金新燈

呢幾日望住個缸硬係覺得有唔妥，尋晚仔細睇先發現少左條魚，係最難買既白金新燈，魚鰭帶銀色果條。稀有種魚身呈銀色所以比較易認，普通種既外型完全一樣，多一條少一條都唔覺眼。死晌魚缸至少會被食剩條魚骨，宜家連骨都搵唔到，怕且係唔知幾時跳出缸，變左魚乾當垃圾掃走。條魚生前唔鍾意望鏡頭，連一張似樣既遺照都冇

想換缸

待業，賦閒在家，反而冇乜更新呢個 blog。以前都係功課好忙既時候先會上黎打字，當係逃避現實

宜家個缸太長，想換個方形少少既，方便將來種草造景。大概 25L，太多水個濾桶應付唔到。換濾桶既話，比 501 大一個碼就到 Hydor P10，大到唔適合擺檯面

現時成套架生加埋都唔過六百蚊。新魚缸本身唔貴，一定唔會過佰。燈未必需要換，連燈都換埋就可能要加風扇會好麻煩。最貴係套 CO2，起碼七百。都係要搵到工先喇

捉虫

試過好多款唔沉既魚糧，包括合成乾糧同脫水小動物既例如豐年蝦同水蚤，都冇魚肯食。頭先睇住隻虫仔跌左落水，成群魚即時衝上水面搶，重踴躍過餵生豐年蝦或者紅虫。類似既場面以前都見過，證明佢地唔係唔食浮晌水面既野，不過果樣野要識得郁

發芽

幾日前已經留意到，不過怕好似上次咁食咋糊所以都係睇定先。後來先發現貼牆既角落頭已經有兩三條新芽，只係一直被草遮住。十一月開始種，宜家先陸續分株，似係因為冇裝 CO2 又唔夠光先生得咁慢

書評

都好耐冇更新，個缸情況好穩定，晌有閒錢裝 CO2 之前冇咩好寫

今日晌鋪頭見到呢本魚，睇完好想買。內文編排似教科書，重教埋點樣解剖添。本書勝在有好多網上罕見既照片，特別係魚既病例。雖然部份內容晌英文網頁都睇過，但遠遠不及呢本書咁詳盡，又圖文並茂，而且係中文添

本書硬皮包裝，個老闆話幾年前買要百幾蚊。呢間出版社有一系列教養魚既書，平裝本公價八十，我都有本晌朋友度借既燈魚專輯。下次行魚街見到價錢合理就買