掃場

買蝦之後停左用藥，又有虫。新一批係幼虫，比以往更細條，黑毛藻殺手似乎對虫卵冇效。剩返兩隻蝦懶得再搬走，每日落一滴，一星期後蝦死剩一隻，反而仲死左兩條小精靈。最後果日一次過落兩滴，不留活口

還原

濾桶得藍色綿同生物環，暫時又唔覺缸草同魚有咩問題，視乎效果睇下使唔使加返塊白綿。搵唔返之前搬出廳果兩隻蝦，怕且被連殼食左。買返四隻大和沼蝦，第二朝已經有隻死晌角落位，鉗走果陣仲扯起左一束得來不易既匙羹萍。下次未訓醒都係唔好搞個缸

虫禍

上星期晌正面塊玻璃搵到呢堆野，驟眼睇以為係塵，望多幾眼先駭然發現原來係幾十條蠕動緊既白色虫仔。草缸周時會有呢類不明來歷既小動物，冇影響到缸魚又縮晌角落既話都費事理

但呢幾十條虫黏晌魚缸正面郁郁下太礙眼，用膠刀刮走，轉頭又返回原位。近兩日仲蔓延到另外兩塊玻璃，總共三堆虫，其中一堆比較細條，擺明繁殖緊

到呢個地步唯有毒死佢地。黑毛藻殺手藥性夠強，殺虫藥都慳返。活性炭會吸藥要拎走，兩隻大和沼蝦搬去另一個缸。同樣係無脊椎動物，殺到虫既藥好自然會殺埋蝦

預防劑量係 100 litre 落一滴，個缸得 28 litre 左右都唔知點稀釋。就咁落一滴，十零分鍾後見到堆虫已經甩落黎。每日落一滴，用多幾日斬草除根

暫停

用左幾日 palm net，驗過兩次，pH、KH 同 GH 同用活性炭既時候一樣。而且缸水好黃，同用草泥丸果排既顏色差唔多，應該係使用方法錯左。早兩日拎走左，擺返活性炭，遲下放年假再慢慢搞，到時買過套更準確既 tester。宜家呢套唔係 6.5 就係 7.0，唔多靠得住

樹皮

終於買到，原來係塊咁既樹皮。七十五蚊，分兩份大概夠用半年以上，有效既話就唔算貴。抽走兩包活性炭，用網袋裝半塊樹皮塞入濾桶。順便換左部份生物環，因此缸水有少少濛。為左解決青龍石令 pH 同硬度上升既問題，共換左三款濾材，過一兩日驗多次水就知 palm net 係咪傳聞中咁掂

月結

經過整整一個月，匙羹萍覆蓋左大概七成面積，以現時進度有望二月內鋪滿個缸。迷你牛毛毯生得慢而且數量少，當係點綴下個缸。上星期黑毛藻有蔓延跡象，已將有藻既葉剪走，雨淋管扭向下加大水流，目前情況受控。濾桶有活性炭，用唔到藥，唯有買大和沼蝦幫手清藻。尋日買左四隻，今朝見已經有隻死左