尾聲

用完 pH 調低劑，第二日幾乎成缸魚絕食，即刻唔敢再用。將活性炭抽起，再試一次 palm net。上次聽魚鋪老板講，用網袋包起塞入濾桶，效果麻麻。今次照足說明書指示，拆開兩片攝入白綿同生物環中間。買左盒淡水用既 pH 試劑。擺左幾日，缸水冇變黃，驗到 pH 6.8，算係微酸性

咁既水質朱古力魚照計未至於適應唔到，抑或係魚缸鋪草皮，冇左高身既草掩護令佢地變成咁哩，但反缸後頭一個禮拜佢地好正常。有幾條新燈個咀好似擦損左，希望唔係傳染病。岩岩餵魚見返消失左一排既玻璃虫添，又要拎返支黑毛藻殺手出黎

其實呢個缸搞左三個月都頗多問題。種到一片草坪，總算一嘗多年心願，黎近復活節假期或者反缸，今次唔砌石景

pH 值調低劑

上星期缸水好矇，洗濾桶之後塞返兩包活性炭，缸水好快清晒，連水面油膜都冇埋。加炭對魚同草冇乜影響，唯獨朱古力魚近幾日胃口差左，仲好易受驚跳缸。朱古力魚自反缸後終日縮晌暖管後面，似係唔適應水質。試過用 palm net 之類調低 pH 值，但會令缸水變黃唯有放棄

買左支呢個，擰開蓋聞到一陣酸臭。向來好抗拒倒化學品落魚缸，所以之前先不惜工本晌濾材方面著手。濾桶仲有活性炭，直接加落去都唔知有咩效果。目標係將 pH 由現時既 6.5~7 降到 <6.5，睇下朱古力魚會唔會活躍返

黑線飛狐

兩條蝴蝶琵琶第二日就跳缸，睇個勢養唔到，唯有搬去廳既大缸，買返兩條黑線飛狐接替。相比琵琶同小精靈，飛狐刮青苔好勤力，又主動搶紅虫，食青苔唔夠飽都唔怕捱餓。以往一直養唔到飛狐，通常都唔開口食野，好在今次養左個零禮拜相安無事。尋日死左條鑽石紅蓮燈，好少有魚會死晌缸入面，往往都係跳缸

蝴蝶琵琶

大半個月冇更新，匙羹萍已經鋪滿缸底九成以上，用左兩個月終於一嘗宿願，種到片草坪。放假前諗住再試用 palm net 令水質變酸，但其實匙羹萍一直冇乜問題，結果到洗濾桶都冇再換濾材，免得又搞到缸水變黃，自尋煩惱

盡殲玻璃虫後買左四隻大和沼蝦。四條小精靈死剩一條，幾條都係猝死，似係壽終正寢。由兩條蝴蝶琵琶頂上，個名咁典雅同外形唔多襯，小精靈移出廳。跳缸死左條火兔燈，買返三條鑽石紅蓮燈，太細條又游得快，得閒先影