翻缸

照舊晌清晨將缸魚搬去膠筒暫住，駁好氣泵同濾水就翻缸。舊木鋸短左少少，免得阻住盞燈。個缸唔算光又唔算暗，唔知應該種陽性定陰性草，求祈買幾款，睇下邊種會枯

先處理要綁晌舊木既珊瑚莫絲同細葉黑木蕨。冇買幼魚絲，用綿線頂住先，希望晌條線溶之前堆草會抓實舊木，否則甩左就唔知點綁返埋。綁完用濕紙巾包住堆草，然後慢慢插其他草。前景用返舊缸既迷你牛毛毯，中間擺紅針葉皇冠同一株紫紅針葉柳，再插幾支黑木蕨晌木後面。三隻大和藻蝦搬出廳，怕佢地會食皇冠草同莫絲

雙管齊下

加多左支 11w 筷子管。得一支太暗，擺兩支又怕太光，咁既安排仲種唔種到陰性草就要遲下先知。差啲唔記得拎舊木去煲。加粗鹽煲左幾日，顏色應該甩得七七八八。試過有舊木煲極都仲係甩色，焗住掉左佢。好怕見到缸水染左啡色似普洱咁

沈木

幾日前晌魚街居然搵到批無論外型同價錢都好理想既青龍石，換缸前買到就唔使宜家咁惆悵。終於買左呢舊，價錢唔平但總比早排亂咁買石實惠得多

本來分別買幾支顏色相近既木條會平好多，可以按心目中想要既造型用不秀鋼螺絲鑲埋，買現成既係勝在唔使點加工。手上呢舊開叉既，左邊比十二吋缸高太多，要削短少少

要諗下綁邊種莫絲、點樣綁上去，同埋前景種乜野。種返迷你牛毛毯就要加多支燈。宜家靠一支 PL，種左個幾禮拜，只係得網草有發芽，迷你牛毛毯冇乜反應

天光墟

成年冇去，今朝再逛天光墟，比上次人多，都幾迫。想搵下有冇岩使既沉木，行勻得兩三檔有賣，價錢比魚街平一半但冇想要既款

搬竇

今次換缸好失敗，證明晌未湊齊新缸既野之前唔應該郁舊缸。將黑色咭紙同發泡膠界岩位之後就搬開左舊缸，諗住第二日就可以移缸魚過去，結果搞左四日都未掂。果幾日缸魚冇乜開口，好在舊缸有齊氣泵同濾水，換缸前果個星期又好肯食野，咁先捱得過

到最後都係想砌返石景，貪佢唔使點打理。第一批買返黎既青龍石唔岩心水，丟左。再買一批木化石，又砌唔掂，丟埋。到假期就黎完喇都未搞掂，焗住行多轉魚街，買左棵網草同少少紅針葉皇冠，將用舊缸既迷你牛先毯求祈鋪平佢就算。連續幾日仆去魚街度使既冤枉錢夠買一舊好靚既沉木

換缸至今未有傷亡，除左紅針葉皇冠幾乎俾蝦食晒，剩低果少少殘渣已經掉左。新既 PL 管果然唔夠力穿透 12 吋高既缸，但暫時唔會加多支，因為反缸既話未必會種陽性草。暫時打算砌一個沉木加莫絲既景，不過搵到岩心水既之前梗係唔會再郁

新缸

買左個 12x12x12 吋既方缸，容量約 25L，同舊缸一樣。本來想買個高兩吋，近 30L 既，但果個係彎角缸。用彎角缸養左五年魚，想轉下款式，而且直角玻璃應該更易刮清苔

仲買左支 11W 既筷子管，比宜家果兩支 8W T5 管更光，只係尺吋差太遠，擺落個缸度會暗左些少。相比之下，T5 管既光有少少偏黃添。筷子管個燈罩冇咁阻定，必要時可以並排裝多支。T5 管既燈罩太o徒位，效率低

度位

考慮換新缸。宜家個缸大概有 25L 水，新缸唔能夠超過 30L，否則濾桶會應付唔到，用返宜家套燈既話個缸就唔能夠長過 16 吋

想砌一個有沉木既景。以前試幾次用沉木，唔係會令缸水變黃，就係舊木根本唔沉。就算搵到舊岩使既木，更麻煩既係事後點打理。現時個石景既好處係唔使點剪草，個景都唔會好快走樣。生得快既陽性草應該唔會種，前景用迷你牛毛毯，舊木纏滿三角莫絲唔知會唔會好睇