week 4

早兩日熱到廿九度幾，再死幾隻蝦，應該剩返六隻左右。尋日洗濾桶先發現唔記得拎走活性炭，上兩個禮拜加既液肥唔知有幾多被炭吸走左。拎走包炭第二日缸水就黃晒，證明沉木或黑泥仍然甩色，唯有繼續用炭

青花旦生得頗快，黑木蕨有發芽但冇長高，其他草冇咩進展。擺左炭費事用液肥，直接晌左右兩邊種緊紅色草既位置各塞一粒鐵肥

week 3

半死不活既細葉黑木蕨拆走左，換做比較受得強光既青花旦。就咁將青花旦既莖塞入木罅，冇用線綁。買左兩隻鮑魚螺，同廿零隻虎紋蝦，第一晚就死左半打。無論係水質唔得，抑或係夜晚開冷氣引致溫差問題，呢批都捱唔到一個禮拜既話，就要放棄養細蝦

個缸好多蝸牛，已經鉗走左廿幾隻。肯定係新買既草有蝸牛蛋洗唔乾淨，唯有見一隻捉一隻。塞左一粒鐵肥落泥底，以後每個月加一粒，睇下紅針葉皇冠同紫紅針葉柳有冇反應

week 2

迷你牛毛毯進度幾好，但其他草既狀態都麻麻。陰同陽性草都種唔掂，紅色草唔夠紅，綠色既唔係生得慢就直情枯左，唔知係肥料定照明出問題。考慮緊將兩支 11w PL 白光管換做一藍一白，咁會暗少少，可能要犧牲紅針葉皇冠同紫紅針葉柳

買多左隻 atyoida，死左。玻璃有幾撻暗角位生青苔好難抹，準備買兩隻鮑魚螺幫手

新貨到

原來晌後景既草係鳳羽蕨而唔係黑木蕨，唔受得強光，變啡色唔係因為啡藻，其實係枯左。換做幾束真正既黑木蕨，將開燈時間縮短至九個鍾，每次換水加 2.5ml 液肥，睇下效果點

前後搬左三隻網球蝦過黎，死左兩隻，得一隻適應到。想買多一隻網球蝦，但魚街既冇咁細隻。返左款叫 atyoida 既新貨，未有中文名，買左一隻試養。同網球蝦一樣有對羽狀既的螯，都係濾食性，但似乎會食紅虫，養得掂可以當係網球蝦既代替品

week 1

開缸兩日後加左近廿隻藍蝦，三日後死剩一隻，其他變晒蝦仁，當餵魚。由廳既魚缸搬左兩隻網球蝦過黎，第二朝死一隻。水質未穩定，等多個零禮拜再買蝦試下。冇蝦晌度餵魚要好小心，免得有野食剩會變壞。網球蝦食浮游生物，唔食剩糧但會幫手掃返平堆泥

珊瑚莫絲狀態麻麻，尤其綁晌左邊條木果兩堆，綁好左先發覺原來果個位係冇光照到。有幾束光照唔到既細葉黑木蕨枯左，背景既黑木蕨鋪左一層啡色野，唔知係啡藻定開始枯萎。紅針葉皇冠同紫紅針葉柳變左綠色冇乜睇頭，今次換水加左液肥

換濾材

駁埋濾桶，擺過夜就放魚，暫時冇傷亡。累積左幾次經驗，再翻缸已經冇咁易死魚。冇用青龍石唔怕 pH 過高，唔使再擺 palm net。拎走埋兩塊白綿，騰出空位塞入兩包活性炭，盡量吸走由沉木同黑泥釋出既啡黃色。之後就等缸草適應新環境，種緊既多數係生長緩慢既陰性草，尤其珊瑚莫絲出名生得慢，就算唔枯，怕且都起碼要等兩三個月先似樣