week 35

之前果四條紅衣夢幻旗，有一條顏色特別淡。當時以為佢係母魚，背鰭尖長同冇白點既公魚就會深色啲

最近睇到有人懷疑根本唔係性別同水質問題，而係幾款品種唔同但外型相似既魚撈埋黎賣，於是買親都抽到啲特別淺色，而且養極都唔會轉紅

今次分批買左八條，因為每次都有一兩條唔靚既。一撈起入袋就全部褪晒色，要安頓幾日先分辨到，諗住留返五六條

藍珍珠斑馬剩返七條，又有一條開始絕食。每次只係一條有事，逐條咁餓死好難搞。冇晒女王燈，水面又有返油膜同腥味

幾年黎都用氣石出 CO2，間中熄掣之後會有水倒流入膠喉出唔到氣，要換粒新既。上禮拜叉完氣，每晚熄掣條喉就入水，最多到兩呎，換左新氣石都唔得

日本製既防倒流既要過百蚊，平既又聽講冇用。用左 CO2 六年一直冇裝防倒流，今次換條新氣喉試下先，有 2mm 厚，比舊果條硬好多

week 33

近兩個禮拜每日浮起一堆迷你矮珍珠，想救又無從入手。零七年種過烏拉圭草，當時用青龍石，水既硬度太高，唔夠光又唔夠肥料，種左個幾月搞到追光又變黃。掘走迷矮就插烏拉圭草，先發覺會高過迷你椒草同吐血穀精，顏色亦唔襯

最後買兩包迷你椒草鋪滿前排。兩日後有幾棵既葉全部溶晒，其實唔算易種，但捱過頭幾日就生得慢又貼地，唔使成日剪。影全景相，唔想魚清背景矇，就變左背景清魚矇，除非換相機

趁前排騰空左，將太迫既穀精拆散再種，第二大果棵一開二。呢兩個月郁左幾次，幾棵穀精既紅色都淡晒

絕食既女王燈卒之死左，剩低兩條又唔食野。反缸前養得好好，經常生蛋又勤力吸油膜，可惜死於茶籽餅。後來買既都唔清油膜，等佢地死不如撈走

買四條細既紅衣夢幻旗，一條瘦到食唔到野同打側游，另一條好健康但脊骨畸型。入袋果時睇漏眼，撈走，再買三條。一落缸就追蝦仔，條魚雖然細都見佢食到蝦。幾日後已經冇乜蝦毛，可以消耗過多既極火蝦