week 6

青苔生得好快，早已經停左 step 2 同 ECA。有紫艷鉛筆就唔多敢落 excel，唯有隔日刷玻璃

絕食果條紫艷終於死左，落缸近兩星期只係晌第二日食過一條紅虫。見另外兩條會啄青苔，以為係偏草食性，特登買筒菜片，得黃金鉛筆同女王燈捧場。為左引呢條紫艷開口，仲買左包生既豐年蝦，可惜買唔到生既絲蚯蚓

兩條紫艷唔食片裝糧。有兩隻極火蝦都少左隻眼，但至少冇再發現蝦既殘骸

kedagang 晌近根部有粒新芽。brownie blue 冇轉色，兩片舊葉開始枯

黃金鉛筆

兩條紫艷鉛筆雄魚通常貼住泥面咁游，或者匿晌葉底，會啄玻璃駁口既青苔。雌魚浮晌上層少游動，就算遇到雄魚都各有各游，越睇越覺得雌魚既行為唔尋常

晌台灣既網路相簿搵到真相，原來五月買紫艷就開始搞亂晒。當時魚鋪全缸都冇紅色，得背鰭同尾鰭有紅斑。諗住只係未顯色，之後就懷疑係雄魚賣晒，買錯左六條雌魚

到六月有批叫「超紅鉛筆」既，以為只係將紫艷既雄魚改名分開賣，買兩條返黎打到雌魚半死。後來先知佢地唔係紫艷鉛筆，而係火焰鉛筆 Nannostomus mortenthaleri

睇左好多幅相，有信心分辨紫艷同火焰先去花地灣。有真正既紫艷做比較，先發現原來果批所謂「雌魚」，根本唔係紫艷鉛筆 Nannostomus rubrocaudatus，而係黃金鉛筆／寬帶小型紅鉛筆 Nannostomus sp. cf. marginatus，即係最初果間魚鋪標錯名

黃金鉛筆似係未有正式名既新種，唔常見，外型非常似紫艷雌魚，唯一明顯既分別係紫艷既肚有一撻紅斑。另外同小型紅鉛筆 Nannostomus marginatus 又好相似，係條黑線粗啲同少左條紅線

黃金鉛筆靠睇臀鰭有冇紅色黎分性別，咁睇得一條有可能係公

week 5

金線椒太大棵睇唔慣，換晒做不知名既椒草，葉片幼長呈青綠色，應該會比擬似咖啡椒稍高

kedagang 好穩定每星期長一片葉，brownie blue 幾乎冇郁過，加泥果陣整斷左條根。同 brownie red 一樣，種左個幾月都冇應有既特徵

紫艷鉛筆

由花地灣帶返黎既紫艷鉛筆，初時成日俾游得快既女王燈嚇到。清油膜用唔著四條咁多，乾脆撈走兩條，剩返一雌一雄

紫艷雌魚養左三個月，食飽就通常留晌右邊後排水流最慢既角落。晌雨淋管既後面鑽開三個窿，將水流減慢一半，令新魚易啲適應，自此雌魚都多左晌中間游

遲買果兩條雄魚抖到第二三日先由葉底游出黎同食紅虫，未肯食乾糧。魚仔通常條條一樣，呢三條花紋唔同，易分辨得多

最深紅色同最強勢呢條都冇火焰鉛筆咁兇狠，唔似會打死另外兩條

呢條最早游出黎同食紅虫。近日有四五隻食剩條尾既死蝦，仲有隻跳缸死左。兩條紫艷好鍾意啄蝦，係冇見過直接啄死

最早買果條最瘦最淺色，只係晌第二日見佢食過一條紅虫，之後只會啄但唔吞，亦唔吼乾糧。第六日突然周圍游，驚係迥光反照

餵多啲去左引瘦果條開口，食剩好耐先用膠喉吸走。買左包急凍豐年蝦幼體，原來好似塵咁細粒，瘦果條又唔食，得女王燈會啄下

新魚落缸，本來想呢個禮拜唔換水。有一日極火蝦上晒雨淋管唔郁，怕係因為近排餵太多，即刻換水後冇事

花地灣花鳥魚蟲市場

由紅磡搭直通車去廣州，轉地鐵到花地灣，單程至少兩個半鍾。室內連室外地攤有幾百檔，仲有埋路牌，比魚街大十倍有多

室內既大鋪多數賣魚缸櫃同做批發。行勻都唔覺有 ADA，得三兩間有 eheim，唔用大陸牌子冇咩岩買

室外既地攤賣魚同草各佔一邊，賣平價草同錦鯉。賣草既又冇標名，只係量多同平

有一區專門賣龜，停車場旁邊仲有十幾個錦鯉魚場

室外既窄巷仔多幾檔賣細魚既，款式唔特別，得幾種冇晌魚街見過。幾乎全場冇冷氣，唔覺有水冷，唔興魚街果類細件既貴價野，以為要空手而回

晌窄巷細鋪一個賣火焰變色龍既缸，居然有條紫艷鉛筆雄魚。隔離幾個缸各有一條火焰鉛筆，仲以為認錯。檔主話係紫艷，但得返果一條。雖然顏色唔算靚又瘦，但好生猛而且冇得揀，即俾八十蚊人仔帶走

當時一點幾，其實應該臨走先撈出黎入袋，等佢晌膠袋焗少幾個鍾。行埋花、鳥同貓狗區就返魚區，個檔主話一個鍾後有新貨。口頭留左兩條雄魚，晌傢私區行陣就返去等。到四點幾返左一袋五條紫艷，買多兩條就回程

比以往用更多時間對水，遲買果兩條好快現紅色，餵紅虫居然有一條肯食，但三條初時都浮面，後來趴晌水草同膠喉唔郁。紫艷雌魚冇理佢地，女王燈一哄埋去就縮埋。咁既舉動太反常，第二日死晒都唔出奇

week 3

全缸都係生得超慢既椒草同辣椒榕，剪草唔成問題，係青苔好明顯多左。缸邊有一行水垢，用白醋、洗甲水同天拿大都摔唔甩

brownie red 當初綁得太貼，突出石外面抵受水流既太長，個幾禮拜後莖既中段發霉斷開。兩截殘骸分別攝晌石罅，其中一截放晌之前甩出既芽旁邊，另一截攝晌原位。brownie blue 冇出新葉，只係長根，等到抓實左就拆魚絲

kedagang 明顯比 brownie 長得快，拆左魚絲放返原位。當初綁既位預得太貼，令棵草傾向打橫生

後排既椒草初時係長柄尖葉，葉面平滑青綠色。但原來未轉水，新葉居然係短柄、深色同起皺有花紋，宜家有啲似咖啡椒

疑似咖啡椒轉水之後太矮，抽起貼住大石果三棵，換左兩棵霉霉地既金線椒做後景，希望唔會太大棵

冇試到塑鋼土，直接買新既。一換左就靜晒，以後盡量少開關濾桶，免得氣泡積聚損耗磁芯