急凍紅虫

自從急凍紅虫餵晒，呢幾個月缸魚都食慾不振。新燈本來已經大得慢，呢排伙食唔好就大得更慢。片裝乾糧就向來都唔受歡迎，諗住紅虫乾會係折衷辦法，但浮面既野始終難控制，食唔晒既浮晌缸邊要撈返出黎，最後重麻煩過餵急凍紅虫

尋日終於賣返十蚊三包，都夠食半年。本來想買加左維他命既貴價貨，因為細粒少少份量易控制，但買唔到

以前餵呢個係食到個肚都脹晒既，可能太耐冇餵，尋日餵既反應麻麻

再換水

上星期日換完濾材之後首次換水，重抽起埋包活性碳，用生物環填滿個濾桶。今次冇洗濾桶，本來重想留返濾桶入面既水，後來見太污漕都係倒走左，用魚缸既水添返滿，之後換左魚缸四份一水。本來都作最壞打算，預左又會變矇，但暫時睇好似重清左

換水之後幫孤獨既藍蝦影左相。近排用得多，開始知道要離實物幾遠部 w800 先會自動對焦到

不速之客

自從裝左濾桶，大和沼蝦就好少再四圍行，平時成群聚晌出入水膠管度，因此任何晌泥面行過既蝦都會好顯眼。早兩日就發現左圖中呢隻冇埋堆既蝦。從顏色已經睇得出佢唔係大和沼蝦，似係藍蝦。應該係混入上次新買果袋蝦入面帶入缸，魚鋪睇漏眼撈埋左唔出奇

以往有養過藍蝦、虎紋蝦同蜜蜂蝦。藍蝦易養，但都好易生虫。養過好多隻個肚都黏左一兩隻水螅，要撈起隻蝦用尖咀鉗鉗返出黎，極麻煩。另外兩款就易死，所以到最後就只養大和沼蝦，用黎清食剩既魚糧同壓制黑毛藻

雖然呢隻孤獨既藍蝦係不請自來，都總算係「客」，冇生虫既就由得佢喇。如果係厭惡性小動物，例如白線虫、水螅、渦虫、蜻蜓幼虫等等，咁就有排搞

換濾材第四日

今日好明顯係清返好多，雖然唔及最佳狀態。可以維持到星期五既，就抽走包碳加返生物環入去，再等兩日都冇事就加返液肥

隻螺仍然唔識轉彎行去另一面。佢既職責係抹乾淨向外果兩塊玻璃，咁落去都唔掂。佢吮實左塊玻璃，又冇可能隔兩日就扯佢出黎搬去另一面。睇多幾日都重係咁就買兩隻角螺返黎取代佢。螺魚螺隔幾個月就要換，又食唔到葉面既野，係時候試下其他品種

換濾材第二日

仍然係矇，不過就冇用掛濾果時成缸濁到好似普洱咁既色。雖然唔打算換水，仍然要片走水面層油膜。減少餵魚，由一日兩餐片裝乾糧同紅虫乾，改成一日一餐乾糧，反正佢地胃口都麻麻

新買既大和沼蝦都係聚晌出入水膠管，好少行出黎。幾日前買既鮑魚螺就仍然停晌果一面玻璃，呢塊玻璃應該食到好乾淨嫁喇。魚缸四面玻璃共有四隻直角，新買既鮑魚螺通常一兩日就學識點樣轉彎行去另一塊度，睇黎呢隻特別遲鈍

又換生物環

早兩日洗濾桶，用擺過夜既舊水沖過生物環，第二日缸水又矇返喇，今次就唔關 tetra 片裝肥料既事。之前咁肯定係 tetra 肥料出問題，係因為有一排將掛濾既生物環掉晒，剩係用活性碳同綿都搞唔掂

自從換左生物環個缸就好唔穩定，而十月底換濾桶之後隔一兩日就清返晒，晌咁短時間生物環都未生效。水清似乎就同生物環冇關，水濁就好明顯關佢事喇

今日去魚街想搵代替品，同魚街既 sales 傾過，佢話係換水唔可以咁密﹝宜家隔一兩日就換三份一左右﹞，同埋要換左 501 附送既生物環。本來想用黑珍珠，但只可以擺晌 501 既入水位，一定好快會塞晒。台灣牌子 azoo 出左幾款咩咩「遠紅外線負離子」既濾材，個名太誇又唔敢用。要加液肥，又唔能夠長期用活性碳，唯有買另一款生物環

本來想幫襯果位 sales 間鋪，但冇咩款揀，最後晌第二度買左 fulval biomax，$55 325g。個包裝幾專業，說明書好詳盡，連個網袋既質地都特別好，同以前買既假日本製平價貨冇得比。果位 sales 話平價活性碳冇用，本來想買埋 fulval 既碳，$33 一盒三包，後來都係用晒屋企既日本貨先，果幾包都唔平

暫時既佈置係換晒舊生物環同加一包活性碳，先觀察四五日

鮑魚螺

個缸開左大半個月，玻璃上既污漬都夠養一隻鮑魚螺嫁喇，早兩日就買左隻，以後換水就唔駛點抹玻璃

自從換左濾桶，果五隻蝦既習性唔同左，成日聚晌入水同出水兩條膠管度。以往個缸冇咁多雜物佢地就成日四圍走，宜家既活動範圍就固定晌貼牆果一邊，連餵魚糧都唔主動出黎搶喇。可能因為近排成日有枯草，唔憂冇野食掛。開始見到葉面類似絲藻既野，睇黎都係要買多四隻大和藻蝦返黎

唔晌屋企既時候由家人代餵魚糧，但有時餵得太多結果就沉晒晌底污染水質，搞到缸水冇咁清。都係由自己餵返喇，最多餵少一餐。養左新燈成年幾，已經識點睇佢地有冇胃口。晌中層度四圍游就代表會食野，試餵少少之後，睇下反應就可以決定餵幾多

呢兩日又冇咁清，當然都重係可以接受。搵日得閒就洗濾桶，要搞清楚呢套過濾既能力去到邊。買多幾隻蝦另一個好處係有剩糧都好快清晒，而就算蝦既排泄物多左對水既污染都冇魚糧咁顯著