白金燈

終於買到。最後冇去觀塘，因為魚街至少三間鋪有得賣，定價五十、一百、二百八十。二百八十果缸同五十蚊既睇唔出有咩分別，當然係去五十蚊果間買。聽伙記講呢批所謂白金燈係晌普通既新燈入面揀出黎，換言之唔係來貨貴，賣到二百五十果間係想搵笨姐

買左一條返黎試養。白金燈即晚就搶食急凍紅虫，但對之後餵既乾糧冇乜興趣，或者已經食飽左。條魚四圍游好難影，幅相影到好似發霉咁。實物既魚背同魚肚係閃銀色，得魚尾一截係淡紅色。鋪頭個缸有鮮紅色既，但銀色既部份少同唔夠閃

返貨

觀塘有鋪頭返左一批白金新燈，數量不明，每條六十零蚊。從未見過呢種魚既實物，只係上網同睇書見過相。本來諗住今日去睇，點知晌紅磡走既時候開始落雨，又濕又凍，懶得去。過一兩日再去，有貨既話就買一條試養，希望可以逐條買

經魚街返屋企，去返前日買魚間鋪。鋪頭缸魚既質素都幾參差，魚身紅色部份好淡。而屋企呢缸顏色深淺好一致，冇邊條特別淺色，於是新買果三條就好顯眼

淺色

新買果三條魚仔對乾糧同急凍紅虫都好踴躍，食到個肚脹晒，同本來養開既魚有好大對比，梗係晌鋪頭餓得太耐。舊果批魚初買返黎都好好胃口，大概係十月換過濾搞完一輪之後就開始厭食

新舊另一個分別係晌顏色。雖然係同一間鋪買既新燈，新買果三條魚身既紅色淺好多，價錢重貴左添。其中一條淺到近透明，驟眼睇似係綠燈多過新燈。呢種魚受驚顏色會變淡，所以買既時候冇留意到。希望佢地係未適應水質，而唔係因為品質唔好所以顏色咁差啦。養多個零禮拜都冇進展就應該係次貨

加價

有條魚近魚鰓既位置有一撻白色突出物，睇唔清係霉菌定霓虹燈病。照以往做法撈走，以免傳染其他魚。當認為條魚已經無藥可救，網上轉載某本英文書籍對人道毀滅既指引係「sever the spinal cord immediately below the head with sharp knife or sharp scissors」，大條既魚就應該用先用硬物打暈佢喎。自問手勢唔好，用杯水裝住條魚擺入冰格好過

幾個月黎死左幾條魚，買返三條補充，現時總數應該約十八條。原價五蚊條，買滿五條就每條四蚊，宜家要五個半一條，買滿十條先每條五蚊

青苔

隻洋蔥螺本來買返黎清青苔，最後個缸既青苔反而因此多左。晌貼牆果一面玻璃生左好多青苔，重係順住隻螺既行動軌跡，似乎係隻螺行過玻璃留低既痕跡，令青苔更易附晌玻璃面。近呢個禮拜隻螺趴晌玻璃冇乜移動，重有兩次啜唔實塊玻璃跌左落泥面，唯有丟左佢，下次經魚街買另一隻

急凍

都三月啦，凍成咁。支暖管好似越黎越弱，呢兩日缸水煲極都係得廿二度。魚蝦睇落冇乜受影響，隻洋蔥螺好似冬眠左，好少見佢郁。魚街賣既款式睇唔岩，想等到下年先換暖管，捱埋呢幾日都入春喇掛

補給

個發光氣泵睇極都唔順眼，終於換左個七十蚊既貴價日本泵，用落就同舊泵一樣咁靜。成套應該連埋一個醫院吊鹽水用果款膠喉鎖，買完先發覺冇。懶得同個老細拗，照用返舊既不鏽鋼氣鎖

另外買左洋蔥螺同網球蝦各一隻。隻網球蝦同大和沼蝦一樣大小，從未見過咁細隻。四點零拎返黎一直到熄燈前都相安無事，熄燈後就跳缸兩次。好在兩次都好快發現放返落水，最後唯有拎出廳既大缸。以往養網球蝦都試過跳缸，今次呢隻咁細，本來以為冇問題。可能呢個缸水流太慢同水位太高，適應唔到四圍游就唔覺意跳出黎