水蚤

原來同紅虫一樣，水蚤都係用禽畜糞便培植，本來諗住快快手餵完包豐年蝦就改用急凍水蚤添。豐年蝦卵來自美國大鹽湖，急凍豐年蝦比較乾淨，因為要用濃鹽水孵化，冇咁易撈埋淡水既細菌同寄生虫

上 hikari 網頁睇過另外幾款急凍魚糧，毛蝦 mysis shrimp 太大隻，而顫蚓 tubifex 既特點係可以適應嚴重污染既水質，睇怕培植顫蚓既環境都唔會特別乾淨。假設連急凍魚糧都會帶菌同寄生虫，咁暫時只有豐年蝦最安全

包裝

拎左幾本 sera 既免費小冊子。原來 sera 都有出脫水魚糧，以前冇為意，係因為個包裝太失敗。貨架閒閒地擺三四十款魚糧，好似藥樽咁淨係有幾行字，鬼睇到咩。買過一款 sera 粒狀乾糧，個樽蓋非常難開，而且完全冇魚食，自此對呢個牌子既魚糧有戒心

同系列重有一本講疾病既，應該最多野睇，可惜拎唔到。上年年尾魚街有鋪頭送 sera 既年曆，係大幅得滯冇掛出黎。咁落本做宣傳，好心就改善下個樽蓋設計同埋包裝

偏食

第一日餵急凍豐年蝦個反應幾好，所以先放心丟左剩低既紅虫，點知呢兩日又唔多願食，拆一格新既出黎從新解凍就好少少。餵紅虫果時一格起碼分三日，可能豐年蝦經過反覆解凍會變味，以後一格分兩日睇下點

急凍毛蝦同急凍水蚤都係十八蚊一排，豐年蝦真係唔得重有呢兩款可以考慮。餵紅虫果時已經唔係條條食，豐年蝦好似重衰。呢缸魚好揀飲擇食，又唔想剩係餵合成飼料。前後試過十幾款魚糧，最受歡迎竟然係 tetra 片裝乾糧，都唔知有咩好食

螺旋藻豐年蝦

最後都丟左剩低既紅虫。買左包急凍豐年蝦，每包十八蚊，比起十蚊三包既急凍紅虫算係高檔野。普通裝豐年蝦只需十三蚊，呢包貴五蚊，因為添加左「螺旋藻」。聽個名似係浮游植物，算係有肉有菜，均衡飲食

次貨

早排買返黎果條次貨，最近魚身紅色部份深色左好多，顏色已經好接近其他魚。第一條白金新燈買返黎既時候背鰭有缺損，已經復原。個缸有成近廿條魚，暫時睇黎都重維持到

第二條

星期五再買一條白金新燈，今次揀左好耐。新呢條比較接近普通品種，只係魚背同部份魚肚有銀色。又係對鏡頭好有戒心，影唔到清晰既相。佢既口味幾獨特，唔欣賞急凍紅虫，反而鍾意食乾糧

最近先知原來紅虫既飼料係雞屎，難怪以前餵生紅虫缸魚好易有病。生紅虫撈埋好多不知名虫仔，急凍虫聲稱有消毒，睇落係冇咁多雜質。食埋呢兩包都係轉急凍豐年蝦，不過睇怕係半年後既事

猶疑

條白金新燈一見到個鏡頭就匿晌草叢入面，好難影。當日揀呢條係見佢夠多銀色，連腹鰭都有，宜家睇返又覺得唔靚。今日晌魚鋪見到兩三條藍、紅、銀三色分佈得好均勻既，買果日又見唔到佢地。再買多條就接近廿條魚