奢侈品

開缸既計劃受挫，都係諗清楚先再買。本來打算開個吉缸，等水質穩定先種草同加 CO2，諗諗下都係行唔通。預定既造景以迷你矮珍珠同牛毛毯為主，用石塊做裝飾，有堆魚晌度好難插草同擺位

CO2 亦係個問題，應該晌舊缸試行一排，摸熟左個用法先。宜家個缸所有配件加埋都未使五百，一套 CO2 包括氣樽、錶頭、電磁閥、時間掣、細化杯，計埋已經成千，難怪有唔少人選擇 DIY。本來養魚只係想平平地玩下，買現成既嫌貴，DIY 又嫌煩，所以一直冇裝呢個

開胃

以往解凍後用牙籤挑幾條紅虫丟落水，缸魚一見到水面有人影晃動就縮埋晒，只有養得最耐果幾條大魚會食。諗左個新方法，解凍之後挑幾條放落水杯度搖勻，然後倒入魚缸，好似乾糧咁餵。可能佢地認得個杯，冇乜戒心，以往唔會食紅虫既都撲上黎搶，食量比以前大左幾倍

篤數

想搵個比現時呢個窄、高同深少少既缸，容量大約 25L。睇左好耐都冇岩心水，最後要左個 14x12x12 吋，自稱 23L。買返黎先覺得太高，拎返去換左個 17.5x11x12 吋，自稱 28L

拍埋舊缸一睇，大左成個碼，完全唔似 28L。自己計多次，駭然發現原來有 37L。個國產缸用日文包裝，盒面寫明約 28L，唔知點計出黎。容量係長 x 闊 x 高 ( 吋 ) 再除返 61.025，就退一步，當佢計個缸得八成滿喇好未，都成 30L 啦

今次係自己疏忽，唔想又捧返去換，乾脆送俾親戚，免得眼怨。以往買缸多數睇包裝寫幾多，冇寫明就問夥計，等佢地去篤機，亦遇過用心算但亂咁計既奇人。下次再買都係親自拎把軟尺去度，反正部電話有埋計數機

另外買左包泥同生物環。洗完濾桶，先換一半濾材，以免同時換新缸同濾材對水質造成太大衝擊

準備換缸

如無意外九月有工開，有大半個月時間開新缸。本來早應該洗濾桶同換一半生物環，但最後個缸荒廢左幾個月，青苔仲生到周圍都係。新缸會用返部份舊濾材，先搭新背景版，鋪泥，運作個零禮拜睇下效果點。種草、換燈同加 CO2 要等水質穩定再從長計議。上次換缸死左兩三條魚，今次大執都預左會有犧牲

返貨

搵到工賺錢換缸之前本來冇咩好更新，但個缸既青苔越黎越厚，焗住去魚街買返兩隻鮑魚螺應急。成個幾月冇去，好幾間鋪又執左位。此行最大收獲，係發現幾個月前賣白金新燈果間鋪又返左貨，而且係返左近百條，每條五十

白金新燈身上有發光細菌寄生，只能夠晌原產地入口，唔似得普通新燈咁能夠人工繁殖，所以數量少價錢貴。但今次呢批新貨令我懷疑係咪已經有魚場可以生產白金新燈，因為成缸都係幾個月大既幼魚，呢個數量唔似係晌野生捕獲既魚群當中揀出黎

核數

大半個月冇 update，換缸前都冇咩好記錄。貼牆果塊玻璃生晒青苔都由得佢，維持每星期換水一次同刷下正面果兩塊玻璃就算。頭先點數，似乎剩返十六條魚。間中會晌地下搵到一兩條乾屍，條白金新燈依然下落不明

急凍豐年蝦始終唔夠紅虫受歡迎，唯有餵返原產地好污糟既急凍紅虫。就好似食大排檔咁，越喇渣既攤販先越好食。缸魚可能嫌豐年蝦乾淨得滯，唔夠味道

遺照

買左個新腳架，比舊果個靈活同易走位，但部相機點郁都唔夠條白金新燈咁快。本來想幫死剩果條白金新燈影幅遺照，始終影唔到一幅清楚既

一直想知白金新燈會咁難買。魚身上既銀色條紋係黎自寄生細菌，人工環境培植唔到，只有野生捕獲既先會搵到白金版本。咁點解只有極少數新燈會有呢種菌寄生？傳染性高既話，檯面呢缸撈埋養左咁耐早就變晒種，晌魚街亦唔會炒到百幾二百蚊一條。可惜網上既資料好少，唔係讀呢瓣去圖書館都唔知點摷，搞唔清呢種菌點惹返黎