翻缸

山谷石貴左，大件既已經好少見。只好將本來果舊換個角度擺，配兩塊新既細石

只留返迷你椒草，其餘都係第一次種。有所謂泰國椒草，兩種不知名椒草，同三種辣椒榕

紅線椒掘起送俾人。上年八月買，得五條短葉幾乎冇根，當初仲以為岩細缸種

辣椒榕 brownie red & brownie blue

買左兩棵辣椒榕，會綁晌碎山谷石。brownie red 咁細棵都買係貪平，同見佢有五個芽，擺一個禮拜後出左塊水上葉

brownie blue 較大棵，條莖稍短同粗，得一個頭，取代左紅線椒成為全缸最貴。brownie 既相通常色彩鮮艷，晌鋪頭既實物多數未轉水，blue、red、ghost、purple 同 jade 棵棵差唔多，似乎要兩三個月後至知有冇買錯。聽講 red 冇花，期待棵 blue 會變色同晌水中開花

week 46

臨反缸前留影。紅針葉皇冠生得太快又有時唔紅，前景只留返迷你椒草，雖然走莖好深非常難剪，勝在生得慢。後排打算用幾款椒草，石罅擺辣椒榕。紫艷鉛筆一條跳缸死左，剩低既俾超紅鉛筆趕到缸邊，撈走左超紅鉛筆先出返黎

紅線椒由六塊葉種到兩大棵，丟左可惜，但一直種唔到全棵紅色，個缸又太窄

試過扭得太實令 12/16 既閘掣裂開滲水，今次到 9/12，膠扣離奇爆開左，要成對閘掣買返

week 44

同一間鋪返左批「超紅鉛筆」。初時以為佢將紫艷既公同乸分開賣，雖然貴都揀兩條想湊成對，又係養定左先發覺買錯。紫艷魚身既前半截、眼同尾鰭都唔應該有紅色，而呢兩條就有，尤其係魚尾，從顏色睇似係公乸各一

買果時唔識分，隔好耐先肯定佢地係火焰鉛筆，體型稍大，地盤意識強。成日互追，趕左紫艷去缸邊。餵完魚，周時見佢地既鰓邊會突左半截紅虫。以為係吞得太急梗親，試過撈起用鉗仔夾走。後來發現隔幾個鍾會由鰓蓋推返條紅虫出黎

撈走晒吐血穀精。唔知係咪迷你椒草既根太發達搶晒養份，唔止冇先前咁紅仲不斷溶葉。單獨種就好，放晌草皮中間太麻煩。紅線椒太長，唔配合個缸又難打理，會上網搵人換辣椒榕，換到就反缸

week 39

藍珍珠班馬逐條絕食餓死。紅衣夢幻旗顏色淺，成日匿埋水底，食晒蝦仔之餘仲啄大蝦，迫到每日有一兩隻跳缸，全部撈走。買返四條女王燈吸油膜，同六條紫艷鉛筆。角螺既殼溶到就黎見肉，換左六隻新既

紫艷鉛筆向來要八十幾蚊條，宜家居然百一蚊有四條。見慣魚鋪既都好深色，雖然今次全缸都唔紅，照買黎試下。養左幾日，得背鰭有一撇紅班。冇買錯魚既話，就係本來成缸得返魚乸先減價促銷。鋪頭既魚好多時未發色，買返黎養定左先知上當都太遲

有棵紅針葉皇冠出奇地高，幾日後先發現係紅線椒。兩棵已經夠迫，想剪爛呢條走莖，但隔兩日又發芽。好在每次生一片葉好易剪，最難搞係缸邊生到突出泥面既根鬚。當初聽講好易枯，諗唔到有分株又生走莖

幾棵吐血穀精俾角螺扯起左，重新插過。近排郁動多，全部褪晒色

week 35

之前果四條紅衣夢幻旗，有一條顏色特別淡。當時以為佢係母魚，背鰭尖長同冇白點既公魚就會深色啲

最近睇到有人懷疑根本唔係性別同水質問題，而係幾款品種唔同但外型相似既魚撈埋黎賣，於是買親都抽到啲特別淺色，而且養極都唔會轉紅

今次分批買左八條，因為每次都有一兩條唔靚既。一撈起入袋就全部褪晒色，要安頓幾日先分辨到，諗住留返五六條

藍珍珠斑馬剩返七條，又有一條開始絕食。每次只係一條有事，逐條咁餓死好難搞。冇晒女王燈，水面又有返油膜同腥味

幾年黎都用氣石出 CO2，間中熄掣之後會有水倒流入膠喉出唔到氣，要換粒新既。上禮拜叉完氣，每晚熄掣條喉就入水，最多到兩呎，換左新氣石都唔得

日本製既防倒流既要過百蚊，平既又聽講冇用。用左 CO2 六年一直冇裝防倒流，今次換條新氣喉試下先，有 2mm 厚，比舊果條硬好多

week 33

近兩個禮拜每日浮起一堆迷你矮珍珠，想救又無從入手。零七年種過烏拉圭草，當時用青龍石，水既硬度太高，唔夠光又唔夠肥料，種左個幾月搞到追光又變黃。掘走迷矮就插烏拉圭草，先發覺會高過迷你椒草同吐血穀精，顏色亦唔襯

最後買兩包迷你椒草鋪滿前排。兩日後有幾棵既葉全部溶晒，其實唔算易種，但捱過頭幾日就生得慢又貼地，唔使成日剪。影全景相，唔想魚清背景矇，就變左背景清魚矇，除非換相機

趁前排騰空左，將太迫既穀精拆散再種，第二大果棵一開二。呢兩個月郁左幾次，幾棵穀精既紅色都淡晒

絕食既女王燈卒之死左，剩低兩條又唔食野。反缸前養得好好，經常生蛋又勤力吸油膜，可惜死於茶籽餅。後來買既都唔清油膜，等佢地死不如撈走

買四條細既紅衣夢幻旗，一條瘦到食唔到野同打側游，另一條好健康但脊骨畸型。入袋果時睇漏眼，撈走，再買三條。一落缸就追蝦仔，條魚雖然細都見佢食到蝦。幾日後已經冇乜蝦毛，可以消耗過多既極火蝦