紫艷鉛筆

再買兩條紫艷雄魚，雌雄比例變成 2:5。返貨當日鋪頭有四十幾條，隔四日再買得返廿條左右。希望賣晒雄魚會減價，想添多一條雌魚

上次晌花地灣買得三條係太少。今次一黎就五條，適應快好多。第二日就唔匿埋同食冰虫， 過兩日連 tetra 菜片都食。新買兩條當晚就開口，跟大隊游，只係搶食唔夠快同比較淺色

一如以往唔怕鏡頭，但雌魚少游出黎好難影到。其中一條背脊既黑線變粗左，好在魚肚係有紅斑，同雄魚會一齊游，證明唔係黃金鉛筆

week 14

最後果條紫艷鉛筆晌九月底卒之死埋。小丑燈太淺色，換大肚銀燕。銀燕出名鍾意跳缸，但呢五條未跳就死左大半。有食冰虫，但逐日死一條。試過白翅玫瑰旗，始終得灰白色。可能個缸太光唔適應，同小丑燈一樣

晌一間大鋪既閣樓竟然搵到缸紫艷。雌雄都有，養定晒顏色好鮮艷。但要三百八十蚊一對，只可以得閒去探下等減價

將黃金鉛筆當係紫艷賣果間鋪，晌上星期六居然真係返左批紫艷。雖然未標價錢同品種，問店員之前已經好有把握冇認錯。起碼有四十條，似係岩岩落缸，都好淺色，勉強睇到係雄魚比雌魚多

八十蚊條，計埋匯率平過花地灣。驚又會無故絕食唔敢買，掙扎好耐先決定要五條。今次有得揀，要左三條公。都盡量揀細條既，但比起閣樓果批係大左啲。落缸第二日已經食冰虫，第四日試餵乾糧，tetra pro color 得一條啄完冇吐出黎，tetra vegetable 有幾條勉強肯吞。會每日各餵一餐乾糧同冰虫試下，想佢地接受多一款魚糧

有上次既經驗，會少啲換水，每星期最多四份一。停用 ECA 同 excel，step 2 就照舊隔日 1 ml

加左兩條小精靈。除左食藻，仲會晌水面反轉游吸油膜，但以往養親都唔長命。右後排既椒草溶得太多，換左幾棵高身些少既綠溫蒂椒。藍網球蝦晌石下面掘隧道，撈走左

week 10

兩條女王燈太大條，將絕食既紫艷趕埋一邊，乾脆撈走。後來連黃金鉛筆都撈埋，當初唔係魚鋪標錯名根本唔會買

買左對葦蘭提飛船，幾日都唔開口，魚身亦冇顏色。缸水冇泡亦冇腥味，唔知咩問題。撈走換左九條一線小丑燈，用黎試水。兩日內死剩七條，乾糧紅虫都食，只係唔夠深色

仲買左隻藍網球蝦，用吸盤遮住其中一個雨淋管背面新開既窿，令水流加快，但養左兩日仲未開始濾食

睇住第二條紫艷都就死，辣椒榕同椒草溶既葉多過新長既葉，連新買既 2211 都開始有氣泡聲 。呢個月好多挫折，brownie blue 多左粒新芽係唯一好消息

絲蚯蚓

撞啱有鋪頭用新鮮絲蚯蚓餵魚，即刻俾十蚊買一份。以前餵生紅虫搞到缸魚有病，食剩既仲會變蚊，絲蚯蚓又係出名污漕，係紫艷比其他魚貴太多先值得搏

絲蚯蚓成日捲埋一堆，容易焗死同發臭。用細膠樽裝八成滿水，駁氣泵，餵之前撈出黎洗同換水，咁樣保存左五日，又唔覺有死虫

臨到餵先知原來會捐入泥底，要好小心咁鉗起幾條放晌條紫艷面前。餵生餌係開返口，可惜隔一兩餐先食一兩條。食剩既要吸走，否則真係會鑽入泥，好在黃金鉛筆同另一條紫艷會扯返佢出黎

到買到個玻璃兜，可以放一舊晌入面由得佢地啄，條紫艷又唔肯食，第二日仲死埋。想絲蚯蚓唔缺氧要開大氣泵，好嘈，每日要洗又麻煩。輪到另一條紫艷絕食，明知冇得救，食剩果九成半丟晒

紫艷鉛筆

紫艷鉛筆初時唔怕燈亦唔怕人，好適應冰虫，只係唔食乾糧。到第三個禮拜，加左一樽蓋既 excel 除青苔，第二日深色果條突然絕食。之後換水同洗濾桶都冇用，全缸得佢餵咩都唔食

試過生豐年蝦、急凍豐年蝦幼體同生豐年蝦幼體，直到個幾禮拜後，買到生既絲蚯蚓先有轉機。雖然唔係餵親都食，但至少每隔一兩餐會食一兩條，平時就匿晌葉底。食三四次之後，就死左。第一幅相係開始絕食果時影，第二幅係死前果日，餓兩個幾禮拜明顯褪左色

佢臨死前一兩日，連淺色果條都開始唔食野，唔知為乜，至今近兩個禮拜。絲蚯蚓太麻煩已經冇餵，呢條匿埋左個幾禮拜，近兩日逢親餵魚就游出黎。見到冰虫會追，啄兩下就游走，會留晌玻璃前等，唔知係咪等餵生餌。早兩日有四五隻孵左冇耐既蝦毛，宜家搵唔返，可能俾紫艷食左

魚街得火焰鉛筆，冇鋪頭入紫艷，就算有都要諗到係咩令佢地絕食先好再買

week 6

青苔生得好快，早已經停左 step 2 同 ECA。有紫艷鉛筆就唔多敢落 excel，唯有隔日刷玻璃

絕食果條紫艷終於死左，落缸近兩星期只係晌第二日食過一條紅虫。見另外兩條會啄青苔，以為係偏草食性，特登買筒菜片，得黃金鉛筆同女王燈捧場。為左引呢條紫艷開口，仲買左包生既豐年蝦，可惜買唔到生既絲蚯蚓

兩條紫艷唔食片裝糧。有兩隻極火蝦都少左隻眼，但至少冇再發現蝦既殘骸

kedagang 晌近根部有粒新芽。brownie blue 冇轉色，兩片舊葉開始枯

黃金鉛筆

兩條紫艷鉛筆雄魚通常貼住泥面咁游，或者匿晌葉底，會啄玻璃駁口既青苔。雌魚浮晌上層少游動，就算遇到雄魚都各有各游，越睇越覺得雌魚既行為唔尋常

晌台灣既網路相簿搵到真相，原來五月買紫艷就開始搞亂晒。當時魚鋪全缸都冇紅色，得背鰭同尾鰭有紅斑。諗住只係未顯色，之後就懷疑係雄魚賣晒，買錯左六條雌魚

到六月有批叫「超紅鉛筆」既，以為只係將紫艷既雄魚改名分開賣，買兩條返黎打到雌魚半死。後來先知佢地唔係紫艷鉛筆，而係火焰鉛筆 Nannostomus mortenthaleri

睇左好多幅相，有信心分辨紫艷同火焰先去花地灣。有真正既紫艷做比較，先發現原來果批所謂「雌魚」，根本唔係紫艷鉛筆 Nannostomus rubrocaudatus，而係黃金鉛筆／寬帶小型紅鉛筆 Nannostomus sp. cf. marginatus，即係最初果間魚鋪標錯名

黃金鉛筆似係未有正式名既新種，唔常見，外型非常似紫艷雌魚，唯一明顯既分別係紫艷既肚有一撻紅斑。另外同小型紅鉛筆 Nannostomus marginatus 又好相似，係條黑線粗啲同少左條紅線

黃金鉛筆靠睇臀鰭有冇紅色黎分性別，咁睇得一條有可能係公