brownie blue, week 10

反缸後第二日餵魚，三條新燈冇食，成日匿晌 twinstar 反應器下面。到第五日缸水逐漸清返就買六條新燈，當晚餵乾糧都有食

每日都死一兩隻蝦，再買多六隻大和藻蝦。幾個月前有二三十隻藍蝦，係呢幾年繁殖出黎。有大和藻蝦後藍蝦就變少，宜家得返幾隻

匙羹萍有啲追光，將 LED dimmer 由 4/8 調高到 5/8。twinstar 熄左四日，綠藻湧現，已經開返

想趁少魚清晒啲鹿角藻，每日換水三分一同用針筒打 3ml excel。左後排既一大片鹿角藻將近枯晒，散佈晌山谷石既黑毛藻都有啲變灰左。鹿角藻既殘骸冇甩出黎，蝦同螺唔食，人手清唔到，買左兩條小精靈試下

excel 用多左，brownie blue 暫時睇唔到有影響，有出新既根芽同葉。鹿角藻有蔓延，停 twinstar 後仲多層綠藻

反缸

禮拜一朝早全缸變濁，十四條新燈得返三條游緊，一條飄浮緊，其餘訓低晒，大半斷左氣。即刻撈魚，換水三分一，停 twinstar，加大氣泵，停餵魚。浮緊果條當晚死埋。剩低三條新燈同兩條女王燈睇落冇唔妥

twinstar 晌上月底洗濾桶前一個禮拜裝，excel 係照平時用量，事發當日應該冇停電，又唔會晌過年洗大廈水箱。除左前一日缸水有些少變矇，今次反缸係唔知起因亦冇先兆

brownie blue, week 9

停左 ECA 同 seachem excel，加大 CO2，隔日換水四分一。綠斑藻消失，但缸邊多左幾撻藍綠藻，鹿角藻爆發，新燈有氣促，食量少左

證明唔可以停晒 excel。結果要較細 CO2，隔日用針筒打 3ml excel 逐少清除藍綠藻，而鹿角藻受左 excel 會先變紫色再變灰枯萎。買多左四隻大和藻蝦，已死一隻

上禮拜有一截莖稍為變啡，以為會溶，好在幾日後轉返綠色，未溶既根長返新芽。老葉同根多左鹿角藻，又唔能夠直接噴 excel，當買到 easy-life 既 algexit 會試用

twinstar m3

死一條新燈，剩十四條。兩隻鮑魚螺有日唔見晒，當晚晌濾桶隔離搵到一隻，離魚缸兩呎半，仲黐實牆身。起碼離水六個鍾，放返落缸居然冇事

多左綠藻同啡藻，再買兩隻鮑魚螺。但近日太凍，支暖管長開得 21~22 度，鮑魚螺同大和藻蝦都唔多郁

上一次叉 CO2 應該兩年前。以前去新基消防，叉一次氣 35 蚊。今次拎去魚街貴 15 蚊，但唔使辦公時間趕去

似係離棵草太近噴 excel，呢個禮拜唔單止老葉幾乎甩晒，連新根都溶。近幾日冇惡化，係怕蔓延到條莖都溶埋

excel 落太多 brownie blue 會溶，停 excel 又易爆藻。想唔依賴 excel，除左較大 CO2 同密啲換水，終於決定試 twinstar。m3 係俾 20~50L 水用，賣 500 蚊，對陌生既韓國牌子冇乜信心

呢類電子除藻器三年前就有，係最近至留意到。原理似係用電解造出 H2O2，破壞藻類既孢子。對黑毛藻無效，但抑制到綠斑藻、啡藻同絲藻都少好多麻煩

裝機前盡量刷走啲藻。開機後每隔大概八分鍾電解一次，每次三十秒，分半鍾後再電解一次

brownie blue, week 7

brownie blue 近日甩左六七片葉。多數由葉柄成片脫落，有幾片斷葉唔知係咩造成。老葉會甩唔出奇，發左色既新葉都有甩，怕係落多左 excel 搞到溶葉。考慮緊裝 twinstar 除藻器，但好似對黑毛藻無效

brownie blue, week 6

將匙羹萍修薄左。翻缸後泰國青椒長得非常慢同矮。有插 ADA iron bottom，每星期落 12 滴 ECA 同唔定期加 step 2，唔應該係缺肥

拆左魚絲，失手整斷一粒晌中段有三片葉既小芽，原有既四個頭冇事。老葉同根係多黑毛藻，只可以隔日用針筒噴 3ml 既 seachem excel 晌周圍。早兩年既經驗係 kedagang 好受得 excel，但 brownie red 同 blue 好易會溶

brownie blue, week 5

匙羹萍生得好唔均勻，貼住山谷石既位迫到疊起，要剪薄啲

比較左幾十棵 brownie blue 既相，特別係大陸流行既 11 藍。共通點係得顏色，葉形有闊有窄。睇過一棵 11 藍係窄葉有皺邊，同時又有幾片大一倍，圓而且闊既新葉

以後買辣椒榕要揀已發色既，唔使似呢棵咁等佢轉色。萬一根本係買錯，損失左錢又嘥時間