有起色

今日清左好多，只係重有少少灰白色。見好多網友推薦一隻活性碳，決定買黎試下。網友話賣 38 蚊，我晌一間賣 38 蚊既鋪買完，行過對面街就見到賣 32

換左一半水，因為掛濾唔夠位擺，唯有夾硬放晌生物環上面。效果似乎幾好，起碼感覺上係清過未換之前。其實唔應該宜家先試碳，因為缸水本來已經清左，加左之後對比都唔大

過一兩日穩定左就會抽起包碳，開始加返液肥。小水蘭生得比預期慢，淨係靠根肥可能唔夠

另外買左 0.2L 生物環，拎左少少黎填滿個掛濾，順便掉埋裝住生物環既網袋

新魚糧

早排有朋友去日本，想託佢買一樽香港代理冇入貨既 tetra neon，但我估佢都唔識買，所以冇為難佢。今日買左呢款 tetra color pro，廿蚊，買完行過隔離鋪就見到賣十五蚊。去每年 update 一次既 tetra 網頁睇，果然未有 tetra color pro 既資料，得 tetra min pro，中文名叫「德彩白金飼料」，個名都幾大陸

缸魚既反應好踴躍。乾脆掉左食剩果少少 tetra min 同 tetra color，以後主要餵呢個同急凍紅虫

想影張魚群搶食既相，可惜缸水全冇起色，唯有淨係影魚糧。今日本來要買多包生物環去裝滿個過濾，又唔記得買。想買網球蝦，但太大隻，買唔落手。用玩具顯微鏡睇過缸水，見到有類似藻類既野晌水度，但放大率唔夠高所以睇唔清楚。晌未知道缸水點解咁濁同埋我既耐性未消耗晒之前，唔打算大搞

屢敗屢試

前日個溫度計跌左落水，死左。今日去魚街買過新既，順便重新綁過條電線，再用索帶固定晌其他電線上面，冇咁礙眼之餘，個吸盤就算再甩都唔會成個溫度計跌落水

幾日前起身見到檯面有條魚乾。大概每隔個零兩個月就會有條魚跳缸自殺。養藍眼燈果時就跳得更頻密，每個月都跳兩三條。通常都係夜蘭人靜既時候跳。原因不明，可能訓得唔好

兩包高級活性炭已經拎走左，除左每日換水暫時唔打算做其他野。早兩日去養魚 forum 度求救，有網友轉載左一篇台灣人寫關於水質混濁問題既分析。台灣人篇文既科學根據好似好充份，起碼晌高考讀生物同化學既我都覺得好有說服力，雖然呢兩科我只係勉強及格。照咁睇缸水變到蔗汁咁，根本唔係硝化系統可以搞得掂既。我都唔知係幾時開始迷信硝化系統可以令水質變清，應該係幾年前初學養魚就誤會左

今日晌魚街見到好多日文包裝既產品，聲稱可以將黃泥水變成蒸餾水咁清澈。但晌未搞清楚點解缸水會濁成咁之前，都係無謂再o徒錢買野喇

同場加映一隻灰白色既蝦。當蝦身由透明變成灰白色，通常都好快會死嫁喇，呢個算係養魚人既共識。以前我養既蝦死前都係咁上下樣，但圖中果一隻已經有成個月係咁既顏色，起居飲食同其他蝦冇分別

擺晌檯面呢個迷你魚缸，長闊高都只係居居十零吋，但內裡難以理解既野實在太多，晌個缸面前既我真係好渺小

高級活性碳

事實證明，高級活性碳係搵笨既。十蚊兩小包既高級貨，同十蚊三大袋既平價貨效果一樣，都係吸唔到色，至少唔會好似包裝上果兩幅使用前同使用後既相咁神奇

換左四成水。魚既胃口算係咁，乾糧冇乜興趣，但餵急凍紅虫總算肯搶。蝦可以不理，大和沼蝦冇咁易死既

失敗

事實證明唔可以咁樣洗生物環，就算用缸既水亦唔得。生物環同泵既出水位都有一層曖昧既啡色漬，係以往用活性碳加綿呢個組合既時候冇既。今次缸水搞成咁，似乎同呢堆漬有關。遲下得閒要拎個玩具顯微鏡睇下到底係乜野黎

今日丟晒舊既綿同生物環，換左 0.2L Mr. Aqua 既 S size 生物環同抽起其中一塊綿，以後只放一塊。0.2L 其實塞唔滿個濾水，大概重爭五六粒先裝滿，不過都係唔好塞咁實咁，費時好似上次咁。今次包生物環果個網既網孔大左，睇下可唔可以改善水流

擺左兩包貴價既「高級活性碳」落去吸色，就係晌水面好似浮屍果兩包野。最奇既係到宜家都未死過魚同蝦，不過呢排都唔多食魚糧，水質又成日變，要病要死就係呢個時候喇

油膜

近排前水面成日泛起一層油膜。本來都唔係第一次見呢樣野，以往好快會消失，但呢次層油出現左好耐，換完水冇幾耐就有。而且水面冇咩水流，成缸死水咁，於是自換生物環以黎第一次同時洗綿同洗生物環。綿就一如以往用水喉水沖，生物環就只係用魚缸既水求祈浸下。洗完再換埋水，第二朝就現眼報 ... 成缸變左蔗汁咁既色

自從八月開缸都未試過矇到咁。今次出現左兩個問題，首先層油膜從何而來？上網查過，有人話係代表水入面養份太多，層油膜其實係蛋白質。但我餵食既份量一直都好穩定。新買既肥料我都係隔禮拜搣碎一粒塞入泥底，亦唔應該關佢事。今日去魚街睇過吸油器，冇一件係裝得落個細缸度。有人話用牛油紙或者廚房用既紙可以吸油，下次會試下。重有人用黑摩利黎除油，因為呢種上層魚會吸油。但成缸都係新燈冇理由擺條黑摩利入去丫，一係就養七條黑摩利擺個擋煞既風水陣算喇

另一個問題係硝化菌。個濾水咁唔穩定，可能因為我換水太密令到硝化菌生存唔到。但其實早排缸水係好清既喎，都係照咁既份量換水姐

下次再有油膜或者水流太慢，我都唔會再洗生物環，唯有當睇唔到層油膜。宜家都係等聽日先再換水，反正魚蝦都活得好地地，無謂自尋煩惱

小水蘭

早兩日買多一包十蚊得五棵既小水蘭，插埋晌原本既空位度。感覺上宜家係密左少少，但離舊缸果種草叢既感覺重差好遠。就算種得返以前咁密﹝新缸大左，但用返舊燈，唔知夠唔夠光種草﹞，始終都唔係我想要既效果。一向都係想種草皮既，只係設備所限變左種草叢

新燈好細膽，想影相都要偷拍，貿然移部手提埋去會縮晒晌底。平時佢地都係晌中下層度游，食飯先會游上面。小水蘭點種都係矮，提供唔到遮蔽既地方，好處係會好似士多啤利咁打橫生。皇冠草夠高，但葉太疏，而且生得唔密，連草叢都做唔到。莫絲要纏晌沈木度，就咁種落泥會生到一條條四圍飄，但搵左幾年都冇岩心水既沈木。要繁殖新燈既話，始終都要搵到一種可以晌弱光同缺 CO2 既環境生存到高身植物，至少要有個缸既三份之二咁高，同埋葉要密 ... 不過有咁既野應該一早發現左

量產新燈

晌部機摷返一篇好耐之前晌唔知乜野外國網頁抄低既新燈繁殖指南，裡面提到水既溫度、酸鹼度、硬度、魚缸既佈置、魚糧等等繁殖條件

用 ADA 黑泥做底一定係偏酸既，pH 會比較易搞，GH 真係未驗過。九月尾到十月開始入秋，要做到 76F 唔成問題，宜家都係 80F / 27C 左右姐。燈光方面唔難搞，生餌就煩少少因為宜家都係以餵乾片為主，間中有急凍紅虫。最麻煩係冇一個咁大既繁殖缸，個舊缸得 12 x 7 x 7.5 似乎差太遠。小水蘭唔算係咩 fine leaved plants，但冇燈冇 CO2 其他野又種唔到，早排買既三角莫絲都放棄左喇

個鬼佬話新燈唔係大規模咁生產 (are not bred on a large commercial scale because of the difficulties)，我對呢點好有保留。從魚街廿蚊五條，一年四季源源不絕既魚苗睇黎，冇乜可能係由南美直接入口既，應該同紅蓮燈一樣已經可以大量人工繁殖，只係唔知用咩方法姐

酸鹼值

早幾日晌魚迷討論區見有人講緊要咩條件先可以繁殖到新燈。首先係要養到咁上下大條，然後突然間改變水既酸鹼值去誘發交配行為喎。其中一個做法係半個月唔換水，然後一次過換好多水落去，咁樣偏鹼性既水喉水﹝當然係事先擺左過夜除氯﹞就會改變本來偏酸性既水質

聽落好似好簡單，晌我果缸要試呢個辦法就有少少問題。宜家我係隔日換半缸水﹝冇錯係半缸，正常應該係每個禮拜換三至四份一水﹞，唔知半個月唔換會點。換左生物環成個月，對呢套野重係冇乜信心，唔知到底可以支持幾耐﹝開左學都冇可能換得咁密，到 sem 尾多野做隨時一個禮拜換一次水﹞。個缸用泥底本來應該係長期偏酸性既，但我換水換得咁密，都唔知宜家既 pH 係點。可能真係要花幾十蚊買套 pH test kit 黎驗下

硝化菌

相比起以前用開既活性碳﹝化學過濾﹞同濾綿﹝物理過濾﹞，生物過濾用既生物環上既硝化菌實在太唔穩定。我個缸又得十零吋，小小既外來干擾晌細缸度會放到好大。早兩日預防性用藥，掉左五分二粒藥錠落去，同埋抽起其中一塊綿洗一洗。結果缸水到今日都重係好白茫茫咁。以往用活性碳同濾綿既組合，隔幾日就要拎出黎沖水係有少少煩，唔似得宜家咁淨係換水就搞掂，但至少水質穩定好多，唔會搞小小野就濁幾日。希望慢慢會摸索到點樣同硝化菌共存