反缸第五日，仍然好清澈。越黎越肯定呢個半月個缸烏煙瘴氣既起因就係 tetra 片裝肥料。本來諗住加返液肥，但呢幾日總係覺得個缸有唔妥。睇返九月廿二號影既相，發現宜家種緊既好可能唔係小水蘭
上次反缸，平時幫襯開既鋪頭冇貨，去左陌生既鋪頭度買草。老闆聲稱係小水蘭，但價錢就只係平時既一半。缸草幾日前開始變黃。本來新種既草因為未生根就預左會有枯葉，不過枯成咁就前所未見。例如相中左下角果棵，有塊葉既尖端有一截黃左，而印象中小水蘭係由葉既底開始枯既
睇返以前既相，小水蘭葉片尖而長，而呢批草既葉片中段窄而葉尖闊。買果日都已經留意到個樣有小小唔同，不過冇為意，以為佢只係好似矮珍珠既葉咁受 CO2 同光照既影響
呢批草睇黎好唔適應，怕且又要破財再買過正版小水蘭
