USB

曾經有段時間熱衷於 DIY 電腦風扇黎幫魚缸降溫，經過幾次失敗就冇再搞。其實風扇唔係必需品，就算夏天最熱果一排個缸都係廿八度左右，魚蝦都重頂得住。當時有諗過用 USB 風扇裝晌魚缸，只係一直搵唔到價錢合理既火牛唯有放棄，總唔能夠長開部電腦供電俾風扇

早兩日見到款十蚊既 USB 火牛，想買個黎玩。今次唔整風扇，而係駁 USB 光管仔。據講想繁殖燈魚要另設一個魚缸用黑色板圍住，捉幾對魚入去，再裝一盞好暗既藍色燈模仿月光引誘佢地交配喎，值得一試既

洗太平地

雖然缸水好清，都照例拆個濾桶出黎洗，等到開始濁先洗已經遲。今次洗晒所有膠喉包括雨淋管，由上年到宜家積左好多污垢。洗完之後水流明顯快左，到下個月再洗要換一半生物環

順便拆走支暖管。今日本來想買埋新既，因為舊果支唔夠力煲熱缸水，又唔可以全支浸入水，阻住抹玻璃。諗諗下都係睇多一排先，反正早兩年開關冷氣既溫差有三四度缸魚都冇事。想買 hydor 支 theo 但唔滿意佢既外形，希望等到入冬會有新款

新時間掣

舊既定時開關用左五個月，近排開始有噪音。間房靜既時候就聽到撻撻聲，重嘈過氣泵同濾桶。本來以為舊時間掣入面係個電字鍾，原來單純用機械計時。新買呢個八十五蚊，唔駛轉駁旅行插頭，其實同機械掣差唔多價錢

生蛋

好可惜唔係新燈，而係廳果兩條神仙魚。有日起身發現兩條魚死守住條膠喉，條喉黏左幾十粒魚卵，即刻上網睇下應該點處理。神仙產後會守住魚卵，趕走游近既魚，重會分泌體液俾孵出黎既魚仔食。神仙好易受環境影響，水質唔適合或者受外界干擾，就會食返魚卵。可以將魚卵拎出黎人工孵化，但易發霉，存活率低

條喉連住濾水唔可以成條拆出黎，又唔想括起堆魚卵，最後維持原狀。魚卵本來七十二小時內會孵化，到第二朝果然唔見晒，不過唔係孵到魚仔。可能係夜晚熄燈刺激到對神仙，又或者其他魚趁佢地訓左黎偷食。網頁都話頭三胎通常唔成功，下次再生蛋會想辦法搬出黎

垃圾

養左幾年魚，儲埋好多唔等使既廢物。部份係過左一段時間唔再岩用，亦有根本就唔應該買既，例如呢條野。接駁濾桶果兩條四呎半膠喉用耐左就會積埋一層污垢，就咁用水沖好難洗乾淨，於是買呢個，當係鮑魚擦咁通渠。點知原來唔夠長，起碼爭左一呎。張包裝紙好似係寫住五呎長，但晌魚街已經丟左，唔知係自己睇錯定係佢印錯

天光墟

今朝去左趁墟，對上一次去應該係兩年前。六點九左右去到，一路行一路落雨，到七點半越落越大開始收檔

其實得個睇字，冇咩岩買。大多數攤販做批發，一地都係魚同烏龜，紅虫要用個磅秤，斷斤賣。除左職業魚販，有好多業餘人仕拎自己配種既魚例如孔雀黎賣，重有檔賣另類寵物既示範玩蜥蝪同蝎子。水族器材同藥物都係大陸貨，用唔著。最後幫屋企人買左幾條孔雀就走人

等開飯

近呢個禮拜魚既食慾好左好多，可能因為天氣熱左。平時等開飯就游晒上黎，食飽左先潛返入草叢

缸草定晒型，冇乜生長過，連修剪都慳返，睇黎單靠液肥種到咁已經係極限。長遠目標當然係砌一個似樣既造景，宜家呢堆亂草只係令個缸唔會得堆泥咁單調。遲下有閒錢會加 CO2，燈就應該唔換住。換燈要先解決散熱問題，晌魚缸裝風扇會好嘈，而且檯面有舊咁光既野都好難頂

水蚤

原來同紅虫一樣，水蚤都係用禽畜糞便培植，本來諗住快快手餵完包豐年蝦就改用急凍水蚤添。豐年蝦卵來自美國大鹽湖，急凍豐年蝦比較乾淨，因為要用濃鹽水孵化，冇咁易撈埋淡水既細菌同寄生虫

上 hikari 網頁睇過另外幾款急凍魚糧，毛蝦 mysis shrimp 太大隻，而顫蚓 tubifex 既特點係可以適應嚴重污染既水質，睇怕培植顫蚓既環境都唔會特別乾淨。假設連急凍魚糧都會帶菌同寄生虫，咁暫時只有豐年蝦最安全

包裝

拎左幾本 sera 既免費小冊子。原來 sera 都有出脫水魚糧，以前冇為意，係因為個包裝太失敗。貨架閒閒地擺三四十款魚糧，好似藥樽咁淨係有幾行字，鬼睇到咩。買過一款 sera 粒狀乾糧，個樽蓋非常難開，而且完全冇魚食，自此對呢個牌子既魚糧有戒心

同系列重有一本講疾病既，應該最多野睇，可惜拎唔到。上年年尾魚街有鋪頭送 sera 既年曆，係大幅得滯冇掛出黎。咁落本做宣傳，好心就改善下個樽蓋設計同埋包裝