day 12

開始有草向橫生，令人鼓舞。青苔越黎越多，既然短期內唔諗住反缸，都係買返兩隻笠螺頂住先。舊缸既草太高太密，唔願意上鏡既魚好易搵掩護。趁新缸冇乜雜物，幫白金新燈影返張

day 10

水清左少少，草冇乜起色，拔走左狀態最差果幾棵。大多數草向上生，出現追光現象，兩支光管似乎唔夠力。換水果時加左液肥，再觀察半個月睇下點。有舊石變左紅色，幾礙眼，影完相就拎走左。開始有青苔，但唔諗住買笠螺，免得遲下反缸又整死，或者會試分段光照。據聞青苔對光線反應比較慢，開燈後要隔幾個鍾先開始光合作用。用時間掣間歇性開關燈就可以抑制青苔生長

day 8

洗完濾桶缸水仍然矇矇地，據過往經驗，呢個時候除左每星期換水就唔好多手亂搞。由開缸至今大概有一半草枯左，剩低既狀態都麻麻。魚街既新燈通常都晌中層群游，本來以為換左個缸魚群會向上游，唔知點解呢缸魚會咁固執。中上層長期都冇魚，係時候諗下買其他品種混養，不過都要等個缸穩定先。缸草真係唔掂既，可能要反缸再搞。對呢款啡色石唔多滿意，想去天光墟搵下有冇石賣

day 6

添左少少泥，移左幾舊石。細化杯噴氣既嘶嘶聲都幾嘈，搬左去後面。水仍然係矇，可能因為尋又搞起唔少泥粉。聽日洗濾桶，入面應該積左好多泥塵。草冇乜起色，要枯既都枯得七七八八

day 4

配左一支 tropica 液肥，但好多草已經用唔著。陸續有枯草浮上水面，證明前日種迷你矮珍珠既手法有問題

day 3

搬遷前先將新缸既水換三份一。魚蝦暫無死傷，仲即晚食返野，因為餓左兩日。兩隻螺黏實塊玻璃，夾硬撬出黎既時候整死左，從未見過咁固執既。部份草枯萎，再過幾日開始生根先落肥料。魚群仍舊聚晌水底，希望只係未適應新環境

day 2

目標係複製一個網上教材既造景，等到摸熟左套 CO2 同其他新器材既用法，約半年後就反缸自己再砌一個。暫時好似唔多成功，首先搵唔到同類石頭，最後買左啡色既。質地好脆，對形狀唔滿意可以人手搣爛佢再砌添，都幾方便既。黑泥帶酸性而石會令水質變鹼，暫時未知缸水既 pH 會係點

迷你矮珍珠好難種，插入泥既時候似乎已經整死左唔少。大致上鋪好就開氣泵擺一日，等缸水既氯氣散左先接駁濾桶，以免影響桶內既硝化細菌。大致上控制到 CO2 既出氣量，開左一陣，少數冇乜受損傷既草已經出泡。再擺多一日就移堆魚同蝦過新缸。睇個勢，個零禮拜就知死左幾多草，就算一切順利，都要兩個月先鋪得滿個缸

開缸

卒之買左個 16x10x11 既，約 28L，配兩支 8W 既 T5 管做照明。改用珍珠板做背景，因為夠厚，可以裁一個虛位啪埋燈罩個架，填補魚缸同牆身之間既罅隙。新買既細化杯未用已經整爛左，要換。度好個景點樣砌就可以買草同石，暫時決定棄用牛毛氈，只種迷你矮珍珠。汲取上次換缸既教訓，今次會等新缸運作幾日先搬堆魚過去

二氧化碳

種一片綠油油既草坪係養魚數年黎既宿願。受設備所限，凡係對 CO2 同光要求高既前景草以往一概種唔到。卒之買左套返黎，單錶頭氣樽連電磁閥、細化杯同兩米專用氣喉盛惠七百五十，比預期平。尚欠魚缸、石塊、草同燈，湊齊就可以開缸

睇辦

搵到長闊高 16x10x11 既缸，約 28L。CO2 用 280g 氣樽連錶頭同電磁閥既套裝，細化杯另購，時間掣同盞燈共用，以求光氣同步。用 ADA 黑泥鋪面，powersand 做底床。現成既燈罩唔係太大就係太核突，本來想買返用開呢款 PL 管，換 11W，但似乎已經絕左跡。造景用既草同石未開始搵，第一次學用 CO2 種草，預左要慢慢黎。懶得洗缸，反正就黎換

奢侈品

開缸既計劃受挫，都係諗清楚先再買。本來打算開個吉缸，等水質穩定先種草同加 CO2，諗諗下都係行唔通。預定既造景以迷你矮珍珠同牛毛毯為主，用石塊做裝飾，有堆魚晌度好難插草同擺位

CO2 亦係個問題，應該晌舊缸試行一排，摸熟左個用法先。宜家個缸所有配件加埋都未使五百，一套 CO2 包括氣樽、錶頭、電磁閥、時間掣、細化杯，計埋已經成千，難怪有唔少人選擇 DIY。本來養魚只係想平平地玩下，買現成既嫌貴，DIY 又嫌煩，所以一直冇裝呢個

開胃

以往解凍後用牙籤挑幾條紅虫丟落水，缸魚一見到水面有人影晃動就縮埋晒，只有養得最耐果幾條大魚會食。諗左個新方法，解凍之後挑幾條放落水杯度搖勻，然後倒入魚缸，好似乾糧咁餵。可能佢地認得個杯，冇乜戒心，以往唔會食紅虫既都撲上黎搶，食量比以前大左幾倍

篤數

想搵個比現時呢個窄、高同深少少既缸，容量大約 25L。睇左好耐都冇岩心水，最後要左個 14x12x12 吋，自稱 23L。買返黎先覺得太高，拎返去換左個 17.5x11x12 吋，自稱 28L

拍埋舊缸一睇，大左成個碼，完全唔似 28L。自己計多次，駭然發現原來有 37L。個國產缸用日文包裝，盒面寫明約 28L，唔知點計出黎。容量係長 x 闊 x 高 ( 吋 ) 再除返 61.025，就退一步，當佢計個缸得八成滿喇好未，都成 30L 啦

今次係自己疏忽，唔想又捧返去換，乾脆送俾親戚，免得眼怨。以往買缸多數睇包裝寫幾多，冇寫明就問夥計，等佢地去篤機，亦遇過用心算但亂咁計既奇人。下次再買都係親自拎把軟尺去度，反正部電話有埋計數機

另外買左包泥同生物環。洗完濾桶，先換一半濾材，以免同時換新缸同濾材對水質造成太大衝擊

準備換缸

如無意外九月有工開，有大半個月時間開新缸。本來早應該洗濾桶同換一半生物環，但最後個缸荒廢左幾個月，青苔仲生到周圍都係。新缸會用返部份舊濾材，先搭新背景版，鋪泥，運作個零禮拜睇下效果點。種草、換燈同加 CO2 要等水質穩定再從長計議。上次換缸死左兩三條魚，今次大執都預左會有犧牲