買左兩條。見佢地眼仔碌碌好精靈，想買好耐，比燈魚大條少少，新缸較大比較適合養。以為魚街憑空杜撰一個得意既名呃人買，原來英文名係 chocolate gourami，取名朱古力算有根據。頗難養，對水質好敏感，要弱酸性水，廿五至廿八度，生性膽小，需要水草掩蔽，大致上符合要求既魚糧就煩少少，鍾意食生餌但當然唔會餵。佢地慢條斯理，同燈魚爭食急凍紅虫盞餓死。都肯食少少片裝乾糧，好在唔抗拒上水面食野，餵唔會沉既乾豐年蝦岩晒，冇乜魚會上去搶可以獨食。能夠晌魚缸人工繁殖，會口孵魚仔添，不過混養既缸都係唔使諗。如果買到三百幾蚊一對既七彩飛船，咁就值得研究下喇
