翻缸再砌過，對上一次大執係九月。三舊細既山谷石唔岩使，再買多兩舊先砌到個可以接受既背景。晌新填地街買左幅三尺乘一尺既不鏽鋼網，綁埋珍珠三角莫絲鋪晌泥面。有層網晌底，就算缸魚受驚四圍竄都唔會剷起咁多泥粉晌兩間鋪頭買左三包珍珠三角莫絲，兩包係淺綠色長條形，一包係深綠色塊狀，個樣似係兩種草，希望只係晌膠袋擺太耐變左形。早就想整莫絲草坪，今次種唔掂既話要換都方便，可以成幅揭起再綁另一種莫絲
兩隻大和藻蝦搬返出大缸，怕佢地會食莫絲。最後一條火兔燈上星期跳缸死埋，成缸得返十二條新燈、兩條剛果燈、兩條朱古力飛船同兩條小精靈。再死魚都唔會買返，等葦蘭提飛船返貨
生物環又積左好多蝦屎，洗濾桶果然搵到四隻蝦仔。肯定係上次洗完濾桶再吸返入去，明顯比上次大隻左。今次晌 palm net 同生物環之間擺返舊生物綿隔住，免得再有蝦仔晌生物環度住
