成四個幾月冇更新。自從上年魚街某位老闆提議換另一款草做草皮，就一直想換缸再整。新年假懶得搞，拖到復活節假先郁手，其間幾乎冇打理個缸。珍珠三角算係按比例咁標高，後排既正三角莫絲生到堆亂草咁
本來舊大石點擺都唔岩位，換左舊五磅半既山谷石，要六十蚊磅。兩舊細石用返，只係轉左角度。初時顏色唔多協調，起碼半個月後先會變深色。不鏽鋼網重新剪過，用紙樣砌好晒先開始剪，嵌埋之後冇以往咁多空隙。今次預先用泥遮住鋼網同玻璃之間既罅，否則加左水就好難再執
今次用美國鳳尾苔做草皮，火焰莫絲做後景，兩者之間鋪少少珍珠三角。揀走晒雜草先開始綁，免得好似上次咁撈埋正三角落去。美國鳳尾苔好難綁，要由本來既鋼網拆散晒再鋪過。因為比較貴又唔敢買得多，好在都夠薄薄地鋪一層，碎濕濕咁魚絲要繞得幾密。大概要等半個月先知呢個組合種唔種到
兩隻迷你螯蝦最後都係搬出廳。雖然近來開始有求偶動作，但又唔能夠任由佢地鉗魚。咁細既缸容納唔到佢地