week 20

重鋪迷你矮珍珠。掘起匙羹萍先發現新芽係藏晌泥下面向橫生，走莖好長但葉片冇長高，所以種咁耐都唔成草皮。比起五年前，宜家照明強左肥料好左，但當時唔使兩個月就鋪滿泥面

鋸短雨淋管移去右邊，由向前出水改為向左出水，想紅線椒順住水流打橫飄。紫紅針葉柳既根好長，魚缸左邊同中間石罅都有幼根突出黎，夾硬扯佢等如反缸，成條莖剪斷拎走好過

紅線椒唔剪得，用泵吸走根邊既泥，移埋舊大石先掘得起。種左四個月，雖然葉尖唔紅，但竟然有一棵分株，拆開種晌後排。幾日後開始長新葉，形狀唔靚既老葉就逐條剪走。紅針葉皇冠起晒出黎鋪過，插返 iron bottom

初次晌魚街搵到紅色型既鑽石紅蓮燈， 買左十條。幾年前養過藍色型，急凍紅虫同乾糧都唔點食，冇幾耐死左。呢批養左個幾禮拜得幾條食野，顏色暗啞又好瘦。改養十條藍珍珠斑馬，雖然都瘦但好在食魚糧。買左三條女王燈，死一條，原有果條臨死撈走，剩返兩條，共十四條魚

week 18

兩個幾月黎除左間中剪草就冇理個缸。白雲山同女王燈各死兩條，剩返呢條女王燈絕食左兩個幾禮拜，紅虫同乾糧都吐返出黎，又唔吸油膜。極火蝦生左三四十隻，已經吸走廿幾隻，否則早就成缸都係

吐血穀精長得密又夠紅，前所未有咁好，可能因為插左 iron bottom

 

連迷你椒草都密左，但匙羹萍種左兩個月都唔成草皮，想換返迷你矮珍珠

紫紅針葉柳同紅線椒一直係啡色，佢地既葉比想象中長，紫紅針葉柳唔襯個缸，要換走。當初想紅線椒向左邊擺，但經雨淋管既水流一推就飄向前面，想試下將條管擺晌右邊向左吹

week 8

經過四個禮拜，匙羹萍得幾束有長新葉，其餘幾乎冇郁過。可能種果陣拆得太散，應該將四五塊葉連莖就咁捲埋。紅線椒同紫紅針葉柳既顏色只係變深而冇轉紅。兩隻蝦仔跳缸死左，好在岩岩又孵出一批蝦毛

week 6

將兩支 iron bottom 折半，三支插晌右後排，一支插晌吐血穀精前面，另一枝 multi bottom 折半分別插晌前排左右。聽講基肥太多會令紅針葉皇冠標高，晌佢附近唔插根肥。插根肥後紫紅針葉柳同紅線椒變深色，匙羹萍同吐血穀精長得慢到好似停左。兩條女王燈同一隻蝦有抱卵

week 5

山谷石既綠藻用牙刷掃走左，吐血殼精、迷你椒草同紫紅針葉柳既葉面刷唔到，就用針筒打左幾次 5ml 既 excel。買多一包角螺，個缸總共有十隻，好快刷乾淨葉面同膠喉。紫紅針葉柳同紅線椒變返啡色，匙羹萍未完全轉水，仲有心形既新葉，起碼要兩個月後先見到草皮

白雲山 white cloud mountain minnow

反缸後預左養十至十二條魚，本來想買畢加索燈 jelly bean tetra，冇鋪頭返貨。就算有，每條咁貴都唔會買太多，先買住四條白雲山 / 長翅金絲燈。有一條魚身肥而魚鰭短，似係雌魚。放落缸即晚就食紅蟲，唔追其他魚蝦

week 4

 

 

 

個缸冇水冷周時廿七八度，令迷你矮珍珠長得慢又易生啡藻，換匙羹萍好過。晌零七年種過，對水溫同照明既要求都低，算最易種既草皮。加左幾棵迷你椒草，有成半個缸既草都生得非常慢，要經常用 excel 控制藍綠藻。紅針葉皇冠既新葉陸續變紅，剪左生得太前既走莖

茶籽餅

又有白線蟲，係冇反缸前咁多。新買水草用銅藥浸過，但未必殺到蟲卵，再唔係就由角螺帶入黎。搵方法殺蟲，先知道之前用既草藥叫茶籽餅

原來隻藥既毒素對魚同螺殺傷力比對蝦大好多倍，難怪缸魚死晒。當時落完第一劑見蝦毛都冇死，以為藥力唔強，落第二劑就冇撈魚，實在太無知

似乎好難徹底殺晒白線蟲，先洗濾桶再頻密換水，令缸水冇咁多養份，唔至於成缸邊都係蟲就由得佢

week 2

移左紅線椒出黎，免得佢迫埋一角。有幾片老葉溶左，好在有長紅色新葉。迷你椒草都有溶葉，吐血穀精既有枯葉同絲藻，迷你矮珍珠幾乎冇發芽，仲開始俾啡藻淹沒。紅針葉皇冠長得比預期慢，新葉亦唔紅。紫紅針葉柳越睇越覺得唔襯，遲早換走

前後落左三支 biodigest，缸水開始清返。泥面好多啡藻，加左 3ml excel 同放返五隻大蝦，四隻細蝦。迷矮全部掘起，買包新既種過。以前求祈一箸插落去，唔浮起就算。今次集四五支為一束，剪走多餘既根先插

買左三條女王燈清油膜。撈魚果陣有條跌晌檯面整傷左，落缸後被另一條追住啄，第二日死左。仲有六隻角螺，死左一隻

week 1

缸水仲係矇同有腥味，水面有油膜。今日落左一支 biodigest，幾日後再用。山谷石背面有藍綠藻，用針筒打過一次 2ml excel，生物過濾未穩定唔敢多用。銅藥用晒，買返一支，仲有盒 iron bottom，兩個月後用

剩返十七隻蝦，有九隻係蝦仔，搬左去膠兜駁埋氣泵。之前冇氣泵，只換一次水都捱到成個禮拜。晌迷你矮珍珠向橫生之前都唔會放蝦，即係起碼兩個禮拜後。呢兜草冇用藥浸過，仲有盤卷同白線虫，將來撈蝦要諗點先唔會污染返個缸

紅線椒 Cryptocoryne tonkinensis

想晌後景種葉片幼長會搖曳既草，揀左紅線椒。取代吐血穀精，成為全缸最貴既草，同樣生得慢又難種。易溶葉，似迷你椒草。舊葉係綠色而新葉係深紅色，有葉尖變黃剪走左。移開紫紅針葉柳，騰空左個角落俾佢

買果時鋪頭有兩棵，都偏啡色。聽講相同學名既線椒有紅綠兩款，外表一樣，唔夠光兩款都呈綠色，照明充足有一款會轉紅，好似紅針葉皇冠咁

吐血穀精

 

估唔到兩棵冇根既吐血穀精分株，隔幾日居然有長新葉同根。好似擺得太迫，將霉左果棵掘起重新種過。原來個芯冇事仲有長新根，但圍住果芯既就爛晒，由葉底開始枯萎。抽個芯出黎再種過，而霉左果堆有一截似地下莖既野，照插返入泥。舊缸果棵細既送左俾人

day 3

 

將舊大石稍為移落，同降低右邊斜坡。吐血穀精冇根好易浮起，唯有盡量唔郁到佢地。以前個缸得 25L，開冷氣會凍到 23 度，怕熄冷氣之後溫差太大所以裝暖管，宜家個缸有 30L 都冇幾何低過 25 度，乾脆拆走支暖管

day 1

買唔返 16x10x12 既缸，睇過兩個都有明顯花痕，其他鋪又冇貨，焗住洗乾淨宜家個缸用返。濾桶同石洗完再用銅藥同 Excel 浸幾個鍾，換晒全新既生物環同白綿，用新黑泥 new amazonia，還原舊缸既佈置

以為棵吐血穀精大到可以分株，掘出黎先發現個芯已經霉左，從外表睇唔出咁大鑊，雖然近排晌外圍已經有爛葉。有好多爛葉，分左兩個頭出黎，葉片仲好挺但冇根。成日有白線虫晌棵草鑽出鑽入，用 Excel 直接噴過幾次，應該整爛左棵草既底部。好在另一棵細既就冇事，雖然得好少根。將四棵種返晌原位，冇根果兩棵預左冇得救，希望霉左果棵未死晒，當 Excel 係除藻殺虫既萬能藥係太天真

矮珍珠用銅藥浸左起碼九個鍾，洗走數以百計既虫屍，每條都幾 cm 長。早排矮珍珍會爛成咁，大概係因為有幾日冇開風扇，暖管又壞左，個缸長時間廿八度幾，晌中間受兩支燈直射既草就最先熱死

紅頭趴趴熊生得太快，除左頂芽成棵綠色，剪完草要隔好耐先紅返，今次用紅針葉皇冠、紫紅針葉柳，加多包迷你椒草。順利既話，係皇冠草要剪得密，其他草都生得慢。將四支 multi bottom 折半插入泥，剩返三枝

用個兜裝起一堆紅頭趴趴熊，放左十幾隻大細不一既極火蝦。以前洗缸後隔一兩日就放蝦，但個缸冇青苔佢地就會咬草，今次至少隔個禮拜先

week 24

 

 

落完三劑藥，間中仲搵到一兩隻盤卷。由七月中開始迷你矮珍珠陸續枯萎，仲由中間向左右兩邊蔓延，唔知受咩影響。後排既玻璃面有好多水蚤，而白線虫殺極都有，用 Excel 直接噴過既草皮好快會枯。個缸累積太多問題，乾脆換缸，成套架生連埋草用銅藥消毒一了百了

第三劑

 

28/7 落完藥，1/8 搵到細隻既盤卷，於是落第二劑藥，份量減半。事後死左四隻蝦，剩返八隻，仲有幾隻蝦毛。5/8 又有，落第三劑，冇死蝦。每次落藥後再出現既盤卷都少左

落第二劑藥前，竟然搵到條女王燈既魚毛。女王燈周不時生蛋，係未見過孵到，用藥之後魚卵都變白死晒，居然有一條孵出黎。冇準備養魚毛，落藥之後就見唔到佢。晌水面游既魚毛好快俾大魚食晒，所以之前以為孵唔出

晌泥面越黎越多白線虫，多到爬上吐血穀精。草藥只係殺到幼虫，對泥入面既無咩效。近兩日用針筒打左 5ml 未稀釋既 Excel 落去，白線虫走避不及就即死

未斷尾

27/5 落左藥，31/7 果然又有幾隻盤卷出現返。好似粒塵咁大，係呢兩日孵出黎既。既然銅藥同草藥都殺唔到螺蛋，等多兩三日，更多蛋孵化後先落第二劑

魚墳場

尋晚拎走包藥，洗濾桶同換左六成水，用既係隔夜水。搵唔返尋日撈剩既蝦，得幾隻死左既蝦毛。晌膠桶既魚蝦螺全部未死，到搬返佢地入缸就出事

首先有條新燈打側游，半個鍾內所有新燈同紅衣夢幻旗都死晒，然後到女王燈。角螺差唔多係即場死，極火蝦就全部冇事，仲搵到未死既蝦毛

本來話十二個鍾後應該拎走包藥，但到尋日收工果時已經有十八個鍾，藥粉亦可能落左唔止六份一包

為左收拾盤卷都犧牲好多，既然魚同螺都死晒，黎緊每隔個禮拜就落藥，毒死晒為止。連續兩個禮拜都搵唔到盤卷先會養返魚

盤卷

透明既扁螺由三月至今都搞唔掂，每次落完銅藥，隔個零禮拜又出現返，即係殺唔到螺蛋。銅藥既藥效強又持久，殺蝦同螺之外，連魚都會變得好緊張同唔食野。上網見到有殺渦虫既草藥，會順便殺埋螺同白線虫。去大角咀買左包，十蚊

宜家先知呢隻螺叫盤卷，好難斷尾。包藥殺渦虫可以用十二次，殺盤卷用量加倍。 先將魚蝦螺搬去裝隔夜水既膠筒，駁埋暖管、氣泵同風扇，必要時要住幾日。用網袋將剪落黎既草包好沉晌底，令蝦有地方匿

 

匿晌草叢既魚同蝦好難撈，有隻蝦一直撈唔到。用網袋裝住一份藥夾晌出水口。幾分鍾後，無數白線虫就由唔知邊度湧出黎。幾乎全部都好細條，平時見到既通常成 1cm 長。玻璃面既盤卷都陸續甩落黎

 

尋晚半夜落藥，今朝九點睇返缸水稍為變白，缸邊有少少泡。搵到唔少盤卷既死屍，但再睇唔到白線虫。尋晚撈剩果隻蝦冇死，仲見到有隻超細既蝦毛。今晚拎走包藥會洗濾桶同換水，先放返魚蝦螺入缸。下次落藥唔會撈蝦，魚同螺要諗下