杜蟲

浸左兩日連翹，紫艷同尖咀兩條魚既白點甩左，換第三包藥。熄燈後五條尖咀上晒水面抖氣，即刻拎走包連翹。第二日熄燈後再睇，原來尖咀係上水面訓，唔關包藥事 

新紫艷成日有拖便，估係腸炎同寄生蟲。有食冰虫同乾糧，外表正常，本來唔想再落藥。前日佢突然留晌水底唔郁同褪色，餵紅虫只係勉強食一條

想買 azoo 治體內寄生蟲錠，行勻魚街都冇。最後買左樽百必除，買埋治體內外細菌錠備用。百必除每 10L 落 1g，一羹就 1.5g。換五份一水之後落藥，30L 水應該落兩羹。錯手落左三羹，即刻再換五份一水同吸走未溶既藥粉

尋日條新紫艷死左， 花地灣買果四條全滅。兩條舊紫艷間中會擦鰓，可能係鰓吸蟲。食慾冇變係口味轉左，雄魚只食菜片，雌魚只食紅虫

洗濾桶，將剩低果半生物環轉埋做 sera 玻璃環，放少一塊白綿。諗緊用 azoo 治體外寄生蟲錠，睇多幾日先。一向少用魚藥，但兩條紫艷都唔似會長命

連翹

為左引新既紫艷開口，每餐剩多左紅虫。打算過一個禮拜先換水，但連死三條，擔心水質太差就換左四份一

尋日發現死剩果條晌魚尾有一粒白點。夜晚開冷氣令魚缸由 27~28 度跌兩度，似係溫差加上水質令條魚發病

幾年冇遇過白點病。以前都係用粗鹽去醫，但對用量冇把握，又唔想用銅藥拎晒三條紫艷黎冒險，寧願試下連翹，唔使加溫，應該兩三日見效

周六用五蚊買左一両，約 30g。個缸約 30L，用茶袋裝住 1~2g 放晌出水口。本來要放一日，但九個鍾後條紫艷顏色變淡，伏晌缸底。唔知係訓左定唔受得包藥，總之拎走再換五份一水

周日條紫艷表現正常，粒白點未甩，仲傳染左一條尖咀鉛筆。放左包新既連翹，會每日換一包

紫艷鉛筆

十九號帶返黎果四條，唯一既雌魚當晚就死左，第二朝死多條雄魚。其餘兩條都食紅虫，其中一條顏色暗啞已經唔睇好，果然晌第三日死埋

死剩佢。餵紅虫只食一兩條，唔食 tetra vegetable，勉強會啄下 tetra min。通常都四圍游，間中會被大條既紫艷雄魚追

tetra min 係為左條大既紫艷雄魚而買。佢近來完全唔食紅虫，只食菜片，好唔均衡。魚身冇光澤，睇落唔健度，同雌魚成日匿埋

花地灣花鳥魚蟲市場

上年八月去過，為紫艷鉛筆舊地重遊。尖咀鉛筆未滿月已經跳左三條，證明唔岩養。好在上年拎左卡片，電郵預留左三條雄魚兩條雌魚就出發

主流依然係大型魚、魚缸櫃同魚池，得一間賣 ADA，冇咩岩細缸用。水草款式少，反而有廿幾款沙

三蚊兩樽抗生素

散裝生物環賣二三十蚊斤，表面既細窿似係用機碌出黎，多過燒陶瓷形成，手感好平滑，同有牌子既差好遠

賣紫艷果間算係全場最多小型魚，仲有缸紫黃色既蟹仔

臨走去拎魚，有條雌魚未撈已經死左，另一條雌魚好瘦，表面冇大問題。本來開價每條七十五蚊人仔，埋單老闆主動減價到七十蚊，比上年平十蚊

晌袋焗左五個鍾，拆袋果陣雄魚顏色好淡，但雌魚既黑間好鮮明，顏色好反常。對水放落缸，三條雄魚即刻匿埋，雌魚暈左隨水漂流，十零分鍾後瓜埋

week 47

將紅針葉皇冠換晒做迷你椒草。blownie blue 既莖軟化斷左，將上半截塞入石罅。個缸砌左將近一年，椒草容易打理但好快睇厭

魚身左側有傷既紫艷鉛筆，傷口冇惡化似乎癒合左，後來隔一排就跳缸。兩個月黎陸續死剩一對紫艷，平時多數匿埋等餵魚。雄魚口味轉左，除左 tetra 菜片咩都唔食

女王燈死剩一條，買返兩條。分批買左九條尖咀鉛筆，兩條跳缸，一條畸形撈走左。外表唔討好，但唔挑食，唔打交，唔怕人

mr aqua 陶瓷環用左兩年，分兩批換做 sera siporax 玻璃環。百幾蚊 1L，係至今用過最貴既

week 36

一條女王燈跳缸，買返兩條細。十幾隻極火蝦俾紫艷鉛筆啄死晒，但體型相近既虎紋同藍蝦又冇受襲擊。新入缸死左近半，剩低既養定左仲有抱卵

上禮拜發覺一條紫艷雄魚鰓後有傷，魚鱗翹起有白色粒。唔知係擦損、寄生蟲定係生瘤，唔敢貿然落藥。照常換水餵魚，三四日後見塊魚鱗甩左，似外傷，睇唔出點整親。見佢食慾同行為正常好似冇大礙

隔日落 4ml excel，辣椒榕上既黑毛藻幾乎甩晒，剩低既集中晌幾棵迷你椒草同泰國青椒。brownie red 本來綠色既葉都轉紅。brownie blue 既莖唔知係咪唔受得 excel，竟然由綠變啡仲軟化枯萎，但又冇影響到葉

淘寶既紅針葉皇冠陸續轉色同有走莖，但葉片太尖長，唔似以往種開既款。暫停左 ECA，等條紫艷好返先

淘寶

定期插 iron bottom，迷你椒草始終鋪唔滿前排，想種返紅針葉皇冠。魚街冇貨，晌淘寶買左廿棵，每棵一蚊。由大連寄黎，紙盒內塞發泡膠加一塊發熱包，攤開濕報紙得堆爛草。葉片幼長唔似水上葉，但冇紅色不特止仲幾乎枯晒，拆開得幾棵用得

後來間網店直情將紅針葉皇冠下架。買左貨尾，又晌膠袋焗左太耐，成個禮拜後都睇唔出係咪正貨。已經晌淘寶另一間訂左廿棵，兩蚊棵

week 34

四個幾月冇更新。中後排既椒草有長高同分株，係迷你椒草生得特別慢。brownie red 終於變紅，kedagang 同 brownie blue 仲係冇色。自從有紫艷皇冠就停左 excel、ECA 同 step 2，生得慢既椒草同辣椒榕好惹黑毛藻

試左幾個除藻同除油膜既配搭。角螺生太多蛋，女王燈養大左，就霸住水面啄其他魚，要撈走換小精靈加大和藻蝦。小精靈清唔到油膜。冇螺，石同玻璃面超快鋪滿清苔

宜家用緊鮑魚螺、藍蝦、虎紋蝦同兩條細既女王燈。鮑魚螺短命，但少生蛋。大和藻蝦會啃紅針葉皇冠，換成兩包三四十隻虎紋同藍蝦，頭一個禮拜死左過半。好多藍蝦都黏住一兩隻水螅，虎紋就好乾淨，係特別易死

魚鋪有條賣剩既紫艷雌魚同火焰鉛筆撈埋一齊，買埋返黎。試過有五條公三條母，後來一條母魚跳缸，兩條公魚病死。兩條初時都係魚身變暗啞同食慾不振，個幾禮拜後先反肚，其中一條死時仲有松果病

成缸黑毛藻都唔敢用 excel，係怕又好似花地灣果兩條咁一遇到 excel 就絕食。兩條公魚無故死左，就覺得未必關事，係瘦果條本身有病，死剩果條又唔適應獨居

紫艷橫掂都係死，開始針筒對住黑毛藻打 excel，每日 4ml。一個禮拜而黎睇唔到紫艷有受影響，黑毛藻就逐漸變白脫落。每日照餵兩餐，午餐 tetra vegetable 或者 hikari 紅虫乾，晚餐急凍紅虫