花地灣花鳥魚蟲市場

上年八月去過，為紫艷鉛筆舊地重遊。尖咀鉛筆未滿月已經跳左三條，證明唔岩養。好在上年拎左卡片，電郵預留左三條雄魚兩條雌魚就出發

主流依然係大型魚、魚缸櫃同魚池，得一間賣 ADA，冇咩岩細缸用。水草款式少，反而有廿幾款沙

三蚊兩樽抗生素

散裝生物環賣二三十蚊斤，表面既細窿似係用機碌出黎，多過燒陶瓷形成，手感好平滑，同有牌子既差好遠

賣紫艷果間算係全場最多小型魚，仲有缸紫黃色既蟹仔

臨走去拎魚，有條雌魚未撈已經死左，另一條雌魚好瘦，表面冇大問題。本來開價每條七十五蚊人仔，埋單老闆主動減價到七十蚊，比上年平十蚊

晌袋焗左五個鍾，拆袋果陣雄魚顏色好淡，但雌魚既黑間好鮮明，顏色好反常。對水放落缸，三條雄魚即刻匿埋，雌魚暈左隨水漂流，十零分鍾後瓜埋

week 47

將紅針葉皇冠換晒做迷你椒草。blownie blue 既莖軟化斷左，將上半截塞入石罅。個缸砌左將近一年，椒草容易打理但好快睇厭

魚身左側有傷既紫艷鉛筆，傷口冇惡化似乎癒合左，後來隔一排就跳缸。兩個月黎陸續死剩一對紫艷，平時多數匿埋等餵魚。雄魚口味轉左，除左 tetra 菜片咩都唔食

女王燈死剩一條，買返兩條。分批買左九條尖咀鉛筆，兩條跳缸，一條畸形撈走左。外表唔討好，但唔挑食，唔打交，唔怕人

mr aqua 陶瓷環用左兩年，分兩批換做 sera siporax 玻璃環。百幾蚊 1L，係至今用過最貴既

week 36

一條女王燈跳缸，買返兩條細。十幾隻極火蝦俾紫艷鉛筆啄死晒，但體型相近既虎紋同藍蝦又冇受襲擊。新入缸死左近半，剩低既養定左仲有抱卵

上禮拜發覺一條紫艷雄魚鰓後有傷，魚鱗翹起有白色粒。唔知係擦損、寄生蟲定係生瘤，唔敢貿然落藥。照常換水餵魚，三四日後見塊魚鱗甩左，似外傷，睇唔出點整親。見佢食慾同行為正常好似冇大礙

隔日落 4ml excel，辣椒榕上既黑毛藻幾乎甩晒，剩低既集中晌幾棵迷你椒草同泰國青椒。brownie red 本來綠色既葉都轉紅。brownie blue 既莖唔知係咪唔受得 excel，竟然由綠變啡仲軟化枯萎，但又冇影響到葉

淘寶既紅針葉皇冠陸續轉色同有走莖，但葉片太尖長，唔似以往種開既款。暫停左 ECA，等條紫艷好返先

淘寶

定期插 iron bottom，迷你椒草始終鋪唔滿前排，想種返紅針葉皇冠。魚街冇貨，晌淘寶買左廿棵，每棵一蚊。由大連寄黎，紙盒內塞發泡膠加一塊發熱包，攤開濕報紙得堆爛草。葉片幼長唔似水上葉，但冇紅色不特止仲幾乎枯晒，拆開得幾棵用得

後來間網店直情將紅針葉皇冠下架。買左貨尾，又晌膠袋焗左太耐，成個禮拜後都睇唔出係咪正貨。已經晌淘寶另一間訂左廿棵，兩蚊棵

week 34

四個幾月冇更新。中後排既椒草有長高同分株，係迷你椒草生得特別慢。brownie red 終於變紅，kedagang 同 brownie blue 仲係冇色。自從有紫艷皇冠就停左 excel、ECA 同 step 2，生得慢既椒草同辣椒榕好惹黑毛藻

試左幾個除藻同除油膜既配搭。角螺生太多蛋，女王燈養大左，就霸住水面啄其他魚，要撈走換小精靈加大和藻蝦。小精靈清唔到油膜。冇螺，石同玻璃面超快鋪滿清苔

宜家用緊鮑魚螺、藍蝦、虎紋蝦同兩條細既女王燈。鮑魚螺短命，但少生蛋。大和藻蝦會啃紅針葉皇冠，換成兩包三四十隻虎紋同藍蝦，頭一個禮拜死左過半。好多藍蝦都黏住一兩隻水螅，虎紋就好乾淨，係特別易死

魚鋪有條賣剩既紫艷雌魚同火焰鉛筆撈埋一齊，買埋返黎。試過有五條公三條母，後來一條母魚跳缸，兩條公魚病死。兩條初時都係魚身變暗啞同食慾不振，個幾禮拜後先反肚，其中一條死時仲有松果病

成缸黑毛藻都唔敢用 excel，係怕又好似花地灣果兩條咁一遇到 excel 就絕食。兩條公魚無故死左，就覺得未必關事，係瘦果條本身有病，死剩果條又唔適應獨居

紫艷橫掂都係死，開始針筒對住黑毛藻打 excel，每日 4ml。一個禮拜而黎睇唔到紫艷有受影響，黑毛藻就逐漸變白脫落。每日照餵兩餐，午餐 tetra vegetable 或者 hikari 紅虫乾，晚餐急凍紅虫

紫艷鉛筆

再買兩條紫艷雄魚，雌雄比例變成 2:5。返貨當日鋪頭有四十幾條，隔四日再買得返廿條左右。希望賣晒雄魚會減價，想添多一條雌魚

上次晌花地灣買得三條係太少。今次一黎就五條，適應快好多。第二日就唔匿埋同食冰虫， 過兩日連 tetra 菜片都食。新買兩條當晚就開口，跟大隊游，只係搶食唔夠快同比較淺色

一如以往唔怕鏡頭，但雌魚少游出黎好難影到。其中一條背脊既黑線變粗左，好在魚肚係有紅斑，同雄魚會一齊游，證明唔係黃金鉛筆

week 14

最後果條紫艷鉛筆晌九月底卒之死埋。小丑燈太淺色，換大肚銀燕。銀燕出名鍾意跳缸，但呢五條未跳就死左大半。有食冰虫，但逐日死一條。試過白翅玫瑰旗，始終得灰白色。可能個缸太光唔適應，同小丑燈一樣

晌一間大鋪既閣樓竟然搵到缸紫艷。雌雄都有，養定晒顏色好鮮艷。但要三百八十蚊一對，只可以得閒去探下等減價

將黃金鉛筆當係紫艷賣果間鋪，晌上星期六居然真係返左批紫艷。雖然未標價錢同品種，問店員之前已經好有把握冇認錯。起碼有四十條，似係岩岩落缸，都好淺色，勉強睇到係雄魚比雌魚多

八十蚊條，計埋匯率平過花地灣。驚又會無故絕食唔敢買，掙扎好耐先決定要五條。今次有得揀，要左三條公。都盡量揀細條既，但比起閣樓果批係大左啲。落缸第二日已經食冰虫，第四日試餵乾糧，tetra pro color 得一條啄完冇吐出黎，tetra vegetable 有幾條勉強肯吞。會每日各餵一餐乾糧同冰虫試下，想佢地接受多一款魚糧

有上次既經驗，會少啲換水，每星期最多四份一。停用 ECA 同 excel，step 2 就照舊隔日 1 ml

加左兩條小精靈。除左食藻，仲會晌水面反轉游吸油膜，但以往養親都唔長命。右後排既椒草溶得太多，換左幾棵高身些少既綠溫蒂椒。藍網球蝦晌石下面掘隧道，撈走左