week 18

買左一包四隻細既大和藻蝦，兩隻跳走左。自從養返大和藻蝦，絲藻就唔見晒。紅水晶蝦一直冇生蛋，火焰蝦就生左第二批。後排既火焰莫絲長高晒，但呢期冇加液肥，CO2 都用少左

差唔多兩個月冇更新，終於買左舊山谷石，準備換缸。新缸會用返美國鳳尾苔，想試多次種趴地紅 Rotala sp. Goias。到時要諗下點安置宜家呢幾舊大石，丟左好浪費，拎上網賣又煩

week 11

又搵到古怪野，今次係絲藻。開頭仲以為係濾綿纖維，比頭髮仲幼，唔係長得太高隨水飄揚都睇佢唔到。可能因為每日加液肥又冇大和藻蝦，營養過剩益晒佢地。見到既都拔走晒，暫停左液肥先

呢兩包火焰莫絲好似撈左好多雜物，意外收獲係搵到一少撮珊瑚莫絲。兩年前種過失敗左已經唔敢試，估唔到今次呢一束好似生得仲快過美國鳳尾苔。經過兩星期，攝晌石罅既鳳尾苔個別發展，唔受光照既似係枯左，有幾塊碎屑晌石面上落腳，居然冇跌落黎仲有發芽

買左三隻紅水晶蝦。幾年前見到已經想養，太貴，直到最近先平少少，值得買黎試。最好梗係生蛋，不過遺傳唔到父母紅白分明既顏色都冇意思。留返十零隻極火蝦繼續養

不知不覺缸翡翠燈得返九條。晌地下只係搵過一條魚乾，其餘三條就咁蒸發左。睇中一種類似紅衣夢幻旗既不知名燈魚，可惜冇貨

week 9

拆走夾晌石上面既鋼網，將鳳尾苔就咁攝入石罅。比預期簡單，用牙籤篤入去已經掂，無需魚絲固定。冇買到寬葉鹿角苔，因為唔多滿意宜家個缸，唔想再揼錢。個缸太細，用呢種石砌唔到心目中既造型。可能會換返山谷石，要等長期假先搞

水面成日有層油膜，唔似係液肥既問題，洗完濾桶應該有改善，順便加多塊 palm net。又撈走左十零隻唔夠紅既蝦仔，仲剩返十隻左右，好在果四隻大蝦冇再生蛋。太易繁殖都好煩，諗緊換紅水晶蝦試下

餵完紅虫駭然發現有條不知名既虫晌草坪上蠕動，有成隻蝦咁長，驟眼睇以為係渦虫。條虫會四圍捐用網撈唔到，仲識游水，最後用膠管捉出黎。希望只係得佢一條

week 8

用左幾年既溫度計冇電，乾脆買個同款新既。火焰莫絲明顯長高左，生得幾均勻，唔似以前咁一束束分開晒，將鋼網拆出黎綁過算係值得

幾塊石上既美國鳳尾苔生密左，但唔似會做到預期效果。魚街個陳列缸晌石罅擺左幾種草，除左鳳尾苔，起碼仲有珊瑚莫絲同寬葉鹿角苔。睇唔出用咩固定，似係就咁攝晌石罅入面。咁照計好易被蝦扯出黎，換水亦會沖散，唔知有咩竅門，可能因為果度既石大好多，條罅夠深可以攝得好穩

諗緊拆走幾塊夾晌石邊既美國鳳尾苔，再買寬葉鹿角苔，試下攝入石罅，必要時用魚絲套住舊石。珊瑚莫絲就算喇

week 6

前排既鳳尾苔草坪有雜草，似係珍珠三角莫絲同火焰莫絲。除草之後有個細窿，要等鳳尾苔慢慢遮返

week 5

石罅果片柳樹莫絲生得慢就預左，但晌其他位置冇遮擋既都好稀疏。懷疑兩隻大和藻蝦偷食，將佢地撈出廳，仲以為保得住新買既草。轉頭就發現極火蝦都有份，幾隻蝦係咁刨，冇幾耐已經食剩條莖

咁始終都係種唔到，除非完全唔養蝦。唯有換走所有柳樹莫絲，鳳尾苔同火焰莫絲各買一包，將後排既草重新綁過。今次綁得比上次密，希望火焰莫絲唔會生得咁散

開始淘汰太淺色既蝦仔。撈走十零隻，仲剩返廿幾隻，夭折率好低，比紅虫仲細既蝦毛晌水中游過都冇魚食

week 4

換左個不鏽鋼入水花籃，免得太多草屑被吸入濾桶。入水膠喉太長，要鋸短半吋左右

買左兩包共六隻極火蝦，死左兩隻，其中一隻被抹玻璃既百潔布撞死。有一隻買返黎已經抱卵，養左幾日開始見到蝦仔，起碼廿隻。以前養藍蝦都試過孵到，但唔係被魚食就吸左入濾桶。新花籃既孔夠細可以隔開蝦仔，而翡翠燈又奇怪冇食佢地。冇左魚同濾桶兩個天敵，應該有部份養得大，到時就揀蝦身夠紅既繼續養

中間同右邊石罅兩片柳樹莫絲，本來已經俾塊石擋左唔少光，仲成日被蝦扒起既泥遮住，長得好慢，有好多枯左，乾脆買多包草綁過。順便將撐住左邊大石既膠格仔起出黎剪短，更容易收埋。最後加少少泥補返沖散左既斜坡

再度過 pH 都係約 7.0。palm net 有時會令缸水稍為變黃，暫時唔敢拎走。好在除左受唔到光果兩片柳樹莫絲，其他草既進度都仲可以