week 1

想將出水管擰向下，加快水流令藍網球蝦更易適應，結果沖散左後排既泥，要晌缸邊同後排加少少泥填返，最後要扭返原位。以往既網球蝦鍾意趴晌近氣石個角落，呢隻就揀左暖管後面

莫絲既情況幾好，除左有幾忽枯左，其餘都陸續發芽，唔再係淺綠色長條形。拎走左濾桶包活性炭，開始每日落 1ml special shade

早前買既藍蝦失晒蹤，連殘骸都搵唔到，剩返三四隻大蝦。換缸前孵出黎既蝦毛可能匿埋左，又或者死晒

夜光蝦

半夜晌個缸發現一隻全身發螢光既蝦，好似手錶既夜光指針咁要熄晒燈先睇到。隻蝦黎自一包幾日前買既袋裝藍蝦，佢當時仲會四圍走，輪廓好清楚，但部相機太渣影唔到。四點零發現，隻蝦到五點幾已經死左。死蝦仲會發光，但暗左好多，隻中晌蝦肚位置，勉強影左張相

上 google 查 freshwater luminous shrimp 搵到一段撮要，今次呢隻蝦似係感染左發光細菌，臨死被發現。早幾年都有網友遇到呢種蝦，照計好多人都買過，只係好快就死左察覺唔到

cameroon armoured shrimp

通稱藍網球蝦，可以養到全隻深藍或紫色。兩年前見過相，早幾日第一次見實物，買左一隻試下。已經取代白金新燈成為全缸最貴既野，唔死既話可以養到好大隻。試過半夜爬出缸，及時掟返落水

本來舊缸有隻網球蝦，十二月初影既相仲見到佢，目前下落不明。晌魚街睇蝦先忽然諗起佢，連幾時失蹤既都唔知。新買果兩隻紅鼻蝦死晒，藍蝦死剩三幾隻，買多左十隻補充

day 5

缸水有腥味，可能餵太多紅虫令濾桶負擔唔到，已經換水三份一。種左幾日莫絲開始有生長，等生密左就缸邊加泥，遮住外露既不鏽鋼網。後排似乎太矮，或者應該種火焰莫絲加高佢

special shade

買左支液肥，等多幾日就抽走包活性炭開始用。每日 1ml，好在按一下就岩份量，否則要日日用都幾煩。仲買左兩隻紅鼻蝦玩下，其中一隻抱卵添，可惜係細卵型，用淡水孵唔出

比較過魚鋪既珍珠三角莫絲，今次用呢三包草，其中兩包有可能係正三角莫絲。如果兩三個禮拜後仲係長條狀，就係個包裝寫錯左，而唔係打袋太耐導致變形

day 1

翻缸再砌過，對上一次大執係九月。三舊細既山谷石唔岩使，再買多兩舊先砌到個可以接受既背景。晌新填地街買左幅三尺乘一尺既不鏽鋼網，綁埋珍珠三角莫絲鋪晌泥面。有層網晌底，就算缸魚受驚四圍竄都唔會剷起咁多泥粉

晌兩間鋪頭買左三包珍珠三角莫絲，兩包係淺綠色長條形，一包係深綠色塊狀，個樣似係兩種草，希望只係晌膠袋擺太耐變左形。早就想整莫絲草坪，今次種唔掂既話要換都方便，可以成幅揭起再綁另一種莫絲

兩隻大和藻蝦搬返出大缸，怕佢地會食莫絲。最後一條火兔燈上星期跳缸死埋，成缸得返十二條新燈、兩條剛果燈、兩條朱古力飛船同兩條小精靈。再死魚都唔會買返，等葦蘭提飛船返貨

生物環又積左好多蝦屎，洗濾桶果然搵到四隻蝦仔。肯定係上次洗完濾桶再吸返入去，明顯比上次大隻左。今次晌 palm net 同生物環之間擺返舊生物綿隔住，免得再有蝦仔晌生物環度住

山谷石

卒之買到，四十蚊磅，比預期平。貴過青龍石少少，造型好得多，易襯色，對水質亦冇咁多負面影響。隔離仲有一箱萬天石，賣剩五舊，本來砌到一大兩細既組合，但八十蚊磅貴成倍，唔值

萬天石普遍都幾大舊，山谷石摷勻成箱得一舊比較大既，揀多三舊細既做一組，約八磅。洗完先發覺有一舊石既特別淺色，不過照計三舊都夠用，細舊既山谷石要買亦好易搵

week 10

洗濾桶，居然有七、八隻蝦仔入面，難怪個桶咁多蝦屎。肯定係岩岩孵出黎就被吸入桶，否則早就被魚食晒。拎晒出黎，以目前既尺寸，得朱古力魚威脅到佢地，匿晌迷你牛毛毯都幾安全既，除非再吸入桶咁就死梗。黑毛藻蔓延得好快，買多三隻螺，仲晌廳既大缸搬左兩隻死剩既大和藻蝦返黎

上星期又有鋪頭返左少量葦蘭提飛船，之前留左電話但冇打黎，到知道果陣已經賣剩一條又瘦又摺尾既公魚。本來想去現場睇下，狀態唔太差既都照買嫁喇，點知到得閒去睇果時已經俾人買埋

week 8

換左支同型號既新暖管，加鹽同加熱缸水搞左個幾禮拜，白點病大致上搞掂左。迷你牛毛毯生得好慢，仲痴左唔少黑毛藻，不過反正宜家都係等山谷石或者萬天石返貨，到時就翻缸再種

weel 7

可能係呢個星期溫差大，有幾條魚相繼出白點。以往都係由得佢，但今次蔓延得好快，即刻換水，加百份之一既粗鹽同裝暖管。鑽石紅蓮橙唔食紅虫又最多白點，好難救，撈走算數

支暖管擺一年已經壞左，較廿八度但煲到缸水變三十一度。用第二支電子溫度計度過，肯定係暖管個恆溫壞左。唯一一隻虎紋蝦因此死左，藍蝦同魚就冇事。拆左先以免缸魚被煮熟，要買支新既

早幾日見到有隻剛孵出黎蝦毛，不過缸草生得咁疏，冇遮冇掩咁既細蝦死梗。後排既泥加高左，今次用一條粗膠喉同漏斗去加泥，乾淨左好多

葦蘭提飛船

似乎魚街唔再叫佢做「七彩飛船」。星期一上網先知原來魚街晌十月初有鋪頭返左貨約二百蚊一對。星期三終於得閒去魚街，果然晨早賣晒，下一水貨要等兩個月甚至半年以上。有間晌長沙灣既鋪頭就話兩個禮拜後有貨返，每對賣二百幾，留左電話

係好想養，但宜家個缸應該太細，水質亦唔夠好，睇到實物先諗，必要時將部份魚搬出廳，甚至換缸，eheim 2211 照計支持到 30L 水左右。山谷石或者萬天石返貨既話就翻左缸先算

week 6

玻璃細化杯用左個零月又開始塞，氣泡越出越大，洗淨曬乾再用都唔掂，用漂白水浸又沖唔走杯內既污水。買左個陶瓷細化器，氣泡唔算幼細，希望會襟用。細化杯唔應該用個零月就要換，會再試下用漂白水洗

買左本 ADA 07 年大賽圖集，下次翻缸做參考。月尾有鋪頭會返一批 ADA 山谷石同萬天石，每磅要一百幾十，係好貴，但呢一年黎買埋成堆唔岩用既木同石都使左唔少錢，仲白費心機同時間。到時遇到岩心水既就買，年底再翻缸

剛果燈

買左兩條剛果燈，暫時唔覺有咩不良習性，紅虫魚糧都食，同其他魚相處得黎。魚身得銀色好單調，希望養耐左會有改善。長鰭剛果燈體色鮮艷得多，但太大條十二吋缸養唔到

本來想買十零隻藍蝦，但一包起碼三十隻。勉強買返黎，以目前缸草既密度幾難養到咁多，唯有餵多少少魚糧。即日死左一隻，應該陸續有黎

week 5

爛鰭既朱古力魚逐漸康復。其中一條既胸鰭本來爛到得返幾條骨，但好在仲肯食野，有幾日掟左好多紅虫落去引佢食，情願食剩用泵吸返走。呢幾日魚鰭開始長返出黎

大和藻蝦周時鉗住棵草係咁啃，本來以為佢地係揀緊枯葉黎食，其實就係佢地搞到缸草咁疏落。如果每棵平均咁食一兩塊葉都冇咁覺眼，但佢地係逐棵食，直到剩返草根

後排既斜坡又被掃平左，添泥加高之後再將三隻蝦撈出廳。養大和藻蝦係為左對付絲藻，但佢地對個缸既擺設同草造成太大破壞。既然絲藻解決左，係時候換藍蝦或者虎紋蝦接手

ADA II 代係冇咁黃，但好易令缸水有塵粉。參考 ADA 既目錄換濾材，唔要原裝既藍色膠綿，將 palm net 擺底，順序再擺生物環、活性炭同纖維綿。從未試過將 palm net 同活性炭放埋一齊，擺左幾日缸水暫時算清。希望 palm net 能夠降 pH 而活性炭令缸水唔會變黃

week 3

近幾日兩條朱古力魚食慾不振，胸鰭摺埋仲開始爛。佢地對水質特別敏感，以往試過換多幾次水就冇事，如果蔓延到其他魚先落藥。紅色種鑽石紅蓮燈終於食紅虫，但魚身仍然係透明冇咩體色

蝦同螺大致上已經清晒全缸既絲藻，但佢地四圍刮令個斜坡矮左，要抽走前排既泥同加高後排去維持斜度。迷你牛毛毯開始有分株，不過數目唔多亦生得頗慢

week 2

紅色種鑽石紅蓮燈卒之到手，買左三條，隔夜已經死左條。養左幾日，唔多食紅虫亦唔多食乾糧。加多一隻角螺，比鮑魚螺勤力同靈活得多，而且對付青苔漬既表現比預期好。絲藻問題改善好多，洗濾桶同加炭、蝦、螺既效果好顯著

居然晌魚街買得返舊版 fluval 生物環。新版用左大半年，一直睇唔出新舊有咩分別，但都係先入為主覺得舊版較好用。雖然應該分兩批換，之前試過一次過換晒又冇咩具體影響。換晒所有生物環，最易死既蝦冇事，反而三條藍色種鑽石紅蓮燈接連暴斃，發現既時候得返條骨

week 1

上星期搬石換草，掘起左先前埋落既肥料，當時都估到會爆藻，一個星期後果然報應到。幾塊石生滿絲藻，玻璃面多左唔少綠斑，用膠片都刮唔走要換刀片。晌迷你牛毛毯生得密之前唯有勤換水，下星期冇咁忙應該可以隔日換四份一

翻缸後買既四隻蝦一隻失蹤三隻死左。藍蝦得一包四十隻冇散買，唯有再買四隻大和藻蝦，暫時唔覺佢地有食絲藻。仲買左兩隻網球蝦同兩隻角螺。角螺似乎遠遠比唔上鮑魚螺，玻璃面既綠斑刮唔乾淨，否則可以再買兩隻，佢地比鮑魚螺長命得多

魚街返左批紅綠色既鑽石紅蓮燈。從未見過實物，當時睇到只覺面善，返屋企查書先認得。幾年前晌書見到一直想養，機會終於到

day 2

前幾日大和藻蝦同網球蝦同時暴斃，缸魚未死但神情呆滯，有幾條仲浮上面抖氣。即刻洗濾桶同開大氣泵，好彩冇死魚。原來係 CO2 個掣鬆左，難怪換水果陣缸魚反應遲鈍。應該係無意中郁到個掣，仲要放工先發現，否則即時扭返緊四隻蝦就唔使死

烏拉圭草越種越走樣，有部份開始枯，新芽又唔貼地，仲生左好多藻。八月初翻缸就係因為冇時間打理，烏拉圭草太難種，試左個半月係時候換。全缸換晒迷你牛毛毯，將兩舊細石執位。買返四蝦大和藻蝦，第二朝已經有隻失蹤左

個缸大執位揚起左好多泥粉，之前插既 multi buttom 應該溶左唔少入水。好在個濾桶夠快，缸泥水擺過夜已經清返。再洗一次濾桶同加一包活性炭，盡量吸走肥料以免生藻

week 6

自從每日餵一餐，絲藻已經受控，黑毛藻就多左。買返四隻大和藻蝦，養左幾日暫時冇傷亡

買多一包烏拉圭草皮種晌最後排，插完草完先後悔。個半月黎缸草既狀態一直唔好，晌未搞清楚照明、二氧化碳、水溫、肥料、酸鹼度定係其他方面出事之前其實唔應該再買

啪多兩支 multi buttom 落去，等多個零禮拜仲係雜草咁既樣就起晒佢，換更有把握既草，例如迷你牛毛毯

week 5

死剩果隻大和藻蝦最後都係失左蹤。紅肚鉛筆一直好淺色，似係抽中左兩條雌魚。養左幾日都唔覺佢地食絲藻，唔美觀又唔實用，搬去廳既大缸算數

朱古力魚周時發癲，四圍竄揚起好多泥粉，仲掃平左後排既斜坡。刮青苔同倒返少少泥加高後排，再換左兩次水，盡量溝淡由泥粉溶出黎既養份

烏拉圭草皮種左個零月，生得好慢，葉片太長，分株唔多貼地，好在冇乜枯萎，右邊既草明顯生得比左邊好。打算買多一包，種晌後排。以現時進度，起碼要多三個月先鋪滿

紅肚鉛筆

今朝有隻蝦趴晌檯面，掟返落水居然仲識游，好彩及時發現。下晝仲食緊絲藻添，可惜得返佢一隻，亦唔知幾時會再跳缸，所以買定兩條紅肚鉛筆接手。紅肚鉛筆都會食絲藻，但效率唔及大和藻蝦。落水個零鍾就食紅虫，唔跳缸既話應該唔難養。兩條魚個肚冇乜紅色，希望係未適應環境，否則即係兩條都係雌魚。缸蝸牛比預期更頑強，岩岩搵到三隻死剩種

week 4

用左一個禮拜黑毛藻殺手，盡殲蝸牛。對付絲藻既效果唔顯著，但至少冇蔓延。洗濾桶同換一半生物環，以往實見到線虫，今次一條都冇，似係毒死晒

暫住晌廳果隻藍色網球蝦搬左返黎，仲買左一包四隻大和藻蝦。第二朝個缸得返一隻大和藻蝦，一夜之間有四隻蝦跳缸死左，前所未有咁慘烈。想買返本來果種藍網球蝦，冇貨，最後買左隻啡色既。抹檯果陣仲搵到條新燈既魚乾添

將兩支 ADA multi bottom 折開兩段，分成四支篤左入泥底。第一次用揀錯位黎插，如果溶左入水就大鑊，一定成缸青苔

落毒

宜家每日兩滴黑毛藻殺手，蝸牛就應該毒死晒嫁喇，都陸續見到蝸牛殼。對付絲藻既效果就唔顯著，仍然有唔少黏晌膠喉度，外表睇唔出咩變化。本來就係灰色一條，枯左都睇唔到。每日餵少一餐，魚既食慾好左，感覺上比分兩餐餵食得更多，空肚既時候亦多左四圍游。難得影到張白金新燈既相，原來已經養左年幾

絲藻

之前以為係黑毛藻既野，再睇清楚應該係絲藻。每日一滴黑毛藻殺手，每日餵一餐，每隔三日換水三份一，一個禮拜後再睇下點。解決左絲藻同蝸牛既就洗濾桶，換一半生物環，搬返隻網球蝦返黎同買兩隻鮑魚螺

week 3

多左幾堆草有分株，開埋前排光管照幾日睇效果。可能早排試新魚糧食剩太多令水質惡化，幾條膠喉黏左唔少黑毛藻，飛狐太大條唔岩細缸養，大和沼蝦怕養唔到又怕佢地食草

反正蝸牛太多，殺極都有，乾脆用黑毛藻殺手，一劑過搞掂佢地順便除藻。兩隻蝦先撈出廳既大缸暫住，用完藥至搬返黎。網球蝦或者捱得住，虎紋蝦就唔睇好喇，不過總好過留晌細缸被毒死

week 2

移走左最右邊粒石仔，反正將來草長左同密左肯定會遮晒。又買左款新魚糧，都唔志在朱古力魚會食，只係想新燈既菜單冇咁單調。好在反應幾好，否則又浪費一樽

試食

兩日黎得幾條新燈肯食北極蝦，兩條朱古力魚啄下就走，唔知係味道唔吸引定係懶得啃蝦殼。再接再厲，買左一筒宣稱針對挑食既魚既乾糧，結果又係得幾條新燈食，朱古力魚直情連啄都費事，遊近望下就走

烏拉圭草皮開始有反應。自上星期起熄左前排光管，本來想縮短照明時間，但時間掣駁埋風扇，做唔到兩盞燈獨立開關。買左樽 ADA 既 multi bottom，雖然有排都未使施肥，起碼等缸草開始生得快同開晒兩盞燈先

唔知邊度黎咁多蝸牛，每日都執走幾隻。似係新呢批草有蝸牛蛋未洗乾淨，趁佢地未開始繁殖就要收拾

北極蝦

一直想搵幾款魚糧替換，令魚既營養更均衡。但缸魚太挑食，只有急凍紅虫同 tetra color 片裝乾糧受歡迎。朱古力魚甚至連乾糧都唔食，每日兩餐就係紅虫

買左包叫北極蝦既急凍蝦仔。頭先試餵一餐，會沉底，咁已經符合最基本要求，因為缸魚唔會食浮面既死物。比紅虫略大，新燈好踴躍搶食，朱古力魚就好有戒心，要等一兩日睇下點。不過都幾腥，唔能夠餐餐餵。今次唔得就再試螺旋藻豐年蝦，一年半前成缸新燈都唔願食，但當時未養朱古力魚

week 1

正如魚鋪老闆所講，種左個零禮拜果然標高左，雖然有向橫生但幅度唔大，兩支 11w PL 可能太光。淨係開後排果支個缸前面太暗，拆走前排，將後排移去中間又太麻煩。暫時熄左前排支睇下效果點

洗完濾桶，冇放活性炭，塞左三片白綿就算。用 ADA II 代黑泥，缸水唔算好黃，勉強可以接受。好耐冇理 pH 值，缸魚冇病冇痛就算

day 2

差少少全軍覆沒。話說今次照舊將新缸既水擺過夜同打氣，但可能係氣泵開得太細，或者係新缸水質有問題，第二日駁埋濾桶然後搬魚過缸，四條鑽石紅蓮燈冇幾耐就打側游，幾條新燈浮晒上水面抖氣。當時即刻換水三份一同開大個氣泵，隔十零分鍾缸魚正常返先繼續搬。擺左兩日至今未有傷亡，亦冇魚絕食，算係大步檻過。如果冇及時察覺，等到缸魚反肚先救已經黎唔切

day 0

決定種烏拉圭草皮。都幾貴，一小束要近四十蚊。買左兩束試下，拆散當牛毛毯咁種。根據 tropica 網頁，頭六至八星期照明要比較弱。魚鋪老闆亦話呢種係弱光草，強光既話會標高同唔夠貼地。等幾個禮拜睇草既反應係點再作打算

新缸打氣擺過夜再移濾桶同魚蝦過去。飛狐同鮑魚螺搬出廳，由兩條小精靈接手。死剩果幾隻虎紋蝦預左兇多吉少嫁喇