day 1

今次翻缸既步驟同以往一樣，係冇再等一個禮拜先洗濾桶，一次過搞埋，暫時冇死傷。會用黑色卡紙搭一個新既遮光罩，舊果個晌冬天整既，冇預到夏天裝完風扇唔岩位

翻缸

出門前換左次水，之後條雄魚既食量正常返，似乎係嚇到吞左蛋。預左繁殖唔到都唔太失望，當返到香港先知條雄魚跳缸死左。又一次得返條雌魚，唔知幾時先配到一對。新燈剩十條，死左一條。得返三隻角螺，全部既殼都爛爛地，晌缸底仲搵到幾塊碎片，應該係黑泥太酸適應唔到

個缸晌上年十二月尾砌，第一次用山谷石同不鏽鋼網鋪莫絲草皮，宜家睇返幾成功，個零月就做到預期效果。用山谷石亦冇乜手尾跟，唔似青龍石咁會發霉同變色。不過當時買唔到大舊既山谷石，結果前面既石好易被莫絲遮住。今次成組石都按比例大左，本來將舊缸既大石扑碎一分為二，唔成功，得一塊碎片用得返，另外既一大一細兩舊石係新買

用返舊缸既珍珠三角莫絲鋪草皮，最麻煩係度位剪不鏽鋼網，今次晌石罅預先剪個紙樣，咁比較容易就位。將後排既泥堆高左，未加水果時比例幾好，加水之後先覺得中間舊石大左少少

week 25

葦蘭提飛船生蛋後第四日，雄魚仲含緊蛋，間中匿晌暖管後面。晌第三日開始食返野，每餐食兩三條急凍紅虫，食得好慢同好勉強。照常換水同餵魚，橫掂就黎出門，暫時唔擦玻璃，盡量少騷擾缸魚，免得條魚受驚而吞蛋。佢捱唔到肚餓吞左就算，唔想嚇到佢吞，希望將來仲有機會生

生蛋

尋日兩條葦蘭提飛船都唔多食野，晌夜晚十點左右，佢地並排游左陣就生蛋。唔係逐粒生，而係一堆咁擠出黎，黎得太突然所以冇拎定相機。生完蛋條雄魚就逐粒執返含住，本來仲有兩粒蛋黏晌咀角，俾條雌魚啄走食左

都好耐冇睇酸鹼度，應該仲係 pH 6.0，KH 20mg/L，開埋風扇約廿七度個缸仲有新燈十一條，大和藻蝦四隻，藍蝦同網球蝦各一隻。比起其他網友玩繁殖既缸，呢個缸唔夠暗，水唔夠凍，pH 亦唔夠低。得珍珠三角莫絲，含住蛋既雄魚又冇地方匿。一直冇預佢地生蛋，環境同水質都唔妥，唔知點解會生，亦唔知點晌唔騷擾條雄魚既同時搬走雌魚、新燈同大和藻蝦

揀呢個時候生，就算佢唔吞返，都要孵十幾廿日。但廿八號就出門，下個月廿三號先返香港。孵到魚仔出黎屋企人都唔識照顧。或者都係照常餵魚，等條雄魚自己吞返，寄望下次再生蛋。真係好可惜

week 24

葦蘭提雌魚大得好快，已經同雄魚差唔多大。早兩個禮拜條雌魚既行為反常，少左食野，啄條雄魚同游到附近既蝦，個腮仲脹起左少少，有諗過係咪口孵緊魚卵。當時太忙冇時間理，到近幾日佢既身型同行為已經正常返，就算係含緊蛋都已經吞晒。莫絲生得快左，要買把前端屈曲既鉸剪方便剪草。近排又多返蝸牛，但都好耐冇買魚同草，唔知邊度走出黎

week 21

對葦蘭提飛船冇再打交同搶食，平時兩條晌玻璃面前游，望到鏡頭先退返入去。某幾日晌熄燈之後仲有疑似求偶既舉動，不過個缸咁細魚又多，冇遮冇掩，都唔旨意會生到，尤其呢種魚出名難繁殖

將前排既草皮剪薄左少少，後排冇郁。都成兩個月冇洗濾桶，今日洗亦唔覺好污漕。自從鋪草皮後，魚同泥被隔開，就算魚受驚亂竄都唔會沖起泥粉，缸水通常都好清，濾桶既負擔細左好多

week 20

上星期去魚街想買返條葦蘭提飛船雄魚。之前幫襯過間鋪話四月尾可能有貨返，行過隔離鋪居然見到成缸晌度，賣四十蚊一條。幾乎全部都係雄魚，好似得一兩條雌魚，但條條都淺啡色好難分辨。另一間鋪話呢批魚賣得平因為應該係人工繁殖，顏色冇野生魚咁靚。反正都只係想買黎俾條雌魚做伴，唔靚冇所謂，就揀左條最大既，但仍然比雌魚細三份一

一放落缸條雌魚即刻生猛好多，本來褪色既魚身鮮艷返晒。頭一個星期條雌魚成日追住條雄魚黎啄，尤其餵魚果陣，令條雄魚成日要匿埋。都擔心佢會捱唔住又跳缸，估唔到經過一個禮拜既磨合，雌魚好似接受左條雄魚，近幾日已經冇再啄佢。雄魚既魚鰭攤返開呈暗紅色，同雌魚成日游出黎，唔怕人只係怕鏡頭。希望今次養到

小精靈死左，唔打算買返，睇唔出佢生前有咩貢獻。莫絲草皮開始厚，將前排既剪薄左，後排冇郁