迷你螯蝦

成兩個幾月冇更新，太懶。葦蘭提死左，唔打算買返。琥珀燈移走晒，因為似買錯魚。最初買果三條叫火焰燈既，係貴好多，但顏色鮮艷。後來買果十幾條叫琥珀燈既，個樣似一樣，以為係未養定所以顏色淡，點知養左個幾月都冇起色。可能根本係兩種魚，每條貴幾倍真係冇賣錯野

唔記得買左幾鮑魚螺同角螺黎清青苔，大致上都掌握到個用法。鮑魚螺刨晒石上既頑固青苔漬之後死晒，冇再買，換角螺頂上。宜家大概有七隻左右，每舊石上面擺一兩隻就維持到

買左對雙帶橙迷螯，食乾糧同紅虫既，搶野食比大和藻蝦遲鈍得多，勝在有鉗，夠惡，魚蝦都唔敢埋身。本來隻母蝦比公蝦淺色少少，養左幾日匿埋換殼，顏色靚晒。初時佢匿晌草叢，搵極搵唔到仲以為死左。再過兩日輪到隻公蝦匿埋，可能又換殼，但冇為意照換水，第二朝死左。去魚街再搵，得返幾隻，仲要全部甩頭甩骨。照魚鋪老闆教既方法去揀隻公既，不過斷左隻鉗，等換殼後生返。顏色暗啞少少，都係等換殼。下次再見佢匿埋就唔換水

到聖誕長假會大執個缸。之前同某位魚鋪老闆傾過可能點搞，應該會換火焰莫絲同鳳尾苔試下

week 5

atyoida 卒之死晒，大和藻蝦死剩兩隻。前日見到一截蝦肉，要憑膚色先認到係 atyoida 既殘骸。前幾日買左四隻袋裝既鮑魚螺，返黎已經奄奄一息，好快死左兩隻，下次買應該晌魚缸揀，貴少少都值。晌週末蝦同螺都好呆滯，成日停晌度唔郁，但換左水就突然翻生，仲周圍搵野食，等隻鮑魚螺刨左少少青苔先睇到舊石本來咩色

仲未知係乜野搞到個缸咁，但犧牲左咁多總算有少少頭緒。以往每星期換一次水，通常晌星期六日。換水之後買既蝦同螺都好生猛，越近週末就越易死。睇黎無論係出左咩問題，換水至少係個治標既辦法。今後隔兩日換一次水，睇多一排先

好後悔死左一隻 atyoida 之後冇即刻換水，唔知仲買唔買得返

week 4

左邊舊細石既顏色太淺，石紋同另外兩舊亦唔協調，換左另一舊尺寸相近既，要剪塊新既不鏽鋼網就返位。上一批大和藻蝦好快死晒，角螺初頭都有刨青苔，舊大石既頂乾淨左好多，但幾日後就冇晒動靜，尋日終於丟晒。再買左四蝦大和藻蝦，死左一隻，未死既狀態睇落幾好，已經有食野。好在最貴果兩隻 atyoida 似乎養到

之前舊石個樣幾可疑，仲以為係佢影響水質令到蝦同螺會死，點知換左都係養唔到。晌幾舊石同膠喉上面既污漬始終要清，仲有黑毛藻添，冇螺始終唔掂

week 2

兩隻斑馬螺死晒，大和藻蝦死剩一隻，連隻藍網球蝦都死埋。隻蝦由上年十二月尾養到宜家，應該係換缸搞左幾日拖得太耐，適應唔到，佢既死係今次未翻缸既最大教訓。好彩條葦蘭提胃口好返少少，條尾已經復原一半

冇蝦同螺個缸開始污漕，石同膠喉有漬，暖管仲痴左少少黑毛藻。從魚既表現睇唔出缸水有咩問題，唯有洗濾桶。隔左幾日再買四隻大和藻蝦同五隻角螺，今次既角螺唔係打袋而係由魚缸揀，狀態應該幾好，但放左落水成晚仲係冇動靜

有鋪頭返左一批 atyoida，呢種網球蝦只從上年五月後就冇再見過，即刻買兩隻。個缸加唔到蓋，以佢地爬得咁快，似會跳缸自殺

week 1

葦蘭提飛船成日匿晌暖管後面，仲絕食左幾日，宜家要敲一敲玻璃先間中游出黎食兩三條紅虫，食完又縮返入去，好在佢條尾鰭開始生返埋

除左條葦蘭提，新燈同琥珀燈睇落冇事，但藍網球蝦就唔食野，唔知缸水有咩問題。上星期買左兩包紅鼻蝦，死晒，尋日買既大和藻蝦已經死左隻。早幾日買既虎紋螺同角螺都唔掂，宜家試緊斑馬螺，希望搵到一種養晌泥底都唔會溶殼既

再翻缸

上星期執完個缸睇落唔多順眼，尤其係中間既大石太闊，前面舊細石太淺色，形狀又唔好睇。本來換舊深色少少，再稍為郁下中間果舊，點知搞到成缸泥水還原唔到，乾脆翻缸再執

近幾次都係執好晒先搬魚，但今次事前冇準備，要移去膠桶暫住。雖然駁晒濾桶氣泵同風扇，用膠桶養始終唔得。養兩日死左一隻大和藻蝦，同三隻螺，包括兩隻新買既太空螺。葦蘭提飛船既尾鰭裂左，應該係撈魚果陣整傷

買左舊大少少既石，執好晒加左水先發覺比原先果舊仲淺色。已經冇精神再搞，希望佢浸得耐會慢慢變色

琥珀燈

葦蘭提飛船下一批貨起碼要等一兩月，想將條雌魚同剩低果十條新燈搬出廳既大缸，房既細缸養返 2cm 以下既魚仔。買左三條琥珀燈試養幾日，魚身呈半透明鮮橙色，不過每條要廿幾三十蚊好貴。放落缸好快就開口，紅虫乾糧都食。隔兩日死左一條，買返十三條。今次晌另一間鋪買，八蚊條平兩倍有多，但顏色唔靚，多數係半透明灰色，幾條有少少橙色。照計同一個種個樣唔應該爭咁遠，希望係新返既貨，養耐左會靚返。平咁多值得搏

新燈同葦蘭提飛船撈左出廳，新燈即刻俾蝙蝠倉追住啄。新燈養左幾年都有返咁上下大，本來都唔擔心會被人食到，估唔到隔左一陣就有一條被咬死左，兇手仲係晌細缸同新燈同居四個幾月，後來搬左出廳養既剛果燈

剛果燈自從搬左就大得好快，已經比晌細缸果時大左兩倍有多。平時唔見佢地追其他魚，一遇到新燈就咬住唔放。唯有將成批魚撈返入細缸