week 21

對葦蘭提飛船冇再打交同搶食，平時兩條晌玻璃面前游，望到鏡頭先退返入去。某幾日晌熄燈之後仲有疑似求偶既舉動，不過個缸咁細魚又多，冇遮冇掩，都唔旨意會生到，尤其呢種魚出名難繁殖

將前排既草皮剪薄左少少，後排冇郁。都成兩個月冇洗濾桶，今日洗亦唔覺好污漕。自從鋪草皮後，魚同泥被隔開，就算魚受驚亂竄都唔會沖起泥粉，缸水通常都好清，濾桶既負擔細左好多

week 20

上星期去魚街想買返條葦蘭提飛船雄魚。之前幫襯過間鋪話四月尾可能有貨返，行過隔離鋪居然見到成缸晌度，賣四十蚊一條。幾乎全部都係雄魚，好似得一兩條雌魚，但條條都淺啡色好難分辨。另一間鋪話呢批魚賣得平因為應該係人工繁殖，顏色冇野生魚咁靚。反正都只係想買黎俾條雌魚做伴，唔靚冇所謂，就揀左條最大既，但仍然比雌魚細三份一

一放落缸條雌魚即刻生猛好多，本來褪色既魚身鮮艷返晒。頭一個星期條雌魚成日追住條雄魚黎啄，尤其餵魚果陣，令條雄魚成日要匿埋。都擔心佢會捱唔住又跳缸，估唔到經過一個禮拜既磨合，雌魚好似接受左條雄魚，近幾日已經冇再啄佢。雄魚既魚鰭攤返開呈暗紅色，同雌魚成日游出黎，唔怕人只係怕鏡頭。希望今次養到

小精靈死左，唔打算買返，睇唔出佢生前有咩貢獻。莫絲草皮開始厚，將前排既剪薄左，後排冇郁

week 16

都成個半月冇更新。換左部 nikon P5100，唔識用，又冇乜時間學，影到個缸好暗

葦蘭提飛船既雄魚養左兩個零禮拜就跳缸死左，之後條雌魚食量細左，魚身褪色又摺尾，仲成日縮晌暖管後面，直到最近先活躍返。之前條雌魚成日追打條雄魚，但雄魚死後條雌魚狀態差好多，似乎唔可以單獨養。想買返雄魚條俾佢做伴，但魚街已經斷晒市，要等下一水貨，條雌魚可能要捱幾個月

重鋪左整塊草皮，換晒做珍珠三角。除左原有既草，額外買多兩包黎鋪，個零月已經遮晒不鏽鋼網，草皮既形狀好理想，應該比上次更易維持

葦蘭提飛船 2

終於買到對葦蘭提飛船，一嘗宿願。零六年尾養朱古力飛船既時候就知道有呢種魚，但一直冇見過實物，手上既書亦冇介紹，得網上有零星既照片同繁殖紀錄。近幾個月返貨都錯過左，今次卒之買到，盛惠二百二十。一雌一雄，雌魚比雄魚略大

將兩條剛果燈同兩條朱古力飛船搬出廳，免得個缸太迫，同費事兩條細魚俾朱古力飛船追打。養左幾個鍾，比想象中細膽，稍有大動作就匿晌膠喉後面，亦即朱古力飛船平時既活動範圍。暫時熄一支光管，希望儘快適應唔好跳缸

廳果個係清缸，擺左盤沙同膠花，ph 7.0，水質同上年用青龍石種匙羹萍果陣差唔多，朱古力魚照計適應到，剛果燈應該更加冇問題

week 10

停左液肥幾個禮拜，珍珠三角係生慢左，不知名既莫絲越長越高，已經係草叢而唔係草皮。打算重鋪草皮，將所有莫絲換晒做珍珠三角。晌舊石後面有條三吋長既空隙冇鋪不鏽網，果段斜坡既泥成日被水流沖散，將會鋪埋佢。兩舊石中間條罅就比較難搞，想攝少少莫絲入去

剛果燈養左四個幾月，竟然生蛋。兩條魚晌近水面快速咁游，似乎係交尾，然後即刻生幾粒蛋，再擰轉頭自己食返。新燈好快又湧埋過去搶食。前後生左幾次蛋，加埋起碼十幾粒，冇一粒落到水底。咁樣生蛋係第一次見，想撈都撈唔切

week 7

當唔得閒打理個缸，種草皮既優點就出晒黎。雖然插草果下好煩，好在唔使好似有莖草咁要定期剪。有兩三撮黑毛藻同絲藻，不過缸草生得咁快佢地應該冇本事蔓延。晌缸底有十幾粒白色野黏左晌玻璃度，似貝殼類，刮走之後就冇再出現，未知係咩黎

葦蘭提飛船會返貨，最快年初十到，想買一對，到時將剛果燈搬出廳。聽講會同朱古力飛船打交，如果葦蘭提飛船唔夠打既就要將朱古力飛船搬埋出去

week 5

經過五星期觀察，好肯定當初果五包草其實分別係兩種莫絲。晌三舊石中間果塊不鏽鋼網，上面堆草個樣寧舍唔同，葉片較細同特別矮，應該係真正既珍珠三角莫絲，但既然生密左就懶得起出黎再搞

藍蝦死剩一隻蝦毛，將廳果兩隻大和沼蝦再一次搬返黎，缸草咁密佢地都唔食得幾多。大和沼蝦好勤力咁掃垃圾，唔似得藍蝦咁長期孵晌膠喉上面等死。水面既油膜洗完濾涌都冇改善，每隔幾日要用廚房紙巾吸走