隔左一個禮拜先 update，個缸面目全非。試種一個月，上週末卒之放棄迷你矮珍珠。掘起面頭果層黑泥同草，重新砌過
買左矮珍珠、牛毛氈，同三種不知名既紅色草。右邊果堆紅色草最多枯葉，頂部既葉仲開始變綠添，唔知係未生根抑或照明同 CO2 唔充足。一次過試五款仲排到密麻麻，希望搵到邊款種得掂，然後先諗做景。丟晒啡色石，買左舊青龍石。居居一舊黑色石頭，個名夠晒誇。勝在唔會搞到缸水變黃，下次執位會買多舊返黎擺
魚蝦搬左去不秀鋼兜暫住一日，撈魚果陣整傷左幾條新燈個咀，仲要係養左年幾兩年既大魚，好在經過一星期休養好似冇乜大礙。想搬走兩隻螺既時候整死左一隻，另一隻移左出廳既缸。支 CO2 好似就黎冇氣，呢三日假期又拎唔到出去叉，煩
今次大執，缸水好快清返，可能因為自八月至今個濾桶一直冇洗，套生物過濾好穩定。亦因此個濾桶仲污漕過垃圾桶，但又唔敢洗。咁上下容量既缸用 501 係太勉強，換濾桶驚又流量大得滯，同埋唔能夠擺檯面。暫時搵到最合適既只有 eheim 2211，聽日去魚街摷下
