紅葉

右邊堆草逐漸變綠色同甩葉，後面果堆高身既晌莖度生左好多根唔知搞乜，矮珍珠，牛毛氈同左邊果堆都冇乜動靜。等新濾桶運作兩個禮拜，套生物過濾穩定返就可以諗第三期

有兩條火兔燈既背鰭同腹鰭多左一截黑色，係游得太快影唔清楚。行為亦唔同左，唔知係想霸佔地盤定係求偶。相比起十年如一日既新燈，養呢種魚樂趣更多

eheim 2211

盛惠 $390。說明書話濾桶頂部必須晌水平線以下起碼 10cm，但因位置問題，個桶同魚缸只可以平放擺檯面。好在過左兩粒鍾仲未有事，係最初泵水入桶果下麻煩。聽講要用口啜條膠喉引水入桶，照做，搞唔掂，仲差 d 吞左啖魚缸水。用返撻著 501 既辦法，將裝滿水既濾桶放地下，開一陣電掣，然後拔起入水膠喉，以虹吸作用抽水，再駁返就用到。501 終於功成身退

怕唔夠生物環，本來想買多盒舊版 fluval biomax，搵唔到焗住買新版。將舊桶既生物環倒晒落去，加埋上次用剩果大半盒，岩岩好，唔使拆新買既

雨淋管尺寸冇問題，扭向後面出水，水流尚可接受，因此唔使買閘掣，慳返二百幾。從正面出水就太勁喇，好似滾湯咁。出入水膠喉長得滯要剪，U 型入水管要鋸，聽日先搞。唔明點解 eheim 要用咁核突既綠色膠，好似 eden 咁用灰色咪幾好咯

第二期

隔左一個禮拜先 update，個缸面目全非。試種一個月，上週末卒之放棄迷你矮珍珠。掘起面頭果層黑泥同草，重新砌過

買左矮珍珠、牛毛氈，同三種不知名既紅色草。右邊果堆紅色草最多枯葉，頂部既葉仲開始變綠添，唔知係未生根抑或照明同 CO2 唔充足。一次過試五款仲排到密麻麻，希望搵到邊款種得掂，然後先諗做景。丟晒啡色石，買左舊青龍石。居居一舊黑色石頭，個名夠晒誇。勝在唔會搞到缸水變黃，下次執位會買多舊返黎擺

魚蝦搬左去不秀鋼兜暫住一日，撈魚果陣整傷左幾條新燈個咀，仲要係養左年幾兩年既大魚，好在經過一星期休養好似冇乜大礙。想搬走兩隻螺既時候整死左一隻，另一隻移左出廳既缸。支 CO2 好似就黎冇氣，呢三日假期又拎唔到出去叉，煩

今次大執，缸水好快清返，可能因為自八月至今個濾桶一直冇洗，套生物過濾好穩定。亦因此個濾桶仲污漕過垃圾桶，但又唔敢洗。咁上下容量既缸用 501 係太勉強，換濾桶驚又流量大得滯，同埋唔能夠擺檯面。暫時搵到最合適既只有 eheim 2211，聽日去魚街摷下

day 30

返左工冇乜時間 update，已經變左週記。幾塊石俾笠螺刨乾淨晒，連出入水膠喉都掃左，但玻璃面總係有一層污漬，始終要用人手刮。之前唔搞分段光照係想保留石上既青苔，既然都冇晒咯，以後由下晝十二點開始，每隔三個鍾熄燈一個鍾，希望可以抑制青苔生長

不過只係臨時性姐，長遠黎講都要反缸嫁喇。種唔到想要既效果，得幾執草算係向橫生，離光源遠少少既冇乜動靜，甚至直情枯左。想種對照明要求比較低既陽性草，又或者換返一支藍色管，乾脆種陰性草，總之唔用沉木同石頭喇，太麻煩

day 22

火兔燈死左一條，買返三條，共七條。蝦死左三隻，剩返四隻。得幾棵草有打橫生，除此以外冇乜起色，每日都有枯草浮起。正面既玻璃算係乾淨左，移左兩隻笠螺出廳既魚缸。幾塊石本來生滿青苔，但早兩日有不務正業既笠螺爬上去食左好多。正面睇水算幾清，從側面睇就會發覺其實係偏黃，可能同堆石有關，又或者濾桶唔夠力

草既根生得淺，周時俾路過既螺同蝦扯出黎，以現時進度唔知何年何月先長到一幅草坪，睇黎用現有設備種呢個係太勉強。呢排開工唔得閒理個缸，睇多個零禮拜，仲係咁上下樣既就要諗下反缸種其他野

火兔燈

青苔橫行，買一袋四隻笠螺應急，當晚已經死左三隻。從未試過買到垂死既螺，第二日再買一袋，暫時黏晒晌玻璃唔郁，今次冇中招掛。咁既缸有五隻螺太多，清左缸邊既青苔就將兩隻搬出廳既魚缸。冇搞分段光照，因為幾塊啡色石有青苔比冇更好睇

行勻魚街都冇最想買既鑽石紅蓮燈，最後揀左五條火兔燈，共廿蚊。幾年前睇書見過，身上有鮮艷既紅、綠色，新買呢幾條紅色較淡，希望過幾日會好返。當時唔覺魚街有，宜家都係得一間鋪頭賣成年魚，以呢個價錢似人工繁殖。落水幾個鍾後就識搶紅虫食，適應得好快。主要聚晌上中層，非常好。正因為十幾條新燈長期盤踞晌水底，魚缸上半截空了了，先引進其他品種平衡下。本來睇岩另一款叫乜乜霓虹燕子既，但個樣似會跳缸，唔敢買

day 12

開始有草向橫生，令人鼓舞。青苔越黎越多，既然短期內唔諗住反缸，都係買返兩隻笠螺頂住先。舊缸既草太高太密，唔願意上鏡既魚好易搵掩護。趁新缸冇乜雜物，幫白金新燈影返張