week 4

珊瑚莫絲種左兩個幾月，全無起色，無謂再等，換做比較受得光照既珍珠三角莫絲。瀕死既紅海帶開始發芽，繼續觀察，其他草生長緩慢。角落位積埋好多青苔，人手刮唔到，買左兩隻鮑魚螺幫手，預佢地有三個月命，到時再買

week 3

新既紅海帶冇咩動靜，舊果棵有兩片葉卷起左。小太陽高左少少，紅針葉皇冠有兩三片葉轉左紅色。買左隻叫「流星螺」既野，落水幾個鍾，未影相就瓜左。呢隻應該係臨死先買返黎，會再試多次

week 2

把風扇裝得及時，就算近幾日咁熱，通常都維持到廿七度幾。唔開風扇就升到近三十，長期係咁乜都唔使種

上兩星期有幾片紅海帶既新葉縐左，原來因為太熱。四色睡蓮生得太高，拎走，擺多棵紅海帶。呢棵係貨尾，狀態頗差所以收平左。葉面冇晒紅色同霉霉地，未至於會枯既。每片葉最長有四五吋，不過生得咁慢都冇幾可要剪

後景加多幾束小太陽，塞左三粒根肥晌中後排。要種既大致上都定晒，應該要等兩三個月先有野睇

week 1

紅海帶、四色睡蓮同紅旦反應幾好，有長新葉而冇甩色，難得有紅色草種得掂。鳳尾蕨同黑木蕨都種唔到，以紅旦咁既生長速度同高度，亦唔似適合種晌十二吋缸。要搵一種生得慢又唔太高既草做後景，今次試小太陽。本來用黎做中景草，生得唔快，會向左右延伸而唔係一直標高。睇魚街既示範缸，成功既話會種到大概八吋高既草叢，僅僅高過舊木

買左一條黑線飛狐同三條鑽石紅蓮燈，成缸共有廿三條魚。鑽石紅蓮燈唔挑食，唔沉底，唔跳缸，養多幾條顏色仲靚左。火兔燈會跳缸，新燈本來係中層魚，但養晌呢度就沉晒底，無謂再買。朱古力飛船本來會周圍游，不過從一月開始就成日匿埋，有兩條跳缸死左添。買細魚返黎又怕被宜家呢兩條恰，都係鑽石紅蓮燈好，夠細，可以養多幾條

翻缸

狀態比較好既珊瑚莫絲移去新既沉木，紫紅針葉柳丟左，迷你牛毛毯同紅針葉皇冠留返。皇冠草雖然唔紅，可以當係普通既前景草咁種。試三款紅色草：四色睡蓮、紅海帶同紅蛋。本來買左幾束湖柳做後景，種落先發覺唔好睇。最後用返黑木蕨，等多一個月，仲係唔長高先換款

二代黑泥既質地有少少唔同，冇咁多泥粉。暫時死左一隻抱卵既虎紋蝦同一條黑線飛狐。條飛狐半夜跳缸，剩低果條神情呆滯，食慾不振。呢類群居魚只養一條係唔掂，起碼要買多條做伴。翻缸後種晒草先發現有一面玻璃刮花左，黑木蕨長高既話勉強遮得住，下次再執位先順便換缸

準備翻缸

裝左把掛缸風扇。吹風扇會加快水既揮發，帶走缸既熱力，以往用類似既野可以降到一兩度。駁埋時間掣，與光管同步開關。晌房開冷氣果時會熄左佢，因為把野幾嘈下

今次揀舊矮既沈木，綁珊瑚莫絲既位置離光源較遠，起碼唔會阻住抹玻璃同種草。睇返魚街種黑木蕨同珊瑚莫絲既示範缸，其實都唔係好暗

黑泥粉加價兩成，話係第二代，缸水會冇咁黃喎，要用過先知。成個禮拜冇打理，個缸好多蝸牛，趁住翻缸順便搞掂佢地

week 5

好明顯青花旦係最適應呢個缸既草，紅針葉皇冠同紫紅針葉柳仍然冇紅色，黑木蕨有發芽但冇長高。珊瑚莫絲種左個半月都冇起色，拆線睇下，甩晒就證明完全種唔到

先拆右上角最近光管果一堆，果然冇黏實舊木，一整就成片甩左。另外三堆仲保留到一部份，其中一堆幾日後部份枯死，可能太熱。日頭冇開冷氣，每日都廿九度幾，捱到咁耐已經出乎意料。從堆碎片可以睇到，青色係新長出黎既葉，而深綠色既就係生左啡藻

朱古力魚又死一條，同上次一樣，又係半夜跳缸，剩返最強壯果兩條。呢個缸死既魚起碼八成都係半夜自殺。搵日冇咁熱會過魚街物色新既沉木，宜家呢舊比想象中阻定，水草既生長亦唔配合，完全造唔到預期既效果，乾脆從新黎過。睇怕今年都要裝返把風扇，長期廿九度好難種到草