反缸第三日

個缸應該係 28~29/10 號凌晨反既，今日當係第三日。缸水仍然好清，蝦仍然係縮晌盡頭既角落，魚就游晒出黎嫁喇，但食慾好差。放乾片落去，佢地游近望下就好不屑咁散開，得一兩條會象徵式啄下。早幾日餵急凍紅虫都係冇咩反應，遲下買急凍豐年蝦引佢地開口

再觀察多幾日，只要冇變濁就大致上證明係 tetra 片裝肥料既問題。咁到時就會用返舊缸果時用開既 sera 液肥

再反缸

換左 eden 501 之後，有四五日係清返晒既，之後又矇返。換言之，關鍵在於呢四五日內到底有咩加左落個缸度。宜家懷疑係 tetra 片裝肥料

tetra 片裝肥料係七月初換缸之後先用既。新缸一直以黎既水質都唔穩定，隔個零禮拜就有幾日唔清，到 13/9 終於失控。之後成個幾月缸水都係矇同起油膜。自從棄用 tetra 問題魚糧同換 eden 501 之後，油膜就冇再出現，但水仍然冇清返

一換 eden 501 就即刻有效果，當時生物過濾係未生效既，即係話唔水質改善同生物環冇關。本來諗過係咪生物環有陶瓷粉甩出黎污染缸水，但 eden 501 用既生物環同以往用既唔同，唔會有粉狀物甩出黎。21/10 賣湖柳果檔野話要用根肥，於是種完湖柳之後就整碎一片 tetra 肥料塞入泥度。過兩日又矇返喇，一直到 27/10

早兩日諗到可能係根肥出問題，但唔知又要等幾耐先清得返，乾脆再反多次缸。吸收上次經驗，今次即晚洗缸再鋪泥同種草，第二朝就放返堆魚入去，冇死傷者。始終係種返小水蘭最易打理，等徹底解決水質問題先諗做景

缸水即時清返晒。比較返半年前個缸最佳狀態果陣，新缸過濾比起以前好得多，容量大左一倍，水質應該更易維持先係，冇理由搞成宜家咁

弱肉強食

岩岩見到有隻蝦食緊一個蝦殼，再望清楚，原來唔係食緊蝦殼，係食緊一隻脫左一半殼既蝦

蝦經常都會食其他蝦脫出黎既空殼，可能係補充鈣質掛。蝦脫殼既果陣蝦身重未變硬，發出黎既腥味會引黎其他蝦既攻擊。以往都見過有幾隻蝦圍攻一隻岩岩脫左殼既蝦，但被果隻走甩左

今次呢隻應該係被個舊殼黏住，到我發現既時候佢已經俾另一隻食到個成日下巴崩左。拎出黎幫佢扯甩個舊殼睇下，冇晒反應但好似重未死。掉入廁所沖走，佢突然又游返，不過游得兩游又沉左底。早知係咁就擺佢入冰格安樂死先。頭先應該影返張相做紀錄，第一次見脫殼搞成咁

隻鮑魚螺今朝死左。呢排成日清缸，冇野好食，都預左佢會死。遲下水質穩定先再買

又矇返

早兩日又開始有少少矇。濾桶買左十零日，照計唔會咁快要洗丫，可能係近排成日反起個泥底掛。駁左濾桶第二日缸水就清返晒，生物環唔會咁快見效，所以證明單靠濾綿已經可以。一直都唔明點解水流係先經生物環再經濾綿，好快已經有堆污漕野積晌生物環度。頭先拆左濾桶黎洗，濾綿果然好污漕，生物環就求祈用魚缸水沖下

湖柳掉晒，又交左幾十蚊學費。實驗證明唔係種唔到，大部份湖柳好快都生根，只係唔好睇姐。遲下諗到更好既配搭就會種返。呢期既主題係矮珍珠，想睇下晌缺 CO2 既環境會種成點。據講只要夠光就會向橫生，唔夠 CO2 最多葉面細姐。葉面細或者唔出泡我又唔介意，會橫生就得喇。種呢個晌麻煩係要拆開塊草皮逐支逐支插入泥，插到手都軟

黑毛藻

駭然發現其中一片湖柳葉上有黑毛藻。自從換左缸就冇見過呢樣野，估唔到又會突然出現。影完相就即時剪左果片葉。缸草太亂，好難睇到有冇其他葉中招。本來養大和沼蝦就係為左呢一日，但近排堆蝦既狀態唔好，成日縮埋一角，可能因為呢個月成日反缸。黑毛藻蔓延而大和沼蝦又唔食既話就煩喇

長短湖柳

早兩日買左幾枝短湖柳，每枝十蚊。種落去先發覺疏得滯，於是拔返出黎放晌水盆浸住先。今日再去魚街決定買三支長既。既然都係十蚊支，不如買長既返黎一開二，抵過買短既。返黎試種先知唔掂。葉片太長，個缸太矮，好唔協調。剪短到剩低頭果一截，同之前買既插埋一齊，結果係堆亂草咁

抖幾日再諗下先搞。呢兩個月黎o徒左既錢都夠買多個 eden501 =_=

完工

大致上擺好個濾桶。入水位果條膠管配唔到，唯有鋸短原裝管。行勻魚街先得一間有灰色喉賣，其餘都係 eheim 綠色喉。咁當然係配返原裝灰色好，果間鋪將九呎既貨尾賣埋俾我。返到黎度位先發覺出入水位各需五呎左右，宜家得四呎半就勉強左少少，不過都拖到去檯既另一邊部 printer 後面，咁樣就唔會聽到濾桶既聲

濾桶擺拖板附近本來唔係咁好，但好難安置個拖板，唯有將佢掛高。咁樣只要個濾桶唔係噴水，就算有滲漏都唔會浸到拖板，最多流過 printer 火牛然後流落地

搭喉果陣有兩條魚突然反肚，撈走左。今次反缸既死傷數目升做三條。雖然一直都唔明點解水會咁濁，總之宜家終於清返晒。遲下插埋草穩定左就會加返五條魚毛

又有起色

今日缸水突然間清返晒，水質同九月中變蔗汁之前一樣。暫停換水，睇定先。聽日會去魚街配膠喉，希望唔駛買多包泥。反缸又要撈晒堆魚蝦出黎又要大洗一輪，可免則免

雨淋管

試用雨淋管，驟眼睇水流好似比用鴨咀既時候更快。優點係更易調較水流既方向，缺點係從此又要安置多一條膠管。果幾條粗膠喉都幾礙眼，好在濾桶可以搬離魚缸，唔似得掛濾咁一定要貼住缸邊

說明書冇寫可以搬幾遠，只係話要同魚缸水平咁擺。原裝條喉係呎半長，換做四呎半應該冇問題掛。另外要買多條短身膠管代替宜家入水位果條長管。同埋都要再調過溫度計同氣喉既擺位，重要買好幾個吸盤黎固定缸外既膠喉

缸水重係矇矇地。到去魚街既時候重係咁既話就買多包泥喇，乾脆清場重新諗諗可以種乜

eden501

買入價一百八十。算靜﹝過兩日將個濾桶移去牆角就應該聽唔到摩打聲﹞，水流亦夠快。宜家出水位用鴨咀，試一兩日，水流太快魚適應唔到就唯有轉用雨淋管

諗唔明點解入濾桶既水係經陶瓷環再經濾綿。以往印晌生物環包裝既說明都係話水流要先經濾綿再到生物環，因為要先隔走大件既雜質免得塞左生物環既細孔

今日重睇左好多套 CO2。除左最常見既氣樽，重有百零二百蚊似係用化學品谷 CO2 既套裝。不過裝得 CO2 既話就唔爭在打橫擺個缸。幾年黎從未見過有長方形打側擺既造景，個缸咁樣擺點種草都唔慌好睇

清場

對個亂景唔滿意，早幾日抽走左部份泥再加左幾棵簀藻。搞左幾日乾脆清場再黎。小水蘭掉晒，簀藻掉剩一棵﹝個缸冇晒草蝦會好徬徨﹞，湖柳搬去廳個缸度暫住。大和沼蝦好似會食簀藻。呢種蝦係會食枯葉，但個別品種既草﹝例如皇冠草﹞會就咁食。如果確定係會食簀藻咁以後就唔可以種喇

早幾日行魚街見到隻小型濾桶。上網摷過先知原來係大名鼎鼎既 eden501。應該係現時最細既濾桶，好多玩細缸既網友都用緊。網上既評價係譭譽參半。優點係夠細夠靜，缸點水流唔快，濾材容量少

eden501 聲稱可以用晌 60L 既缸，但網上普遍認為咁係作大，用晌 20L 缸就得。魚既數目少或者食量唔大既話個缸大少少都得喎。比 eden501 大一個碼既濾桶已經係 P10，但其實係大好多，晌細缸度用 P10 會變左滾湯

我個缸唔夠 20L，養既係新燈，咁應該夠用既。賣一百八十左右。其實幾貴，不過晌掛濾度已經o徒左咁多錢，唔爭在。呢兩日行過魚街就會買

新濾材

生物環已經掉晒。塞左一包貴價碳同一塊濾綿頂住先

咁細既掛濾似乎唔多適合用生物環。容量細，裝得唔多，水流又慢，搞到堆生物環變左藏污納垢既地方。以前用活性碳加濾綿，係每個禮拜都要拎出黎洗姐，不過水質長期都好清，冇宜家咁麻煩。遲下用肥料又唔可以加活性碳，即係迫住諗其他辦法。黑珍珠同麥飯石等等都好似唔岩用，想試下齋用濾綿會點

反缸

百二蚊，買湖柳兩包，日本簀藻一包，ADA 黑泥一包

返屋企先將魚蝦螺連埋缸水移去 12 吋舊缸。吸完水已經發現有條細魚反肚，成為是次反缸第一名死難者。堆新燈晌小水蘭左穿右插，搞左好耐先撈起晒。有條大魚重死死下呼吸加速咁，好彩抖返陣又好似冇事。新燈養好耐先大，大魚死左就好可惜。右上角兩隻網球蝦已經冇留低既理由，搬出廳既大缸俾佢地養老。出面水流夠快，肯定更岩佢地

然後洗缸加泥拆草，湖柳一包得兩支，而且重要係分株既芽，唔知種幾耐先高。買平野冇辦法。本來想買扭蘭，冇貨，聽老闆點改買簀藻。上網摷過似乎頗難種，不過我又唔係要養到出泡，老闆聲稱係生得慢少少姐，唔會枯就得喇。小水蘭用返舊既，排密左

結果係前、後景太矮，中景太高，分唔到高中低既層次。睇怕要兩三個月個景先有雛型，如果種到既話。係時候考慮下 DIY CO2 喇

湖柳

晌魚街見到款叫「湖柳」既草，睇落幾適合做後景。上網摷過，係陽性草。我個缸得支 7W PL 管，開關唔定時，又冇 CO2，好懷疑種唔種到。但湖柳既型態的確幾好，值得一試

由缸水變濁計起都就快一個月，雖然早兩日搵出其中一個問題所在，不過我既耐性已經用得七七八八，開始想反缸。八月頭種到宜家既小水蘭既狀態唔得，唔知係咪缸水濁得太耐光量唔夠，冇分株不特止，呢兩日開始甩葉添﹝相係熄左燈影既，堆魚似乎被個閃燈嚇醒﹞

趁重未入冬，星期一二又有兩日假期，想今日反左佢順便換草。前景維持用小水蘭，中景用扭蘭，後景用湖柳。其實個缸咁細，設備簡陋，我重要打側擺﹝普通既魚缸係最長果條邊做正面，我個缸既正面係短果條邊﹞，養左幾年魚都未見過有咁既「造景」，唔慌好睇嫁喇，姑且試下

解謎

終於明白果層油膜係點樣黎 ... 起因就係新買既魚糧 tetra color pro

平時餵乾片要將魚糧溝水先倒入魚缸，因為就咁放入缸既話乾片會浮面，而呢群魚唔多鍾意食水面既野。頭先懶得滯，就咁放入缸，駭然發現有一層油晌乾片既四周滲出黎﹝見圖﹞。以往堆魚糧直接沉落水，所以唔覺有呢個問題，今次直接放晌水面就睇得好清楚

咁就解釋到點解缸水換極都係有層油晌度。以前未試過缸水會矇咁耐，好可能同呢款魚糧有關。之前都懷疑缸水係太多養份令到浮游生物大量繁殖影響水質，宜家當然停用呢款魚糧，睇下會唔會有改善

尋日買左兩隻專食浮游生物既網球蝦。雖然唔預會有即時效果，起碼象徵式幫下手。本來想買細隻既，但行勻魚街都係得一個碼。以往都係養比較細隻既雌蝦，今次橫掂都係咁大隻，乾脆買一雌一雄。過左一晚，佢地已經搵到全缸水流最快既地方開始搵食。咁細又冇乜水流既缸本來唔適合養呢個，遲下水質有改善就會搬佢地出廳既大缸

時好時壞

經過一個星期既觀察，開始有少少頭緒 ... 可能係因為水入面既養份太多，浮游生物大量繁殖而令到缸水咁濁

如果係外來既懸浮物咁經過幾次換水就應該消失。缸入面有野釋出化學品既，果兩款貴價活性炭都應該吸得走，至少唔會全無變化。本來都有懷疑起因係堆生物環既碎屑粉末，但唔應該有咁多丫，而且以前都冇咁既問題

晌養魚 forum 有位網友曾經倒瀉左少少 DIY CO2 既液體 ( 即係糖水 + 酵母菌 ) 入魚缸，結果又係搞極缸水都唔清，最後要反缸。但我又懶得搞多咁野 ... 都係睇定 d 先