終於明白果層油膜係點樣黎 ... 起因就係新買既魚糧 tetra color pro
平時餵乾片要將魚糧溝水先倒入魚缸，因為就咁放入缸既話乾片會浮面，而呢群魚唔多鍾意食水面既野。頭先懶得滯，就咁放入缸，駭然發現有一層油晌乾片既四周滲出黎﹝見圖﹞。以往堆魚糧直接沉落水，所以唔覺有呢個問題，今次直接放晌水面就睇得好清楚
咁就解釋到點解缸水換極都係有層油晌度。以前未試過缸水會矇咁耐，好可能同呢款魚糧有關。之前都懷疑缸水係太多養份令到浮游生物大量繁殖影響水質，宜家當然停用呢款魚糧，睇下會唔會有改善
尋日買左兩隻專食浮游生物既網球蝦。雖然唔預會有即時效果，起碼象徵式幫下手。本來想買細隻既，但行勻魚街都係得一個碼。以往都係養比較細隻既雌蝦，今次橫掂都係咁大隻，乾脆買一雌一雄。過左一晚，佢地已經搵到全缸水流最快既地方開始搵食。咁細又冇乜水流既缸本來唔適合養呢個，遲下水質有改善就會搬佢地出廳既大缸
