百二蚊，買湖柳兩包，日本簀藻一包，ADA 黑泥一包
返屋企先將魚蝦螺連埋缸水移去 12 吋舊缸。吸完水已經發現有條細魚反肚，成為是次反缸第一名死難者。堆新燈晌小水蘭左穿右插，搞左好耐先撈起晒。有條大魚重死死下呼吸加速咁，好彩抖返陣又好似冇事。新燈養好耐先大，大魚死左就好可惜。右上角兩隻網球蝦已經冇留低既理由，搬出廳既大缸俾佢地養老。出面水流夠快，肯定更岩佢地
然後洗缸加泥拆草，湖柳一包得兩支，而且重要係分株既芽，唔知種幾耐先高。買平野冇辦法。本來想買扭蘭，冇貨，聽老闆點改買簀藻。上網摷過似乎頗難種，不過我又唔係要養到出泡，老闆聲稱係生得慢少少姐，唔會枯就得喇。小水蘭用返舊既，排密左
結果係前、後景太矮，中景太高，分唔到高中低既層次。睇怕要兩三個月個景先有雛型，如果種到既話。係時候考慮下 DIY CO2 喇
