搜石記

想砌一個鋪滿草皮既石景，草會用匙羹萍，係未搵到合適既石。上次用既笙石，質地似泥，易碎，顏色又唔好睇。買左本 aqua journal 做參考，見到有款萬天石，個樣自然得黎又唔多影響水質。但香港冇零售，從日本訂手掌大既一舊要二、三百蚊，買唔落手

行左幾日，先勉強揀到四舊咁上下樣既青龍石，仲要廿蚊磅。嫌其中一舊外型太普通，準備用鎚扑碎佢搏一搏。聽聞花墟有平既，但行勻都唔覺有。青龍石會令水質變鹼，要買定包草泥丸塞入濾桶

買左包粉狀黑泥鋪晌面，上次用剩既粗粒黑泥做底床。powersand 就唔用喇，每次插草都拖起幾粒白色石仔，逐粒執走好麻煩，唔執又礙眼

係時候

網草終於枯左，圓葉紅蝴蝶同迷你皇冠遮左大半個缸，匙羹萍缺乏充份照明同肥料咁耐都仲未死，果然係好理想既前景草

已經將中後排既雜草剪得七七八八，以免阻住撈魚。今次會晌清晨突襲，趁缸魚未訓醒反應慢，用電筒照住黎撈。仲有桶水接駁暖管同氣泵，俾缸魚暫住一兩日。汲取以往經驗，今次準備充足，希望盡量減少傷亡

假釋

將最惡果條朱古力魚收監，一如所料，排第二果條好快接收地盤，欺壓另外兩條。第二日捉埋呢條，就輪到最細果條被另一條恰。兩條惡魚分別監禁一日及兩日，放返出黎都收歛左。實驗證明呢種魚係衰格，小小爭執在所難免，除非單獨養一條

凋零

上星期剪左網草果三片枯葉，新長出黎既葉好快又開始枯萎。圓葉紅蝴蝶太耐冇剪，遮左大片燈光同阻住水流，可能因此影響網草生長。匙羹萍都生得慢左，應該係唔夠光。不過都諗住反缸，懶得剪草同施肥

監禁

有條紅色尾朱古力魚越黎越惡，霸佔左魚缸正面既空地，凡係有同類遊近就追住黎啄，迫對方匿返入草叢。只有一條體型較大間中會還手，但每次都打輸。佢間中會都恰另外兩條較細既，不過冇咁惡

咁既局勢本來維持左好耐，好在從來冇騷擾其他魚。近排條紅尾開始惡到阻住三條同類食野，唯有用膠兜隔離佢。困兩三日後行為冇改善既話，就要諗下係流放去廳既大缸由佢自生自滅，抑或乾脆拎去廁所沖走

宜家條紅尾困住左冇得惡，佢既位置已經被另一條取代左。最後可能要拎走晒兩條大魚，否則兩條細既點都係捱打。之前睇網頁話朱古力魚應該群養先買多兩條，點知原來咁有地盤意識

發夢

早幾日夢見自己反缸，重新種草，係潛意識對呢個缸唔滿意掛。當初買套 CO2 返黎係希望學下種草，現時個缸的確同理想相差好遠。只係一直種唔到前景草，同搵唔到岩用既石，先至搵呢幾款要求低既種住先

匙羹萍生得唔快但總算種得掂，勉強解決左前景草既問題。等放假得閒，買到石既話就可以諗下反缸再黎過

黑毛藻殺手

棵網草局部枯萎，唔知係因為照明、肥料不足定係被真菌感染，更有葉片被黑毛藻侵襲。第一時間買包大和沼蝦，結果又白白犧牲。小精靈唔食黑毛藻，大和沼蝦同黑線飛狐又養唔到，更加唔能夠旨意死剩果幾隻角螺，迫不得己唯有用藥

買左支網友推薦既黑毛藻殺手，睇完說明書發覺果然好有殺傷力。聲稱對魚同草冇害，但講明會影響硝化細菌，用後要洗濾桶，預左缸水會變得混濁，情況類似反缸。每一百公升水落一滴，個缸得廿八公升都唔知點稀釋。咁麻煩都係等放聖誕假先搞

匙羹萍

種左半個月，前排第一批四葉萍陸續轉水，長出橢圓形既嫩葉，向橫匍匐生長。田字型既舊葉相繼枯萎，逐批剪走免得阻礙發芽。試過幾款前景草，係匙羹萍最似樣，長得夠密同貼地

暖管

十二月終於開始凍，朝早個缸得廿三四度，買左成個月既新暖管卒之用得著。hydor theo 夠短同可以成支浸入水，塞晌入水膠喉後面都唔算太礙眼。上年支 25w 有心無力，缸水煲極都唔暖。新暖管有 50w，設定廿三度，實際有廿六度。暖管同魚缸通常相差兩三度，要依照溫度計調較。幾年前初養魚，就係較錯度數，變成煲魚湯，成缸瓜晒

繼兩條新燈後，日前又有一條火兔燈跳缸。一直冇加魚缸蓋係嫌麻煩，況且亦未試過跳得咁密。唔知係咪巧合，加左暖管後就暫時未有魚跳缸

陰功

一返屋企就晌地下執到條魚乾，從尺寸推斷，有可能兩年前開始養既第一批新燈。新燈養定左就少病痛，唔跳缸既話甚少有成年魚會死。當初放棄藍眼燈改養呢個，就係見佢地因開關燈受驚都唔會向上竄，唔易跳缸。新燈養極都唔大，今日又有條咁樣去左，好可惜

小型魚壽命短，抵抗力亦唔強，例如燈魚養得兩三年都果頭近，病起上黎話死就死。比起養貓同狗，養魚既注意力冇咁集中，好多時分散晌缸內既魚、蝦、草身上，唔會話死左一兩條魚就好頹，除非遇到停電成缸瓜晒

報數

隔兩個月左右就有魚跳缸，今次輪到新燈一條，太遲發現，死左。有條好瘦既火兔燈吞唔到紅虫又唔肯食乾糧，唔知有咩病，撈走

失蹤一排既朱古力魚終於浦頭，呢兩日餵魚偶然有出席，但仍然搵唔到佢平時匿晌邊個位。本來有條死死下，趴晌泥面唔郁，飄到咀邊都唔願食。趁周末得閒可以一日餵四餐，佢每餐肯食一兩條，總算有起色開始四圍游。雖然仲係好瘦，肯開口就有得救

用角螺清啡藻證明行唔通，話咁快死左兩隻，剩低三隻唔見左，應該都死埋。好在迷你皇冠少左，小精靈食青苔唔夠飽，迫使佢地食埋啡藻，令網草乾淨好多。宜家凡係無脊椎動物都養唔到，長遠黎講冇蝦始終唔得，要買套 tester 睇下缸水有咩問題

密室推理

前日竟然有條魚神秘失蹤，仲要係全缸最大條既朱古力飛船，餵魚既時候得返一條游出黎。照計個缸係得 16x10x11 吋得大，就算死左被其他魚食埋，總會食剩少少渣掛，撥開堆草電筒照，反缸咁滯都係摷唔到。搵勻檯面同地下都冇魚乾，再者朱古力亦唔似會跳缸。尋日剪草順便摷魚，又唔覺泥面有冇魚骨剩低

剷左中間一排迷你皇冠，今日買多兩包四葉萍補位。另外買左五隻班馬角螺，直接放晌網草上面，希望佢地會刨乾淨塊葉。最後買多兩條朱古力飛船，免得剩低果條孤伶伶。點知餵魚果陣發現第四條朱古力，諗極都唔明佢前兩日可以匿晌邊。雖則有保護色，都未至於隱形掛。近排越買越多魚，好在濾桶夠大仲頂得順。新買兩條朱古力既狀態麻麻，有一條仲好瘦添，未必養得耐

四葉萍

四葉萍有兩個形態，水上葉呈田字形，水中葉呈橢圓形好似隻匙羹咁，所以又稱匙羹萍。現時有四塊葉因為未轉水，近幾日新芽既葉片開始靠攏，唔再係田字形，證明適應緊。到變成匙羹形就會貼地匍匐生長，同矮珍珠一樣

作為前景草，聽講匙羹萍對光既要求冇矮珍珠之類咁高，反正只要種到草坪，用邊種冇所謂。衰在新燈都鍾意啃呢種草，相中已經有幾片葉崩左一忽

屢敗屢試

自從拎走晒趴地紅，迷你皇冠就以驚人速度生長，迅速佔據成個前景。本來葉片呈橢圓形同貼地，種得耐左就唔再迷你。迷你皇冠對照明同 CO2 冇迷你矮珍珠之類要求咁高，所以先會種到咁。當初換燈同裝 CO2 都係想種得企理少少，搞到好似舊缸咁亂既話不如種返小水蘭

只好拎走最前排既迷你皇冠，再試種前景草。草既根抓實晒底床既 powersand，一扯就連埋白色既碎石拖出黎，要逐粒執走免得同黑泥唔協調，好煩。今次試種四葉萍，種得掂就剷埋第二排，留返一排做中景

死因庭

剛才見到有隻蝦游過，原來未死，不過怕且都快。新缸既濾桶性能改善左好多，照計水質應該比舊缸更好先係，但一直養唔到蝦。同舊缸晌水質既最大分別，應該在於底床用左 powersand 同加左套 CO2。powersand 或者令水質稍為變鹼，對蝦唔應該致命。可能係套 CO2 令缸水既含氧量唔夠掛，雖然唔覺缸魚有影響。又或者改變左酸鹼度令蝦適應唔到，目前死因不明

傷亡慘重

剩低果隻蝦終於死左。買多一包四隻，隔夜死三隻，剩低果隻失左蹤，好可能死埋。迷你皇冠同圓葉紅蝴蝶冇乜受藻類困擾，唯一受影響既係網草。兩條小精靈日頭好少郁動，唔知係咪晝伏夜出，總之冇黑線飛狐同大和沼蝦咁勤力，可惜呢兩種唔知點解養唔到。唯有買多兩條小精靈，希望引入競爭可以迫使佢地刨埋網草既啡藻

殉職

又死一隻蝦，唔知係咪因為前日洗濾桶。到發現既時候得返一截蝦肉，為免令缸水變腥本來要撈走，但佢地冇幾可有新鮮野食，唔好意思打擾。得返一隻蝦對付啡藻，要買多一包增援

朱古力飛船比想象中聰明，尋日用膠籤餵急凍紅虫，反應快左識得即刻搶食。睇黎唔使再餵乾豐年蝦，次次要撈走食剩既碎片太麻煩

前日一時大意 update 左做 blogger beta，結果版面走晒位，晌 IE 直情顯示唔到，幾經辛苦先還完，唔使前功盡廢

啡藻

暫時得網草既葉受影響，晌格仔上面有一撻撻啡色污漬。大和沼蝦一隻跳缸自殺，另一隻變左淺紅色死死下，撈走左。小精靈主要食玻璃同迷你皇冠既青苔，剩返相中兩隻會照顧網草。啡藻失控或者再有傷亡，就要買多包蝦幫手

朱古力飛船

買左兩條。見佢地眼仔碌碌好精靈，想買好耐，比燈魚大條少少，新缸較大比較適合養。以為魚街憑空杜撰一個得意既名呃人買，原來英文名係 chocolate gourami，取名朱古力算有根據。頗難養，對水質好敏感，要弱酸性水，廿五至廿八度，生性膽小，需要水草掩蔽，大致上符合要求既

魚糧就煩少少，鍾意食生餌但當然唔會餵。佢地慢條斯理，同燈魚爭食急凍紅虫盞餓死。都肯食少少片裝乾糧，好在唔抗拒上水面食野，餵唔會沉既乾豐年蝦岩晒，冇乜魚會上去搶可以獨食。能夠晌魚缸人工繁殖，會口孵魚仔添，不過混養既缸都係唔使諗。如果買到三百幾蚊一對既七彩飛船，咁就值得研究下喇

除草

網草原有果三片葉相繼枯萎，剪走。上次果棵又係咁，似乎凡係原有既葉片都唔會繼續生長。新葉生長迅速，但冇好似上一棵網草咁扭到縐晒。趴地紅既生長速長同形狀都未如理想，拎走晒，騰空地方俾迷你皇冠既分株自由發展

一如以往，圓葉紅蝴蝶既唔圓亦唔紅，好在生得夠快同開始密，但參差不齊。中間幅相係修剪完後即刻影，下次剪之前應該影返張。剪完剩返成堆亂草，好在有向光性，第二日就排返齊。買左把水草剪，搵日要大修。買左四隻大和沼蝦，個缸咁多草夠野食喇掛。仲買左支暖管，不過怕且有排都未入冬

起泡

當有充份既照明以及 CO2，水草通過光合作用產生既氧氣，就會形成肉眼可見既氣泡持續釋放出黎。呢個現象以往只會晌魚街鋪頭同網上既照片見到，估唔到幾日前晌呢個細缸有一棵迷你皇冠起泡。不過堆泡太幼細，用傻瓜機好難影，拍唔到由葉尖噴出黎既場面

暗算

早幾日發現有條火兔燈身上有腫塊，但條魚舉止正常，只好靜觀其變。到今日情況惡化，腫塊突出呈白色，條魚仲間中搵水草擦身。無論係細菌感染抑或體內寄生虫。為免影響其他魚，唯有撈走。平時盡量唔用藥，除非開始傳染

初期病徵通常唔明顯，要晌四散逃竄既魚群中搵出目標已經夠難。以往養小水蘭，撈魚用長短魚網各一，尚且勉強應付到。宜家種左半缸圓葉紅蝴蝶，生到缸頂咁高，匿左入去既魚根本趕唔到出黎，指定要撈某一條更加唔使諗。最後要提早熄燈等魚群訓覺，再突然開燈，趁目標未訓醒反應遲鈍，先至搞得掂

第四期

負責掃青苔既兩條飛狐相繼殉職，由兩條小精靈接手，養左幾日相安無事。上星期將最高果棵紫紅丁香截枝再種，失敗，頂果截有枯萎跡象。呢種草長得高又多分枝，佔地比預期多，晌咁細既缸難以伸展，隔開種太疏落又唔好睇。棵網草既葉扭埋一舊，本以為係俾膠袋屈成咁，點知新長既葉片都係彎彎地。魚街有款網草既葉片修長挺直，網孔既排列亦唔同，可能係另一個品種

將種到唔湯唔水既迷你矮珍珠掘起，用趴地紅鋪前景。中景用迷你皇冠填滿，後景種晒圓葉紅蝴蝶，並且換另一款網草。上述係實驗證明晌現有設備生存到既草，至於效果如何就要等個零月喇

天淵之別

第一批圓葉紅蝴蝶生得快、高同有好多分枝，本來以為種得好好，直至買左新一批返黎，新舊對比之下，先知原來已經種到走晒樣。晌魚街既圓葉紅蝴蝶名符其實，橢圓形葉片呈棗紅色，葉片之間距離短，好茂密，冇乜分枝

晌呢度種左半個月果批變晒形，葉片變得尖長，呈瘀紅或暗綠色，葉片之間距離拉長，較疏落，好似爛菜乾咁，唔怪得雖然有咁多分支但睇落仲係唔夠密。新舊兩批擺埋一齊，驟眼睇根本係兩種草，不過再過個零禮拜就應該分唔出

補位

剩低果條飛狐都瓜左，再買兩條，再養唔到就換小精靈。買多一包趴地紅，幫迷你矮珍珠補位。前幾日將高果棵紫紅丁香剪開兩截分開種，頂果截開始有枯葉，其餘幾棵生長緩慢。圓葉紅蝴蝶狀態最好，發左唔少新芽。網草有塊葉俾膠袋屈到變形，橫躺晌泥面阻住晒，剪左，騰空中間一片空地。本應買幾棵中景草填滿佢，但前景種到唔湯唔水，又好難揀落手

新品種

引入三種新草：網草、迷你皇冠同趴地紅。迷你皇冠已經有分株，棵網草本來得個光禿禿既球根連住幾塊黃黃地既葉，冇諗過咁快發芽，希望唔會長到太大棵。趴地紅種左兩日冇乜反應，但至少冇枯葉，或者買多幾棵，代替迷你矮珍珠做前景草

迷你矮珍珠連埋綿花一齊種，存活率係高左，但同樣種得好緩慢，而且追光，幾乎冇向橫生。一直種唔好迷你矮珍珠，除左唔夠光，可能因為水溫太高。雖然就黎入冬，晏晝冇開冷氣個缸平均都成廿八度。盞燈又唔夠勁又冇水冷，想種草皮只好搵代替品

失蹤

十八號買左七隻藍蝦，第二日見到有堆蝦殼。當時以為係脫殼然後匿埋晒，因為以前養既蝦反左缸後會同時脫殼。到第三四日先發現原來失晒蹤，檯面冇屍骸即係冇跳缸，但新燈同火兔燈都唔似兇悍到會獵食藍蝦。當日見到既蝦殼略帶紅色，而循正常程序脫既殼係透明，只有死蝦既殼先會偏紅。最合理既解釋係堆蝦適應唔到水質死晒，魚只係執手尾

網球蝦一直絕食，搬去廳既大缸就即刻搵野食，唔知佢地到底唔滿意乜野。缸草越黎越多啡藻，二十號買左兩條細既黑線飛狐頂替死左既蝦。兩條魚成日趴晌泥面唔多食野，頭先終於死左一條，另一條唔知匿晌邊。死左條新燈，養得最耐果幾條都近兩年

後景草

紫紅丁香生得比預期快，個零禮拜已經掂到水面，仲有好多分枝。將長果棵剪成兩段，移去缸既右邊，再買三支矮既種埋一齊。呢種草生得高又多新芽，只要定期剪走頂芽，隔開少少種都應該可以生到好密，係好理想既後景草

圓葉紅蝴蝶少發芽，夠高但唔夠密，好在冇乜甩葉。迷你矮珍珠以龜速生長，同期種既三種草最多枯葉係佢。買三棵迷你皇冠試下，當係中景草，雖然個缸咁短都好難分前中後景。等後景成形，就可以諗下點樣填滿現時留空既正中央，打算擺一棵網草當係成個景既重心

反缸後買既四隻大和沼蝦全軍覆沒，原因不明，本來呢種蝦應該最襟養。由一包七隻藍蝦接替，以前養過，都好捱得，唯一問題係易有寄生虫，例如水螅

另加兩隻網球蝦。換缸前試過幾次都養唔到呢種食浮遊生物既蝦，可能因為缸內既水流唔夠快，所以唔肯食野。間中會跳缸自殺，及時發現，救得返既就會搬去廳既大缸，可以養到一兩年。新缸既環境比以往好，希望養得掂

剃刀

開缸兩三個禮拜，又開始有青苔。以往用螺清青苔，實驗證明效果唔夠好。就算公認最掂既笠螺都唔能夠刨乾淨晒成塊玻璃，仲成日趴晌度唔郁，有礙觀瞻。買左把刮青苔既刀，分別有膠片同刀片兩款刀頭。刀片用國產幾亳子一塊果種，算係用完即棄因為肯定會生鏽。勝在夠鋒利，一拖過玻璃面就刮到乾乾淨淨

前景草

blogger 壞壞地，試左幾日都 upload 唔到相。迷你矮珍珠狀態麻麻，生得頗慢，係時候諗下仲有咩前景草可以揀，例如莫絲。呢類草唔生根，通常綁晌沉木或石頭。有網友將三角莫絲綁晌不鏽鋼網上面，裝個吸盤貼晌缸邊造成莫絲牆。爪哇莫絲就可以當前景草咁種，連埋不鏽鋼網直接鋪晌泥面。呢種草幾年前種過，要求好低，完全唔擔心種唔到，迷你矮珍珠真係唔掂既都值得一試

第三期

上周末反缸，重鋪 powersand 同黑泥。汲取過往教訓，今次將魚蝦搬去平時用黎儲隔夜水既膠桶，駁埋濾桶同氣泵。行左兩日都買唔到沉木或者石頭，又唔能夠一直用膠桶養魚，焗住直接開缸。結果四隻蝦全軍覆沒，冇魚死傷。草缸造景通常都擺幾舊裝飾品，但揀唔岩都冇辦法，唯有留空左邊同正中央既位置從長計議

買左迷你矮珍珠、圓葉紅蝴蝶同紫紅丁香。上次將成包矮珍珠拆散晒再逐棵種，種唔掂。魚鋪老闆提議將成盤連綿花塞入泥，今次試下將一盤草分成六、七份，每一束留少少綿花包住根部咁種

尋日駭然發現有兩三條新燈晌度啄草既嫩芽，應該係唔夠飽。睇住呢幾條魚食草束手無策，唯有即刻再餵少少乾糧安撫佢地。之前從未聽過新燈會食迷你矮珍珠，可能就係咁搞到上次種唔成

第二期檢討

左邊果堆草插入泥果截莖枯左，得一棵有生根，其餘一扯就成棵浮起。矮珍珠同牛毛氈種左兩個禮拜唔覺有發芽亦冇乜枯萎。右邊果款綠色葉既比例多左，除此以外其實種得幾好。反應最好係後排果堆，長高左仲生左好多根，但對一個咁既細缸黎講係太大棵

上次反缸撈魚被整傷既新燈已經好返晒，呢一批草冇乜心機再種落去，想推前一個星期反缸。第三期會買多舊石，用現時右邊果款做後景草，前景再試一次迷你矮珍珠，唔得既話先諗牛毛氈

紅葉

右邊堆草逐漸變綠色同甩葉，後面果堆高身既晌莖度生左好多根唔知搞乜，矮珍珠，牛毛氈同左邊果堆都冇乜動靜。等新濾桶運作兩個禮拜，套生物過濾穩定返就可以諗第三期

有兩條火兔燈既背鰭同腹鰭多左一截黑色，係游得太快影唔清楚。行為亦唔同左，唔知係想霸佔地盤定係求偶。相比起十年如一日既新燈，養呢種魚樂趣更多

eheim 2211

盛惠 $390。說明書話濾桶頂部必須晌水平線以下起碼 10cm，但因位置問題，個桶同魚缸只可以平放擺檯面。好在過左兩粒鍾仲未有事，係最初泵水入桶果下麻煩。聽講要用口啜條膠喉引水入桶，照做，搞唔掂，仲差 d 吞左啖魚缸水。用返撻著 501 既辦法，將裝滿水既濾桶放地下，開一陣電掣，然後拔起入水膠喉，以虹吸作用抽水，再駁返就用到。501 終於功成身退

怕唔夠生物環，本來想買多盒舊版 fluval biomax，搵唔到焗住買新版。將舊桶既生物環倒晒落去，加埋上次用剩果大半盒，岩岩好，唔使拆新買既

雨淋管尺寸冇問題，扭向後面出水，水流尚可接受，因此唔使買閘掣，慳返二百幾。從正面出水就太勁喇，好似滾湯咁。出入水膠喉長得滯要剪，U 型入水管要鋸，聽日先搞。唔明點解 eheim 要用咁核突既綠色膠，好似 eden 咁用灰色咪幾好咯

第二期

隔左一個禮拜先 update，個缸面目全非。試種一個月，上週末卒之放棄迷你矮珍珠。掘起面頭果層黑泥同草，重新砌過

買左矮珍珠、牛毛氈，同三種不知名既紅色草。右邊果堆紅色草最多枯葉，頂部既葉仲開始變綠添，唔知係未生根抑或照明同 CO2 唔充足。一次過試五款仲排到密麻麻，希望搵到邊款種得掂，然後先諗做景。丟晒啡色石，買左舊青龍石。居居一舊黑色石頭，個名夠晒誇。勝在唔會搞到缸水變黃，下次執位會買多舊返黎擺

魚蝦搬左去不秀鋼兜暫住一日，撈魚果陣整傷左幾條新燈個咀，仲要係養左年幾兩年既大魚，好在經過一星期休養好似冇乜大礙。想搬走兩隻螺既時候整死左一隻，另一隻移左出廳既缸。支 CO2 好似就黎冇氣，呢三日假期又拎唔到出去叉，煩

今次大執，缸水好快清返，可能因為自八月至今個濾桶一直冇洗，套生物過濾好穩定。亦因此個濾桶仲污漕過垃圾桶，但又唔敢洗。咁上下容量既缸用 501 係太勉強，換濾桶驚又流量大得滯，同埋唔能夠擺檯面。暫時搵到最合適既只有 eheim 2211，聽日去魚街摷下

day 30

返左工冇乜時間 update，已經變左週記。幾塊石俾笠螺刨乾淨晒，連出入水膠喉都掃左，但玻璃面總係有一層污漬，始終要用人手刮。之前唔搞分段光照係想保留石上既青苔，既然都冇晒咯，以後由下晝十二點開始，每隔三個鍾熄燈一個鍾，希望可以抑制青苔生長

不過只係臨時性姐，長遠黎講都要反缸嫁喇。種唔到想要既效果，得幾執草算係向橫生，離光源遠少少既冇乜動靜，甚至直情枯左。想種對照明要求比較低既陽性草，又或者換返一支藍色管，乾脆種陰性草，總之唔用沉木同石頭喇，太麻煩