洗濾桶

新濾材用左成個月，濾桶已經好污漕，總要洗一洗。生物環用魚缸既水求祈沖一沖，塊濾綿就開大水喉直接洗。出入水果兩條已經變左啡色既膠喉就算喇，內壁層污漬都唔會厚到塞住條喉

洗完之後順便換水，當晚缸水濁左少少，第二朝清返晒

下面幅相係洗濾桶之前，上面果幅係洗完之後第二日影

大事回顧

• 8 月開新缸，放棄活性碳，改用生物環
• 9 月中洗掛濾後缸水變濁。新乾糧 tetra color pro 太油膩，停用
• 10 月初反缸。放棄小水蘭，改種簀藻同湖柳。放棄掛濾，換濾桶 eden501。月尾改種矮珍珠。懷疑係新買既 tetra 底肥出問題，再反缸，種返小水蘭
• 11 月初情況受控。小水蘭陸續枯萎，懷疑買錯草，換走。月中洗濾桶，又濁返，將 eden 原裝新物環換走，改用 fluval biomax
• 12 月缸水清返晒。放棄鮑魚螺，改用角螺。用黑色紙皮搭左個遮光罩，配合時間掣固定魚缸開關燈時間。舊氣泵壞左，換新既

由九月中搞到十一月，總算告一段落，至今仍然未搵出缸水變濁既起因。魚同蝦都有返胃口，草種得幾好。宜家每日添一杯水補充揮發左既水份，逢星期五換水三至四份一，加 5ml sera 液肥

不過都大概係時候洗濾桶，換濾材都成個月喇，應該係每個月洗一次。洗濾桶果日會係換濾材之後第一個關口。另一個關口，係每三個月要按 fluval 既指示換一半生物環，果時又係高危

個半月

十一月頭開始種，呢缸唔知乜草都生得幾快，尤其晌盞燈下面果幾棵。為左配合呢個打側擺既缸，種草果陣將高既插晌後面，而前面果幾棵唔夠光所以生得特別慢，算有少少層次感

黎緊又會凍幾日，支暖管虧虧地都唔知應唔應該換。呢幾日長期煲住，都勉強維持到廿五度，但再凍少少，室溫同魚缸水既溫差太大就開始唔夠力，得返廿三四度。遲下放假有排都唔會落魚街，換唔換就睇呢幾日喇。hydor 有隻 25w/50w 既短身暖管可以浸晒入水，係唔知魚街有冇同埋要幾錢

新食譜

魚既胃口好左，宜家一日餵兩餐，一餐乾糧，一餐急凍紅虫。留意左佢地既食相好多日，發覺佢地對乾糧同急凍紅虫既反應好唔同

兩種魚糧都係有魚唔食既。餵乾糧，有幾條魚會食，有幾條魚咬碎左再吐返出黎，其餘就直情當睇唔到。餵紅虫，又係有幾條會食，其餘就游埋去望下或者啄下，然後好不屑咁散開。唔食果幾條魚似係想食生勾勾會扭扭下既生紅虫。但生虫太污漕，多寄生虫同病菌，比較乾淨既生豐年蝦又唔擺得耐。本來脫水紅虫、線虫同豐年蝦都係幾好既選擇，但脫水魚糧唔會沉，浮晌水面既野佢地又唔多食

每條魚既外形都冇咩特徵可以辨認，分唔出每條魚既喜好，唯有兩種魚糧各餵一餐，確保唔同口味既魚都有野食

新氣泵

早幾日換左個氣泵，用返暖管果個牌子，sicce 1500，五十五蚊，算係中價貨。以我個缸既容量應該買細一個碼，用 1000，但魚街冇得賣。體積同舊泵幾乎一樣，而新泵既底係透明既，重有一盞唔知用黎做乜既橙色燈泡仔

本來都唔係幾滿意佢個外型，尤其係晌底果盞燈，但果日晌魚街試左幾個牌子既泵，包括七十幾蚊既貴價貨，都唔夠呢個靜

可疑既草

十一月初買既疑似小水蘭，係葉片中段窄而葉尖闊，而原裝小水蘭既葉片尖而且長。後來因為疑似小水蘭陸續枯死，就換左宜家呢批草。呢批草既葉片的確係好尖好長，但生得太高喇。小水蘭係前景草，本來唔應該生得咁高。亦唔似係環境問題，因為用既肥料同照明都冇乜變過

好在呢批草冇乜枯葉，同小水蘭一樣會分株既話，將來生得密左會更好睇。高身既草都襯呢個缸，而且多左地方匿埋，對易受驚同怕光既新燈係好事。個缸既設備咁簡陋，唔可以咁挑剔，冇乜凋謝已經要感恩

近排天氣凍，支 25w 暖管唔多夠力。凍起上黎，長期著住都維持唔到廿五度。但得 20L 水又冇理由買支 50w，搞得唔好隨時變煲湯。三年幾前學養魚，果時已經試過一次全缸覆沒

駁線

駁埋個旅行插頭，個時間掣終於可以用。未買旅行插頭之前，一直用氣泵黎試時間掣，又開又關似乎整壞左個泵。個泵本來凌空吊晌檯面既角落頭，用左三年幾，以往坐晌電腦前面係唔會聽到摩打聲。前日個氣泵開始嘈，唯有拆落黎用布包住先，再塞晌 printer 後面。連埋堆電線塞晌 printer 後面，冇咁礙眼之餘都靜左好多，起碼日頭唔再聽到摩打聲，要深夜先有少少嘈

原產地

自從個幾月前個缸成日立立亂，魚同蝦就開始戒口。前日買既 hikari 魚糧已經證實唔掂，實在太細粒，好難控制份量。魚同蝦對呢款魚糧既反應冇第一次餵咁踴躍，結果食剩好多魚糧晌泥面，最後要用泵吸返走。星期五換水之後已經吸過兩次，實際上呢兩日換左三次水，第一次換水果時落既 5ml 液肥都應該溝淡晒

為左了解新燈既飲食習慣，呢幾日上網摷過新燈原產地既資料，主要都係參考隔離有 links 果三個網頁。野生新燈既原產地係南美洲，水質同膳食當然同宜家個缸差好遠，但我呢缸應該係人工繁殖而唔係野生魚，魚場既伙食都唔會比我個缸好得去邊

有外國網頁認為新燈難以人工繁殖，所以市面賣既都係由南美洲直接入口。晌歐美國家或者係咁，但魚街既新燈全年有售，而且有賣四蚊一條既幼魚。賣廿蚊條既成魚我覺得就係野生既，幼魚就唔係喇。晌自然環境得一年命既新燈，唔會一年四季都孵幼魚出黎等人捉去賣掛。另一個網頁就話捷克同遠東區似乎已經可以商業化咁生產新燈，應該就係講緊香港同深圳既魚場

養野生魚我就唔多支持嫁喇，照計有得人工繁殖總好過捉野生動物返黎養，但幾個外國網頁都認為要繼續支持野生魚既市場。對當地人黎講，漁業係佢地既生計。新燈呢類魚晌原產地數量多，繁殖快，捕魚對當地生態唔構成打擊。反而就係有魚捉，佢地先唔駛靠砍伐森林之類去謀生

可疑既蝦

新魚糧都幾油膩。呢排餵得垃雜野多，缸水冇咁清，不過要仔細睇先留意到。可能見換左魚糧，今日堆蝦行返出黎執野食，包括圖中呢隻

呢隻蝦既花紋似係大和沼蝦，但顏色唔似，唔應該咁深色。成缸蝦對眼都係黑色既，唯獨呢隻係深啡色。早排發現果隻孤獨既藍蝦，好幾日前已經死左。呢一隻我估唔係大和沼蝦，但唔肯定係咩品種

又換魚糧

今日晌魚街既隔離街，一間平時唔會行過既鋪頭度見到一款魚街冇得賣既 hikari 燈魚專用魚糧。hikari 即係以往買開既紅虫、豐年蝦乾同急凍紅虫果個牌子，$29 一包。以容量黎計，45g 賣 $29 比 20g 賣 $14 既 tetra 乾片魚糧更平

留意左缸魚幾日，佢地其實唔係唔開口，而係食得唔滿意。將魚糧含左入口之後，好快就吐返出黎。呢排連好多油果隻 tetra color pro 都用埋黎餵，比起 tetra color 受歡迎少少，但中間紅色果一部份就冇乜魚食既。急凍紅虫既反應一直麻麻，係某幾條魚會食。本來想買 ADA 果款三十幾蚊十零廿 gram 既奢侈品，但對缸魚既反應冇把握，買唔落手

頭先試餵，反應幾好。係類似 bb 魚糧既粒狀物，會浮。事先溝水搖勻會沉得好快，唔似得薄片咁慢慢沉等魚有機會食。見佢沉得咁快以為又買左垃圾，點知缸魚前所未見地好積極咁晌泥面執返黎食。好少見佢地會啄沉左晌底既野，餵左幾次，見佢地又開始吐返出黎就冇再餵。太細粒，份量難控制，而且個包裝又唔好，遲下都係搵個樽裝起

暫時餵住呢個同急凍紅虫先，而另外果兩樽食剩一半，同埋一樽未開既 tetra 乾糧就留俾廳果缸魚食埋佢

換時間掣

個時間掣要駁落盞燈既火牛度，而隻火牛就插左晌檯面另一邊既拖版。拖版上面剩返三個空位，而個時間掣太闊，原來會佔左兩個插位，結果今日經過魚街既時候拎左去換，順便問埋舊野點用

換返黎呢個就比較高同窄，插頭凸出小小，只係佔拖版一個位。缺點係隻火牛會頂住上面個轉盤，結果都係要另外買一個細既旅行插頭駁上去，即係晌時間掣同火牛中間攝多一個插頭

魚鋪伙記講既用法同我想象中差唔多。頭先駁落氣泵度試用，冇反應。本來應該斷電既，但個氣泵仍然郁緊。要研究到點用先去買插頭，免得又o徒錢

就算真係壞左都費事又拎去換多次。放左 sem break，唔知幾時先經過魚街。特登去，未知肯唔肯換，就已經要蝕廿四蚊車錢

時間掣

五十蚊。呢舊野似係益智玩具多過電器，因為說明書都冇份，就係得卡紙上面三幅好曖昧既圖同埋背面三句英文謎語。買果時又冇留意張卡咁兒戲，應該要問下個店員呢舊野點用

我既目標係下晝四點開燈，開到凌晨一點。似乎係要將通電果段時間隔離既藍色膠邊壓落去，然後開制，再駁落盞燈度。預左要試幾日先識玩

連產地都冇，呢舊野都幾令人擔心

角螺

買左兩隻角螺。雖然比鮑魚螺細隻好多，但佢地更加勤力同靈活，重可以行上葉面

新燈既食慾仍然好差，每條平均係隔一兩日先食少少魚糧，暫時重有未病魚

個黑箱已經搭好，材料係宜家做背景紙果款黑色卡紙

過兩日去魚街或者 IKEA 買個計時器，駁去盞燈到，時候到就自動開關燈。突然開關燈會嚇親缸魚，所以一向都係開左房其他燈去俾佢地適應下先郁魚缸燈，呢個係以前養藍眼燈累積既經驗。好在新燈受驚既時候會只向下逃竄，好似藍眼燈咁會向上游跳晒出黎既話就用唔到時間制

食慾不振

呢排又清返晒，同半年前舊缸既最佳狀態有得揮。宜家維持每星期換水三至四份一，加 5ml sera 液肥

新燈對急凍虫唔多熱衷。可能呢排開關燈唔定時，佢地習慣唔到，冇乜胃口。星期六日得閒就用黑色卡紙搭個盒，咁以後開夜車就唔會擾亂佢地既作息時間

隻鮑魚螺終於行左去隔離塊玻璃，但要行左落泥面先識爬返上去，始終唔識轉彎。呢個已經係小彎角缸，唔完全係直角，佢咁都爬唔到真係冇辦法。唯有買兩隻角螺返黎，呢隻就移去廳既大缸

急凍紅虫

自從急凍紅虫餵晒，呢幾個月缸魚都食慾不振。新燈本來已經大得慢，呢排伙食唔好就大得更慢。片裝乾糧就向來都唔受歡迎，諗住紅虫乾會係折衷辦法，但浮面既野始終難控制，食唔晒既浮晌缸邊要撈返出黎，最後重麻煩過餵急凍紅虫

尋日終於賣返十蚊三包，都夠食半年。本來想買加左維他命既貴價貨，因為細粒少少份量易控制，但買唔到

以前餵呢個係食到個肚都脹晒既，可能太耐冇餵，尋日餵既反應麻麻

再換水

上星期日換完濾材之後首次換水，重抽起埋包活性碳，用生物環填滿個濾桶。今次冇洗濾桶，本來重想留返濾桶入面既水，後來見太污漕都係倒走左，用魚缸既水添返滿，之後換左魚缸四份一水。本來都作最壞打算，預左又會變矇，但暫時睇好似重清左

換水之後幫孤獨既藍蝦影左相。近排用得多，開始知道要離實物幾遠部 w800 先會自動對焦到

不速之客

自從裝左濾桶，大和沼蝦就好少再四圍行，平時成群聚晌出入水膠管度，因此任何晌泥面行過既蝦都會好顯眼。早兩日就發現左圖中呢隻冇埋堆既蝦。從顏色已經睇得出佢唔係大和沼蝦，似係藍蝦。應該係混入上次新買果袋蝦入面帶入缸，魚鋪睇漏眼撈埋左唔出奇

以往有養過藍蝦、虎紋蝦同蜜蜂蝦。藍蝦易養，但都好易生虫。養過好多隻個肚都黏左一兩隻水螅，要撈起隻蝦用尖咀鉗鉗返出黎，極麻煩。另外兩款就易死，所以到最後就只養大和沼蝦，用黎清食剩既魚糧同壓制黑毛藻

雖然呢隻孤獨既藍蝦係不請自來，都總算係「客」，冇生虫既就由得佢喇。如果係厭惡性小動物，例如白線虫、水螅、渦虫、蜻蜓幼虫等等，咁就有排搞

換濾材第四日

今日好明顯係清返好多，雖然唔及最佳狀態。可以維持到星期五既，就抽走包碳加返生物環入去，再等兩日都冇事就加返液肥

隻螺仍然唔識轉彎行去另一面。佢既職責係抹乾淨向外果兩塊玻璃，咁落去都唔掂。佢吮實左塊玻璃，又冇可能隔兩日就扯佢出黎搬去另一面。睇多幾日都重係咁就買兩隻角螺返黎取代佢。螺魚螺隔幾個月就要換，又食唔到葉面既野，係時候試下其他品種

換濾材第二日

仍然係矇，不過就冇用掛濾果時成缸濁到好似普洱咁既色。雖然唔打算換水，仍然要片走水面層油膜。減少餵魚，由一日兩餐片裝乾糧同紅虫乾，改成一日一餐乾糧，反正佢地胃口都麻麻

新買既大和沼蝦都係聚晌出入水膠管，好少行出黎。幾日前買既鮑魚螺就仍然停晌果一面玻璃，呢塊玻璃應該食到好乾淨嫁喇。魚缸四面玻璃共有四隻直角，新買既鮑魚螺通常一兩日就學識點樣轉彎行去另一塊度，睇黎呢隻特別遲鈍

又換生物環

早兩日洗濾桶，用擺過夜既舊水沖過生物環，第二日缸水又矇返喇，今次就唔關 tetra 片裝肥料既事。之前咁肯定係 tetra 肥料出問題，係因為有一排將掛濾既生物環掉晒，剩係用活性碳同綿都搞唔掂

自從換左生物環個缸就好唔穩定，而十月底換濾桶之後隔一兩日就清返晒，晌咁短時間生物環都未生效。水清似乎就同生物環冇關，水濁就好明顯關佢事喇

今日去魚街想搵代替品，同魚街既 sales 傾過，佢話係換水唔可以咁密﹝宜家隔一兩日就換三份一左右﹞，同埋要換左 501 附送既生物環。本來想用黑珍珠，但只可以擺晌 501 既入水位，一定好快會塞晒。台灣牌子 azoo 出左幾款咩咩「遠紅外線負離子」既濾材，個名太誇又唔敢用。要加液肥，又唔能夠長期用活性碳，唯有買另一款生物環

本來想幫襯果位 sales 間鋪，但冇咩款揀，最後晌第二度買左 fulval biomax，$55 325g。個包裝幾專業，說明書好詳盡，連個網袋既質地都特別好，同以前買既假日本製平價貨冇得比。果位 sales 話平價活性碳冇用，本來想買埋 fulval 既碳，$33 一盒三包，後來都係用晒屋企既日本貨先，果幾包都唔平

暫時既佈置係換晒舊生物環同加一包活性碳，先觀察四五日

鮑魚螺

個缸開左大半個月，玻璃上既污漬都夠養一隻鮑魚螺嫁喇，早兩日就買左隻，以後換水就唔駛點抹玻璃

自從換左濾桶，果五隻蝦既習性唔同左，成日聚晌入水同出水兩條膠管度。以往個缸冇咁多雜物佢地就成日四圍走，宜家既活動範圍就固定晌貼牆果一邊，連餵魚糧都唔主動出黎搶喇。可能因為近排成日有枯草，唔憂冇野食掛。開始見到葉面類似絲藻既野，睇黎都係要買多四隻大和藻蝦返黎

唔晌屋企既時候由家人代餵魚糧，但有時餵得太多結果就沉晒晌底污染水質，搞到缸水冇咁清。都係由自己餵返喇，最多餵少一餐。養左新燈成年幾，已經識點睇佢地有冇胃口。晌中層度四圍游就代表會食野，試餵少少之後，睇下反應就可以決定餵幾多

呢兩日又冇咁清，當然都重係可以接受。搵日得閒就洗濾桶，要搞清楚呢套過濾既能力去到邊。買多幾隻蝦另一個好處係有剩糧都好快清晒，而就算蝦既排泄物多左對水既污染都冇魚糧咁顯著

除油器

油膜重現。應該因為呢排餵既紅虫乾成日都食唔晒，搞到水面有層油。比起以前，宜家好在水流快左，唔會有層好厚既油漬浮晌水面。現成既除油器既太大個，唔岩魚缸仔用。見過有網友專為 eden501 而設計既 DIY 除油器，但我唔想自己砌，嫌核突

咁耐以黎試過兩次 DIY。一次係幾年前初學養魚，整左個駁落潛水泵既 DIY 雨淋管，效果幾好但外形麻麻。另一次係 DIY 風扇，外形唔得之餘，行左兩三日就壞左，o徒左把電腦風扇同一隻火牛

重光

施肥後過左成日，缸水仍然清澈見底。過埋呢關，今次反缸可算大功告成。煩左個半月，個缸終於可以休養生息

準備施肥

近兩日既水質無可挑剔，小水蘭都開始生根，終於到左加液肥既時候喇。一陣換完水就加返 5ml sera 既 florena plant fertilizer

如無意外缸水會有少少變黃，隔一晚就清返。到時就可以肯定呢個半月黎個缸鳥煙瘴氣既罪魁禍首係 tetra 片裝肥料。失敗既話就弊咯，要從頭黎過

水流

對紅虫乾既反應唔錯，都有上去食，係食得好猶疑姐。呢兩日發覺水面既水流唔平均，食剩既紅虫會積晌某幾個區。於是擰轉支雨淋管，將出水口既方向由向住牆改做向住缸邊，向斜上噴水，水流就變得均勻好多

本來將支管擰向斜下，成缸水就會好似滾湯咁，水流更均勻，只係新燈唔適應太急既水流。以往擰向牆果邊就係怕水流太急佢地唔肯游上面，不過就算以前用掛濾，成缸好似死水咁果陣都唔見佢地上去。宜家擰向斜上都唔多影響到佢地嫁喇，反正佢地都係聚晌中下層

正版小水蘭

比較返早兩日既相，好明顯新一批草既葉片係尖同長好多。等一個禮拜生返根之後就落液肥，一切順利咁兩三個月後就會回復換缸前既樣

繼續試餵紅虫乾。急凍虫太麻煩，始終要訓練佢地食水面既野。佢地只係唔敢上水面姐，黎緊幾日停餵乾片，睇下佢地會唔會寧願捱餓都唔游上去

紅虫乾既缺點係好似 tetra color pro 咁都幾油膩下，好在宜家用濾桶唔怕會積左層油膜。缸水唔算好清，不過不失啦

支暖管移左去後面，冇咁礙眼。其實唔加都得，上個禮拜凍左幾日就冇晒下文，唔睇日曆都唔知原來已經十一月

乾紅虫

魚既食慾麻麻，餵左幾餐 tetra color pro。換左濾桶之後水流夠快，唔會有油膜。近幾日缸草爛得幾犀利，可能就係呢樣兩樣加埋令缸水呢兩日冇咁清。好在唔細心睇都留意唔到，唔惡化就冇所謂

廳果個魚缸以前餵開既急凍紅虫食晒，今日買左乾紅虫。個廳既魚唔偏食，係呢缸新燈特別嘴刁。揀飲擇食不特止，浮面既野直情唔食。魚鋪既新燈會浮面既喎，唔知點解係呢缸新燈唔上水面食野，搞到好難買魚糧。以前會遷就佢地餵急凍虫，但魚太少，一粒食唔晒，要解凍之後挑出黎餵，太麻煩

乾紅虫衰在唔會沉。試過用水撈勻再倒入去，但沉一沉又浮返。沉果下魚群會搶，但浮到上水面就冇魚去追

諗過買 ADA 魚糧，但太貴。75g 賣佰四蚊，15g 試食裝都要賣三十幾。比 tetra 乾片貴成倍都算喇，又唔肯定會受班新燈歡迎

買錯草

反缸第五日，仍然好清澈。越黎越肯定呢個半月個缸烏煙瘴氣既起因就係 tetra 片裝肥料。本來諗住加返液肥，但呢幾日總係覺得個缸有唔妥。睇返九月廿二號影既相，發現宜家種緊既好可能唔係小水蘭

上次反缸，平時幫襯開既鋪頭冇貨，去左陌生既鋪頭度買草。老闆聲稱係小水蘭，但價錢就只係平時既一半。缸草幾日前開始變黃。本來新種既草因為未生根就預左會有枯葉，不過枯成咁就前所未見。例如相中左下角果棵，有塊葉既尖端有一截黃左，而印象中小水蘭係由葉既底開始枯既

睇返以前既相，小水蘭葉片尖而長，而呢批草既葉片中段窄而葉尖闊。買果日都已經留意到個樣有小小唔同，不過冇為意，以為佢只係好似矮珍珠既葉咁受 CO2 同光照既影響

呢批草睇黎好唔適應，怕且又要破財再買過正版小水蘭

反缸第三日

個缸應該係 28~29/10 號凌晨反既，今日當係第三日。缸水仍然好清，蝦仍然係縮晌盡頭既角落，魚就游晒出黎嫁喇，但食慾好差。放乾片落去，佢地游近望下就好不屑咁散開，得一兩條會象徵式啄下。早幾日餵急凍紅虫都係冇咩反應，遲下買急凍豐年蝦引佢地開口

再觀察多幾日，只要冇變濁就大致上證明係 tetra 片裝肥料既問題。咁到時就會用返舊缸果時用開既 sera 液肥

再反缸

換左 eden 501 之後，有四五日係清返晒既，之後又矇返。換言之，關鍵在於呢四五日內到底有咩加左落個缸度。宜家懷疑係 tetra 片裝肥料

tetra 片裝肥料係七月初換缸之後先用既。新缸一直以黎既水質都唔穩定，隔個零禮拜就有幾日唔清，到 13/9 終於失控。之後成個幾月缸水都係矇同起油膜。自從棄用 tetra 問題魚糧同換 eden 501 之後，油膜就冇再出現，但水仍然冇清返

一換 eden 501 就即刻有效果，當時生物過濾係未生效既，即係話唔水質改善同生物環冇關。本來諗過係咪生物環有陶瓷粉甩出黎污染缸水，但 eden 501 用既生物環同以往用既唔同，唔會有粉狀物甩出黎。21/10 賣湖柳果檔野話要用根肥，於是種完湖柳之後就整碎一片 tetra 肥料塞入泥度。過兩日又矇返喇，一直到 27/10

早兩日諗到可能係根肥出問題，但唔知又要等幾耐先清得返，乾脆再反多次缸。吸收上次經驗，今次即晚洗缸再鋪泥同種草，第二朝就放返堆魚入去，冇死傷者。始終係種返小水蘭最易打理，等徹底解決水質問題先諗做景

缸水即時清返晒。比較返半年前個缸最佳狀態果陣，新缸過濾比起以前好得多，容量大左一倍，水質應該更易維持先係，冇理由搞成宜家咁

弱肉強食

岩岩見到有隻蝦食緊一個蝦殼，再望清楚，原來唔係食緊蝦殼，係食緊一隻脫左一半殼既蝦

蝦經常都會食其他蝦脫出黎既空殼，可能係補充鈣質掛。蝦脫殼既果陣蝦身重未變硬，發出黎既腥味會引黎其他蝦既攻擊。以往都見過有幾隻蝦圍攻一隻岩岩脫左殼既蝦，但被果隻走甩左

今次呢隻應該係被個舊殼黏住，到我發現既時候佢已經俾另一隻食到個成日下巴崩左。拎出黎幫佢扯甩個舊殼睇下，冇晒反應但好似重未死。掉入廁所沖走，佢突然又游返，不過游得兩游又沉左底。早知係咁就擺佢入冰格安樂死先。頭先應該影返張相做紀錄，第一次見脫殼搞成咁

隻鮑魚螺今朝死左。呢排成日清缸，冇野好食，都預左佢會死。遲下水質穩定先再買

又矇返

早兩日又開始有少少矇。濾桶買左十零日，照計唔會咁快要洗丫，可能係近排成日反起個泥底掛。駁左濾桶第二日缸水就清返晒，生物環唔會咁快見效，所以證明單靠濾綿已經可以。一直都唔明點解水流係先經生物環再經濾綿，好快已經有堆污漕野積晌生物環度。頭先拆左濾桶黎洗，濾綿果然好污漕，生物環就求祈用魚缸水沖下

湖柳掉晒，又交左幾十蚊學費。實驗證明唔係種唔到，大部份湖柳好快都生根，只係唔好睇姐。遲下諗到更好既配搭就會種返。呢期既主題係矮珍珠，想睇下晌缺 CO2 既環境會種成點。據講只要夠光就會向橫生，唔夠 CO2 最多葉面細姐。葉面細或者唔出泡我又唔介意，會橫生就得喇。種呢個晌麻煩係要拆開塊草皮逐支逐支插入泥，插到手都軟

黑毛藻

駭然發現其中一片湖柳葉上有黑毛藻。自從換左缸就冇見過呢樣野，估唔到又會突然出現。影完相就即時剪左果片葉。缸草太亂，好難睇到有冇其他葉中招。本來養大和沼蝦就係為左呢一日，但近排堆蝦既狀態唔好，成日縮埋一角，可能因為呢個月成日反缸。黑毛藻蔓延而大和沼蝦又唔食既話就煩喇

長短湖柳

早兩日買左幾枝短湖柳，每枝十蚊。種落去先發覺疏得滯，於是拔返出黎放晌水盆浸住先。今日再去魚街決定買三支長既。既然都係十蚊支，不如買長既返黎一開二，抵過買短既。返黎試種先知唔掂。葉片太長，個缸太矮，好唔協調。剪短到剩低頭果一截，同之前買既插埋一齊，結果係堆亂草咁

抖幾日再諗下先搞。呢兩個月黎o徒左既錢都夠買多個 eden501 =_=

完工

大致上擺好個濾桶。入水位果條膠管配唔到，唯有鋸短原裝管。行勻魚街先得一間有灰色喉賣，其餘都係 eheim 綠色喉。咁當然係配返原裝灰色好，果間鋪將九呎既貨尾賣埋俾我。返到黎度位先發覺出入水位各需五呎左右，宜家得四呎半就勉強左少少，不過都拖到去檯既另一邊部 printer 後面，咁樣就唔會聽到濾桶既聲

濾桶擺拖板附近本來唔係咁好，但好難安置個拖板，唯有將佢掛高。咁樣只要個濾桶唔係噴水，就算有滲漏都唔會浸到拖板，最多流過 printer 火牛然後流落地

搭喉果陣有兩條魚突然反肚，撈走左。今次反缸既死傷數目升做三條。雖然一直都唔明點解水會咁濁，總之宜家終於清返晒。遲下插埋草穩定左就會加返五條魚毛

又有起色

今日缸水突然間清返晒，水質同九月中變蔗汁之前一樣。暫停換水，睇定先。聽日會去魚街配膠喉，希望唔駛買多包泥。反缸又要撈晒堆魚蝦出黎又要大洗一輪，可免則免

雨淋管

試用雨淋管，驟眼睇水流好似比用鴨咀既時候更快。優點係更易調較水流既方向，缺點係從此又要安置多一條膠管。果幾條粗膠喉都幾礙眼，好在濾桶可以搬離魚缸，唔似得掛濾咁一定要貼住缸邊

說明書冇寫可以搬幾遠，只係話要同魚缸水平咁擺。原裝條喉係呎半長，換做四呎半應該冇問題掛。另外要買多條短身膠管代替宜家入水位果條長管。同埋都要再調過溫度計同氣喉既擺位，重要買好幾個吸盤黎固定缸外既膠喉

缸水重係矇矇地。到去魚街既時候重係咁既話就買多包泥喇，乾脆清場重新諗諗可以種乜

eden501

買入價一百八十。算靜﹝過兩日將個濾桶移去牆角就應該聽唔到摩打聲﹞，水流亦夠快。宜家出水位用鴨咀，試一兩日，水流太快魚適應唔到就唯有轉用雨淋管

諗唔明點解入濾桶既水係經陶瓷環再經濾綿。以往印晌生物環包裝既說明都係話水流要先經濾綿再到生物環，因為要先隔走大件既雜質免得塞左生物環既細孔

今日重睇左好多套 CO2。除左最常見既氣樽，重有百零二百蚊似係用化學品谷 CO2 既套裝。不過裝得 CO2 既話就唔爭在打橫擺個缸。幾年黎從未見過有長方形打側擺既造景，個缸咁樣擺點種草都唔慌好睇

清場

對個亂景唔滿意，早幾日抽走左部份泥再加左幾棵簀藻。搞左幾日乾脆清場再黎。小水蘭掉晒，簀藻掉剩一棵﹝個缸冇晒草蝦會好徬徨﹞，湖柳搬去廳個缸度暫住。大和沼蝦好似會食簀藻。呢種蝦係會食枯葉，但個別品種既草﹝例如皇冠草﹞會就咁食。如果確定係會食簀藻咁以後就唔可以種喇

早幾日行魚街見到隻小型濾桶。上網摷過先知原來係大名鼎鼎既 eden501。應該係現時最細既濾桶，好多玩細缸既網友都用緊。網上既評價係譭譽參半。優點係夠細夠靜，缸點水流唔快，濾材容量少

eden501 聲稱可以用晌 60L 既缸，但網上普遍認為咁係作大，用晌 20L 缸就得。魚既數目少或者食量唔大既話個缸大少少都得喎。比 eden501 大一個碼既濾桶已經係 P10，但其實係大好多，晌細缸度用 P10 會變左滾湯

我個缸唔夠 20L，養既係新燈，咁應該夠用既。賣一百八十左右。其實幾貴，不過晌掛濾度已經o徒左咁多錢，唔爭在。呢兩日行過魚街就會買

新濾材

生物環已經掉晒。塞左一包貴價碳同一塊濾綿頂住先

咁細既掛濾似乎唔多適合用生物環。容量細，裝得唔多，水流又慢，搞到堆生物環變左藏污納垢既地方。以前用活性碳加濾綿，係每個禮拜都要拎出黎洗姐，不過水質長期都好清，冇宜家咁麻煩。遲下用肥料又唔可以加活性碳，即係迫住諗其他辦法。黑珍珠同麥飯石等等都好似唔岩用，想試下齋用濾綿會點

反缸

百二蚊，買湖柳兩包，日本簀藻一包，ADA 黑泥一包

返屋企先將魚蝦螺連埋缸水移去 12 吋舊缸。吸完水已經發現有條細魚反肚，成為是次反缸第一名死難者。堆新燈晌小水蘭左穿右插，搞左好耐先撈起晒。有條大魚重死死下呼吸加速咁，好彩抖返陣又好似冇事。新燈養好耐先大，大魚死左就好可惜。右上角兩隻網球蝦已經冇留低既理由，搬出廳既大缸俾佢地養老。出面水流夠快，肯定更岩佢地

然後洗缸加泥拆草，湖柳一包得兩支，而且重要係分株既芽，唔知種幾耐先高。買平野冇辦法。本來想買扭蘭，冇貨，聽老闆點改買簀藻。上網摷過似乎頗難種，不過我又唔係要養到出泡，老闆聲稱係生得慢少少姐，唔會枯就得喇。小水蘭用返舊既，排密左

結果係前、後景太矮，中景太高，分唔到高中低既層次。睇怕要兩三個月個景先有雛型，如果種到既話。係時候考慮下 DIY CO2 喇